రూ.3 లక్షల లోన్ కావాలా గ్యారెంటీ కూడా అవసరం లేదు.. కేంద్ర ప్రభుత్వ పథకం.. ఇలా అప్లై చేయండి

Collateral Free Loan| చేతిలో వృత్తి నైపుణ్యం ఉండి, దాన్ని అభివృద్ధి చేసుకోవడానికి పెట్టుబడి కోసం తగిన డబ్బు లేక ఇబ్బందులు పడుతున్నారా? అయితే అలాంటి సంప్రదాయ చేతివృత్తుల వారికి కేంద్ర ప్రభుత్వం పీఎం విశ్వకర్మ యోజన పథకం అందిస్తోంది. ఈ స్కీమ్ ద్వారా అర్హులైన వారికి ఎలాంటి ఆస్తిని తాకట్టు పెట్టకుండానే రూ.3 లక్షల వరకు రుణం పొందే అవకాశం ఉంది. అంతేకాదు, ఉచిత నైపుణ్య శిక్షణ, రోజుకు రూ.500 స్టైపెండ్, టూల్స్ కొనుగోలుకు రూ.15 వేల ఆర్థిక సాయం కూడా అందిస్తారు.

పీఎం విశ్వకర్మ యోజన అంటే ఏమిటి?

కేంద్ర ప్రభుత్వం 2023 సెప్టెంబర్ 17న ప్రధానమంత్రి నరేంద్ర మోదీ చేతుల మీదుగా ఈ పథకాన్ని ప్రారంభించింది. సంప్రదాయ వృత్తులపై ఆధారపడి జీవిస్తున్న కళాకారులు, చేతివృత్తుల వారికి ఆర్థికంగా అండగా నిలవడం దీని ప్రధాన ఉద్దేశం. వారి నైపుణ్యాలను మెరుగుపరచడంతో పాటు ఆధునిక పనిముట్లు, రుణ సదుపాయం, మార్కెటింగ్ సహకారం అందిస్తారు.

ఈ పథకం ద్వారా లభించే ప్రయోజనాలు

ఈ పథకం కింద లబ్ధిదారులకు ప్రాథమిక, అధునాతన నైపుణ్య శిక్షణ ఇస్తారు. శిక్షణ సమయంలో రోజుకు రూ.500 చొప్పున స్టైపెండ్ అందుతుంది. ఆధునిక పనిముట్లు కొనుగోలు చేసేందుకు రూ.15 వేల వరకు టూల్‌కిట్ ప్రోత్సాహకం ఇస్తారు. అలాగే అర్హులకు రెండు విడతల్లో రుణం అందుతుంది. మొదట రూ.1 లక్ష వరకు, ఆ రుణాన్ని సక్రమంగా తిరిగి చెల్లించి నిబంధనలు పాటించిన తర్వాత రెండో విడతలో మరో రూ.2 లక్షల వరకు పొందవచ్చు. ఈ రుణాలకు పూచీకత్తు అవసరం లేదు. వడ్డీ రేటు 5 శాతంగా ఉంటుంది.

ఈ 18 రకాల వృత్తుల వారికి అవకాశం 

పీఎం విశ్వకర్మ పథకం కింద మొత్తం 18 సంప్రదాయ వృత్తులను చేర్చారు. అవి:

• కార్పెంటర్
• పడవలు తయారు చేసేవారు
• ఆయుధాల తయారీదారులు
• కమ్మరులు
• తాళాలు తయారు చేసేవారు
• సుత్తులు, పనిముట్లు తయారు చేసేవారు
• స్వర్ణకారులు
• కుమ్మరులు
• శిల్పులు, రాతి పనివారు
• చెప్పులు కుట్టేవారు
• మేస్త్రీలు
• బుట్టలు, చాపలు, చీపుర్లు తయారు చేసేవారు
• బొమ్మలు తయారు చేసేవారు
• మంగలి వృత్తిదారులు
• పూలమాలలు కట్టేవారు
• చాకళ్లు
• దర్జీలు
• చేపల వలలు తయారు చేసేవారు

ఎవరు దరఖాస్తు చేసుకోవచ్చు?

దరఖాస్తుదారులు తప్పనిసరిగా పైన పేర్కొన్న 18 వృత్తుల్లో ఏదో ఒకటి చేస్తూ ఉండాలి. కనీసం 18 సంవత్సరాల వయస్సు ఉండాలి. కుటుంబానికి సంబంధించిన ఇతర అర్హత నిబంధనలు కూడా వర్తిస్తాయి.

పథకం కోసం ఎలా దరఖాస్తు చేయాలి?

అర్హులైన వారు https://pmvishwakarma.gov.in/ అధికారిక వెబ్‌సైట్ ద్వారా వివరాలు తెలుసుకోవచ్చు. ఆధార్ కార్డు, ఫొటో, బ్యాంకు ఖాతా వివరాలు, వృత్తికి సంబంధించిన ఆధారాలు సిద్ధంగా ఉంచుకోవాలి. అవసరాన్ని బట్టి ఇతర పత్రాలు కూడా అడగవచ్చు. ఆన్‌లైన్‌లో దరఖాస్తు చేసుకోవడం తెలియని వారు సమీపంలోని కామన్ సర్వీస్ సెంటర్ (CSC)కు వెళ్లి సిబ్బంది సహాయం తీసుకోవచ్చు.

Also Read: ఉద్యోగులకు కొత్త కంపెనీ బంపర్ ఆఫర్.. ఏ టైమ్‌లోనైనా పనిచేయండి, ఇష్టమొచ్చినప్పుడు సెలవులు

పథకం బడ్జెట్ ఎంత? చివరి తేదీ ఎప్పుడు?

ఈ పథకం కోసం కేంద్రం 2023-24 నుంచి 2027-28 ఆర్థిక సంవత్సరం వరకు రూ.13,000 కోట్ల బడ్జెట్ కేటాయించింది. సుమారు 30 లక్షల మంది చేతివృత్తుల వారికి ప్రయోజనం చేకూర్చాలని లక్ష్యంగా పెట్టుకుంది. ప్రస్తుతం అందుబాటులో ఉన్న సమాచారం ప్రకారం ప్రత్యేక దరఖాస్తు చివరి తేదీ ప్రకటించలేదు. తాజా నమోదు వివరాల కోసం అధికారిక వెబ్‌సైట్‌ను పరిశీలించాలి.

Also Read: వయసు 21 ఏళ్లు.. ఒక్క నెలలో రూ.2.6 కోట్లు సంపాదన.. యువకుడి బిజినెస్ ఐడియా అదుర్స్

గమనిక: దరఖాస్తు చేసుకున్నంత మాత్రాన రుణం మంజూరు కాదు. అర్హతలు, పత్రాల పరిశీలన, సంబంధిత ధ్రువీకరణ పూర్తయిన తర్వాతే ప్రయోజనాలు అందుతాయి.

Join WhatsApp Channel

Share

• 
• 
• 
• 
• 
•