తెలంగాణ ఆర్టీసీ కార్మికులు కేసీఆర్‌ను ఎప్పటికీ మరిచిపోరు. ఆయన మంచి చేశాడని కాదు. ఆయన పాలనలో సమ్మెకాలంలో నియంతలా మారి వారి జీవితాలతో ఆడుకున్న వైనాన్ని గుర్తు చేసుకుని తిట్టుకుంటారు.
అలాంటి రోజులు మళ్లీ రావొద్దని కోరుకుంటారు. అప్పటి వరకు ఓ ఉద్యమ దళపతిగానే తెలుసు. కానీ సీఎం అయిన తరువాత గానీ తెలియలేదు ఆయనలోని ఆ నియంత పోకడలు, అణిచివేసే నిర్ణయాలు. తెలంగాణ ఆర్టీసీ చరిత్రలో 2019 నాటి ఆర్టీసీ సమ్మె సంచలనాత్మకమైనదిగా నిలిచిపోయింది.
దాదాపు 52 రోజుల పాటు సాగిన ఈ సమ్మె, కార్మికులకు ప్రభుత్వానికి మధ్య జరిగిన ఒక తీవ్రమైన సంఘర్షణగా చూడాలి. ఈ సమయంలోనే కేసీఆర్ అసలు రూపం బయటపడింది. ఆర్టీసీ కార్మికుల విషయంలో ఆయన తీసుకున్న నిర్ణయాలను, అవలంభిస్తున్న తీరును చూసి యావత్‌ తెలంగాణ జాతే నివ్వెరపోయింది.
ప్రభుత్వంలో ఆర్టీసీని విలీనం చేయాలనే డిమాండ్‌తో పాటు 26 సమస్యల పరిష్కారం కోసం చేపట్టిన సమ్మెను ఉక్కుపాదంతో అణిచేందుకు అన్ని ప్రయత్నాలు చేశాడు కేసీఆర్ ఆనాడు. ఆర్టీసిని నష్టాల నుంచి గట్టెంక్కించాలంటే ప్రైవేటీకరణ చేయడమే దిక్కు అని ఎదురుదాడి మొదలు పెట్టాడు.
సమ్మె ప్రారంభించిన మరుసటి రోజు నుంచి సెల్ఫ్‌ డిస్మిస్‌ అస్త్రాన్ని ప్రయోగించాడు. నిర్దేశిత గడువులోపు విధుల్లో చేరకపోతే.. 48,000 మంది ఉద్యోగులు తమకు తామే విధుల నుంచి తొలిగిపోయినట్టు లెక్క అని తేల్చిపారేశాడు. జీతాలు నిలిపివేశాడు. ఆర్టీసీలో యూనియన్ల వ్యవస్థ వల్లే సంస్థ నష్టాల్లోకి వెళ్తోందని, తరచూ సమ్మెలు చేస్తూ ప్రజలను ఇబ్బందులకు గురిచేస్తున్నారని మండిపడ్డారు.
భవిష్యత్తులో ఆర్టీసీలో ఎలాంటి యూనియన్లు ఉండబోవని, వాటిని పూర్తిగా రద్దు చేస్తున్నట్లు ప్రకటించి అందరినీ నివ్వెరపోయేలా చేశాడు కేసీఆర్. యూనియన్ల రద్దుపై పెద్ద ఎత్తున తీవ్ర వ్యతిరేకత వచ్చింది. వెంటనే వెల్ఫేర్‌ కౌన్సిల్ పేరుతో సమస్యలను యాజమాన్యం దృష్టికి తీసుకురావాలని ప్రతి డిపోలో వీటిని ఏర్పాటు చేసి చేతులు దులుపుకున్నాడు.
ఈ సమ్మె సమయంలో కేసీఆర్ తీసుకున్న తలతిక్క నిర్ణయాలతో దాదాపు 25 నుంచి 30 మందికి పైగా ప్రాణాలు కోల్పోయిన విషాదం కూడా చోటు చేసుకుంది. అయినా కేసీఆర్ వెనక్కి తగ్గలేదు. దీంతో కార్మికులే దిగి వచ్చినా మొదట బెట్టు చేశాడు. ఆ తరువాత వారిని ఇంటికి పిలిపించుకుని భోజనం పెట్టి నవ్వుతూ మాట్లాడి.. అప్పటి దాకా చేసిందంతా బారాఖూన్‌ మాఫీ.. అని పంపేశాడు.
కానీ ఆ తరువాత యూనియన్ల రద్దును ఎత్తేయలేదు. కాంగ్రెస్‌ సర్కార్‌ వచ్చిన తరువాత గుర్తింపు ఎన్నికలను మళ్లీ యథావిధిగా కొనసాగించింది. ఇన్నాళ్లకు మళ్లీ ఆర్టీసీలో ఎన్నికలు జరిగాయి.
Share
తక్కువ బడ్జెట్లో సూపర్ సౌండ్..40 గంటల బ్యాటరీ లైఫ్తో ఇయర్బడ్స్
పోలీసులకు హింట్ ఇచ్చి మరీ చంపే కిల్లర్... ట్విస్టుల మీద ట్విస్టులు... సీజన్ 2 రచ్చ షురూ
