Gold Loan Debt Trap| ఇంట్లో బంగారం ఉందని అత్యవసర సమయంలో బ్యాంకులో తాకట్టు పెట్టి రుణం తీసుకుంటున్నారా? మొదటి రుణం పూర్తిగా చెల్లించకముందే మరోసారి బంగారంపై అప్పు చేస్తున్నారా? అయితే ఈ విషయం మీరు తప్పక తెలుసుకోవాలి. దేశంలో బంగారు రుణాలు తీసుకునే వారి సంఖ్యతో పాటు, మళ్లీ మళ్లీ రుణాలు తీసుకునే వారి సంఖ్య కూడా పెరుగుతోంది. ట్రాన్స్‌యూనియన్ సిబిల్ తాజా నివేదిక ఈ విషయాన్ని వెల్లడించింది. మంచి క్రెడిట్ స్కోర్ ఉన్నవారు కూడా ఏడాదిలోపే మరోసారి గోల్డ్ లోన్ తీసుకుంటున్నట్లు నివేదిక పేర్కొంది.
ట్రాన్స్‌యూనియన్ సిబిల్ నివేదిక ప్రకారం.. జూలై 2023 నుంచి జూన్ 2025 మధ్య బంగారు రుణాలు తీసుకున్న వారిలో చాలామంది ఏడాదిలోపే మళ్లీ అప్పు చేశారు. రూ.2.5 లక్షల వరకు రుణం తీసుకున్న వారిలో 57 శాతం మంది మరోసారి గోల్డ్ లోన్ తీసుకున్నారు. రూ.2.5 లక్షలకు పైగా రుణం తీసుకున్న వారిలో ఈ సంఖ్య 54 శాతంగా ఉంది. ఇందులో పాత రుణాల రెన్యువల్స్, టాప్ అప్ రుణాలు, ఇతర సంస్థల నుంచి తీసుకున్న కొత్త రుణాలు కూడా ఉన్నాయి. కాబట్టి పదేపదే రుణం తీసుకోవడం ఒక్కటే ఆర్థిక ఇబ్బందులకు నిదర్శనం కాదు. ఇతర రుణాలతో పోలిస్తే గోల్డ్ లోన్లలోనే మళ్లీ అప్పు తీసుకునేవారు ఎక్కువగా ఉన్నారు.
నివేదిక ప్రకారం.. ఇతర రుణాలతో పోలిస్తే గోల్డ్ లోన్లలో రిపీట్ బారోయింగ్ ఎక్కువగా ఉంది.
రూ.2.5 లక్షల వరకు గోల్డ్ లోన్: 57 శాతం.
రూ.2.5 లక్షలకు పైగా గోల్డ్ లోన్: 54 శాతం.
రూ.లక్ష వరకు పర్సనల్ లోన్: 38 శాతం.
క్రెడిట్ కార్డులు: 22 శాతం.
అన్‌సెక్యూర్డ్ బిజినెస్ లోన్లు: 15 శాతం.
రూ.లక్షకు పైగా పర్సనల్ లోన్లు: 12 శాతం.
భారత్‌లో బంగారు రుణాల మార్కెట్ వేగంగా విస్తరిస్తోంది. ఆగస్టు 2026 నాటికి మొత్తం గోల్డ్ లోన్ బకాయిలు రూ.22.5 లక్షల కోట్లకు చేరాయి. ఆగస్టు 2023తో పోలిస్తే ఇది దాదాపు 3 రెట్లు ఎక్కువ. దేశవ్యాప్తంగా సుమారు 5.5 కోట్ల మంది యాక్టివ్ గోల్డ్ లోన్ రుణగ్రహీతలు ఉన్నారు. ఒక్కో రుణగ్రహీతపై సగటున రూ.4.1 లక్షల బకాయి ఉంది. జూన్ 2026 త్రైమాసికంలో రుణాల సంఖ్య 15 శాతం తగ్గింది. అయినప్పటికీ, రుణాల మొత్తం విలువ ఏడాది ప్రాతిపదికన 12 శాతం పెరిగి రూ.8.2 లక్షల కోట్లకు చేరింది.
ఏప్రిల్ నుంచి జూన్ 2026 మధ్య గ్రామీణ, సెమీ అర్బన్ ప్రాంతాలు మొత్తం గోల్డ్ లోన్ పంపిణీలో మూడింట రెండొంతుల వాటాను కలిగి ఉన్నాయి. ప్రతి అయిదుగురు రుణగ్రహీతల్లో ఇద్దరు మహిళలే ఉన్నారు. జెన్ Z రుణగ్రహీతల సంఖ్య ఏడాది వ్యవధిలో 19 శాతం పెరిగింది. 800కు పైగా క్రెడిట్ స్కోర్ ఉన్నవారు కూడా గోల్డ్ లోన్లు తీసుకుంటున్నారు. వీరు మొత్తం రుణగ్రహీతల్లో 40 శాతం ఉన్నారు.
Also Read: క్రెడిట్ కార్డ్ బిల్లు పేమెంట్‌లో ఈ పొరపాటు చేస్తే అప్పు పెరుగుతూనే ఉంటుంది.. ఈ జాగ్రత్తలు తప్పనిసరి
గోల్డ్ లోన్ చెల్లింపుల విషయంలో కొంత మెరుగుదల కనిపిస్తోంది. 30 రోజులకు పైగా బకాయి ఉన్న రుణగ్రహీతల వాటా జూన్ 2025లో 2 శాతంగా ఉంది. జూన్ 2026 నాటికి ఇది 1.4 శాతానికి తగ్గింది.
అయితే, గత ఆరు నెలల్లో ఒకటి కంటే ఎక్కువ చెల్లింపులు మిస్ అయినవారు మళ్లీ చెల్లింపులు మిస్ చేసే అవకాశం మూడు రెట్లు ఎక్కువగా ఉందని నివేదిక తెలిపింది.
ట్రాన్స్‌యూనియన్ సిబిల్ ఎండీ, సీఈఓ భావేష్ జైన్ ప్రకారం.. రుణదాతలు బంగారం విలువను మాత్రమే చూడకూడదు. రుణగ్రహీతకు ఉన్న ఇతర అప్పులు, తిరిగి చెల్లించే సామర్థ్యాన్ని కూడా పరిశీలించాలి.
Also Read: నెల జీతం సరిపోవడం లేదు.. ధరల పెరుగుదలతో విలవిల్లాడుతున్న 70 శాతం భారతీయులు
అత్యవసర పరిస్థితుల్లో గోల్డ్ లోన్ ఉపయోగపడుతుంది. అయితే మరోసారి రుణం తీసుకునే ముందు వడ్డీ, తిరిగి చెల్లించే గడువు, ఇప్పటికే ఉన్న అప్పులను పరిశీలించాలి. పాత రుణాన్ని చెల్లించడానికి కొత్త రుణం తీసుకునే అలవాటుకు దూరంగా ఉండాలి. సరైన ఆర్థిక ప్రణాళిక లేకుండా పదేపదే అప్పులు చేస్తే భవిష్యత్తులో ఆర్థిక భారం పెరిగే ప్రమాదం ఉంది.
Share
ఉద్యోగుల నిర్బంధ పదవీ విరమణపై సుప్రీం కోర్టు సంచలన తీర్పు!
2007 వ‌ర‌ల్డ్ క‌ప్ త‌ర‌హాలోనే గ్రూప్ స్టేజ్ లోనే టీమిండియాను ఇంటికి త‌రిమేస్తాం!
