River Indie Now on Flipkart: ఎలక్ట్రిక్ స్కూటర్ కొనాలనుకునే వారికి రివర్ కంపెనీ గుడ్ న్యూస్ చెప్పింది. బెంగళూరుకు చెందిన ఈవీ తయారీ సంస్థ రివర్ తన ప్రముఖ ఎలక్ట్రిక్ స్కూటర్ ఇండిని ఫ్లిప్‌కార్ట్‌లో అందుబాటులోకి తీసుకొచ్చింది. దీంతో వినియోగదారులు షోరూమ్‌కు నేరుగా వెళ్లకుండానే ఆన్‌లైన్‌లో స్కూటర్‌ను బుక్ చేసుకోవచ్చు. అయితే, ఆన్‌లైన్ బుకింగ్ ఎలా చేసుకోవాలి? ఈ స్కూటర్‌లో ఎలాంటి ఫీచర్లు ఉన్నాయి? ధర ఎంత? అనేది ఇప్పుడు తెలుసుకుందాం.
ఇప్పటివరకు రివర్ ఇండి ఈ-స్కూటర్‌ను బుక్ చేసుకోవాలంటే కంపెనీ షోరూమ్‌ను సంప్రదించాల్సి వచ్చేది. తాజాగా ఫ్లిప్‌కార్ట్‌ లో ఈ స్కూటర్‌ను లిస్ట్ చేయడంతో బుకింగ్ ప్రక్రియ మరింత సులభం కానుంది. వినియోగదారులు ఫ్లిప్‌కార్ట్‌లో స్కూటర్ వివరాలను పరిశీలించి, అక్కడి నుంచే బుకింగ్ చేసుకోవచ్చు. అయితే, బుకింగ్ చేసినంత మాత్రాన స్కూటర్ నేరుగా ఇంటికి డెలివరీ అవుతుందని భావించకూడదు. ఆన్‌లైన్‌లో బుకింగ్ పూర్తయిన తర్వాత సంబంధిత సమాచారం సమీపంలోని రివర్ డీలర్‌షిప్‌కు చేరుతుంది. ఆ తర్వాత వాహన కొనుగోలుకు సంబంధించిన మిగిలిన ప్రక్రియను డీలర్‌షిప్ పూర్తి చేస్తుంది. కొనుగోలు అనంతరం సర్వీసింగ్ బాధ్యతలను కూడా స్థానిక డీలర్‌షిప్ నిర్వహిస్తుంది.
ప్రస్తుతం రివర్ సంస్థ దేశవ్యాప్తంగా 48 నగరాల్లో 80కి పైగా స్టోర్లను నిర్వహిస్తోంది. మరిన్ని ప్రాంతాలకు తన నెట్‌వర్క్‌ను విస్తరించే ప్రయత్నాల్లో ఉంది. అయితే, ప్రతి ప్రాంతంలోనూ ఈ ఆన్‌లైన్ బుకింగ్ సదుపాయం అందుబాటులో ఉంటుందని చెప్పలేం. వినియోగదారుల నివాసానికి సమీపంలో రివర్ షోరూమ్ ఉండటం కీలకం. ఆన్‌లైన్ మార్కెట్‌ ప్లేస్‌ల ద్వారా వాహనాలను బుక్ చేసుకునే విధానం ఇప్పటికే ఇతర బ్రాండ్లలోనూ కనిపిస్తోంది. రాయల్ ఎన్‌ఫీల్డ్, యెజ్డీ, ఏథర్, విడా లాంటి బ్రాండ్లు కూడా తమ వాహనాలను ఆన్‌లైన్ ప్లాట్‌ఫామ్‌లలో అందుబాటులో ఉంచుతున్నాయి. ఇప్పుడు ఈ జాబితాలో రివర్ కూడా చేరింది.
రివర్ ఇండి ప్రస్తుతం ఒకే వేరియంట్‌లో అందుబాటులో ఉంది. ఇందులో 4kWh బ్యాటరీ ప్యాక్‌ను అందించారు. కంపెనీ వివరాల ప్రకారం, ఈ స్కూటర్ ఒక్కసారి ఛార్జ్ చేస్తే 163 కిలోమీటర్ల IDC రేంజ్ అందిస్తుంది. దీని గరిష్ఠ వేగం గంటకు 90 కిలోమీటర్లు. రివర్ ఇండి స్కూటర్ ప్రత్యేకత కేవలం బ్యాటరీ, రేంజ్‌కే పరిమితం కాదు. రోజువారీ అవసరాలను దృష్టిలో ఉంచుకుని దీనిని రూపొందించారు. ఇందులో 55 లీటర్ల అండర్‌సీట్ స్టోరేజ్ అందుబాటులో ఉంది. హెల్మెట్లు, బ్యాగులు, ఇతర వస్తువులను తీసుకెళ్లడానికి ఈ స్థలం ఉపయోగపడుతుంది.
రివర్ ఇండి ఈ-స్కూటర్ బెంగళూరులో రూ.1.57 లక్షల ఎక్స్‌ షోరూమ్ ధరతో అమ్ముతున్నారు. ఫ్లిప్‌కార్ట్‌లోనూ ఇదే ధరతో అమ్ముతున్నట్లు తెలుస్తోంది. అయితే, ఆన్‌లైన్‌లో బుకింగ్ చేసే ముందు అందుబాటులో ఉన్న ప్రాంతాలు, బుకింగ్ నిబంధనలు, డెలివరీ వివరాలను పరిశీలించడం మంచిది.
Read Also: భారత్‌ లో జపాన్ ఎలక్ట్రిక్ స్కూటర్ల జోరు.. 10 వేల యూనిట్లు దాటేసిన అమ్మకాలు!
Share
ప్లానింగ్ లోపం.. జంతర్మంతర్ 2.0 విఫలం! ప్రచారార్బాటాలకే పరిమితమైన సీజేపీ.. కేంద్రం అలర్ట్గా ఉందని తెలిసినా.. తిప్పికొట్టే వ్యూహంలో ఫెయిల్..!
మీ కార్ లోన్, పర్సనల్ లోన్ల ఈఎంఐ పెరగబోతోందా? ఇలా తెలుసుకోండి
