బీఆరెస్ సోష‌ల్ మీడియాను సర్కార్ త‌ట్టుకోలేక‌పోతున్న‌దా? విప‌రీతంగా అబ‌ద్దాలు ప్ర‌చారం చేస్తూ రేవంత్‌ను ఇరుకున పెట్టే ప్ర‌య‌త్నం చేస్తున్న‌దా? అంటే అవున‌నే అనిపిస్తుంది సీఎం రేవంత్ వార్నింగుల‌ను చూస్తే. ఇటీవ‌ల ఏ స‌భ జ‌రిగినా చివ‌ర‌గా బీఆరెస్ సోష‌ల్ మీడియాకు ఓ వార్నింగ్ ఇస్తున్నారాయ‌న.
తోలు తీస్తానంటున్నాడు. మిమ్మ‌ల్ని వ‌దిలేది లేదని వార్నింగ్ ఇస్తున్నాడు. ఈ వార్నింగుల‌కు వారు భ‌య‌ప‌డేది ఏమీ ఉండ‌దు. ఇంకా మరింత రెచ్చిపోవ‌డం త‌ప్ప. ఎందుకంటే గ‌త మూడేండ్లుగా చూస్తున్నాం.. వారు ఎక్క‌డా త‌గ్గ‌డం లేదు. వారి వెనుక అలాంటి భ‌ధ్ర‌త ఉంది మ‌రి. కేటీఆర్ వీరికి నెల‌కు కోట్లాది రూపాయ‌లు వెచ్చించ‌డ‌మే కాదు.. లీగ‌ల్‌గా కూడా వారికి ర‌క్ష‌ణనిస్తున్నాడు. అంత‌కు మించి ఇక‌పై వ‌చ్చేది మ‌న‌మేన‌నే ఓ భ‌రోసా ఇవ్వ‌డం కూడా బీఆరెస్ సోష‌ల్ మీడియా వారియ‌ర్స్‌లో రెట్టించిన ఉత్సాహాన్నిస్తున్న‌ది.
సేమ్‌, బీజేపీకి ఉన్న‌ట్టుగా, బీఆరెస్‌కు కూడా అభిమానులున్నారు. కేటీఆర్ ముఖం చూసి కాదు.. కేసీఆర్‌ను బాగా ఇష్ట‌ప‌డేవార‌న్న‌మాట. వీరంతా మ‌ళ్లీ కేసీఆర్ రావాల‌ని బలంగా కోరుకుంటున్నారు. దీంతో వారు స్వచ్ఛందంగానే త‌మ సోష‌ల్ మీడియా హ్యాండిల్స్ ద్వారా ప్ర‌భుత్వాన్ని ఇరుకున పెట్టే విధంగా పోస్టులు పెడుతున్నారు. కౌంట‌ర్లిస్తున్నారు.
దీనికి ధీటుగా స్పందించ‌లేక చ‌తికిల‌బ‌డుతోంది కాంగ్రెస్ పార్టీ సోష‌ల్ మీడియా. ఓ ప్రైవేటు సైన్యాన్ని ఏర్పాటు చేసుకున్నా.. అవి కూడా ప‌రిమిత వ‌న‌రులే. అంత యాక్టివ్‌గా వారేం లేరు. బీఆరెస్ వారియ‌ర్స్‌తో పోల్చితే వీరు ఓ లెక్కలోకి కూడా రారు. అందుకే సీఎంకు ఇది మ‌రీ చిరాకు తెప్పిస్తున్న‌ట్టుంది. అందుకే ఆయ‌న ఏకంగా బ‌హిరంగ స‌భ‌ల వేదిక‌ల మీదే బీఆరెస్‌పై ఫైర్ అవుతున్నారు.
కేటీఆర్‌కు వార్నింగ్ ఇస్తున్నాడు. ఇదే స‌మ‌యంలో ప్రజలకు కూడా అప్పీలు చేసుకుంటున్నారు. ఆ త‌ప్పుడు వార్త‌ల‌ను, అబ‌ద్ద‌పు ప్ర‌చారాల‌ను న‌మ్మొద్ద‌ని రిక్వెస్టు చేస్తున్నాడు. మ‌రోవైపు దీనిపై సీఎం ఆదేశాల‌తో సైబ‌ర్ క్రైమ్ సీరియ‌స్‌గా దృష్టి పెట్టిన‌ట్టు తెలుస్తోంది. గ‌తంలో బీఆరెస్‌కు చెందిన టీమ్‌లో కొంద‌రిని అరెస్టు చేసి జైలుకు పంపారు. వీరికి బీఆరెస్ లీగ‌ల్ టీమ్ అండ‌గా ఉండ‌ట‌మే కాదు..ఆర్థికంగా, అన్ని విధాలుగా భ‌రోసాగా నిలుస్తూ వ‌స్తోంది.
దీంతో ఆ వారియ‌ర్స్ వెనక‌డుగు వేయ‌డం లేదు. దీంతో మ‌ళ్లీ వీరిపై పంజా వేయాల‌ని సర్కార్ భావిస్తోంది. సీఎం ఇంత‌లా సీరియ‌స్ అయ్యారంటేనే.. ఇక బీఆరెస్ సోష‌ల్ మీడియాపై వేట మొద‌లైంద‌నే అభిప్రాయ‌లు వెల్ల‌డ‌వుతున్నాయి. వీరిపై చ‌ర్య‌లు తీసుకోకుంటే.. మున్ముందు మరింత న‌ష్టం క‌లిగించ‌డం ఖాయ‌మ‌నే భావ‌న‌లో ఉంది రేవంత్ సర్కార్.
Share
థియేటర్లకు షాక్.. టికెట్ ధరలపై సర్కార్ కొత్త లెక్క!
మేడ్చల్‌లో పాలిటెక్నిక్ విద్యార్థుల ధర్నా.. 'శక్తి' స్కీమ్‌ను రద్దు చేయాలని డిమాండ్!
