హైడ్రాకు హైకోర్టు సెగ.. ప్రజల గుండెల్లో మాత్రం సూపర్ హీరో!

HYDRAA Demolitions: ఎక్కడ కబ్జా కోరలు చాస్తుందో.. ఎక్కడ అక్రమ నిర్మాణాలు వెలుస్తాయో.. అక్కడ హైడ్రా బుల్డోజర్లు వాలిపోతాయి. సూర్యుడు రాకముందే స్పాట్‌లో యాక్షన్ మొదలుపెడుతుంది. కోర్టు తలుపులు తెరవకముందే.. అక్రమ నిర్మాణాలు నేలమట్టమైపోతాయి. ఇదీ హైడ్రా ట్రాక్ రికార్డ్.. కోట్ల రూపాయలు విలువైన భూములు, చెరువులు, నాలాలు, ఆఖరికి స్మశానవాటికలకు కూడా హైడ్రానే శ్రీరామరక్ష.

హైడ్రా దూకుడుపై హైకోర్టు ఆగ్రహం..

హైడ్రా దూకుడుపై హైకోర్టు ఆగ్రహం వ్యక్తం చేసింది. రాత్రికి నోటీసులు ఇచ్చి తెల్లవారుజామున ఎలా కూల్చుతారంటూ కోర్టు క్వశ్చన్ చేసింది. చట్టబద్ధమైన ప్రక్రియలను విస్మరిస్తే ప్రజాస్వామ్య సూత్రాలకే ముప్పు వాటిల్లుతుందన్నది న్యాయస్థానాల వాదన. కోర్టు ఆదేశాలను హైడ్రా కమిషనర్ దిక్కరిస్తున్నారంటూ ఆయన్ను తొలగించాలంటూ ప్రభుత్వానికి సూచనలు కూడా జారీ చేసింది హైకోర్టు.

హైడ్రాకు అపూర్వ స్థానం ..

కోర్టుల్లో మొట్టికాయలు పడుతుంటే.. సామాన్యుల హార్టుల్లో మాత్రం హైడ్రాకు అపూర్వ స్థానం లభిస్తోంది. మా భూములకు రక్షణ తెచ్చిన హైడ్రాకు రుణపడి ఉంటామంటూ సపోర్టు చేస్తున్నారు. జనాలు వీధుల్లోకి వచ్చి ‘థ్యాంక్యూ హైడ్రా’ అంటూ నినాదాలు చేస్తున్నారు.

హైడ్రా ఉంటుందా?..

ప్రజల మద్దతు ఉంటే సరిపోతుందా.. న్యాయస్థానం విధించే చట్ట పరిధులను దాటకుండా హైడ్రా ఉంటుందా? ఈ రెండింటి మధ్య సమతుల్యత సాధించడమే.. ఇప్పుడు హైడ్రా ముందున్న అసలైన పరీక్ష.