PPF Account for Child| పిల్లల భవిష్యత్తు కోసం పెట్టుబడి చేయాలని చాలామంది తల్లిదండ్రులు భావిస్తారు. పబ్లిక్ ప్రావిడెంట్ ఫండ్ అంటే పిపిఎఫ్ (PPF).. దీర్ఘకాలిక పొదుపులకు ఉపయోగపడే పథకం. తల్లిదండ్రులు తమ మైనర్ పిల్లల పేరుతో పిపిఎఫ్ అకౌంట్ ఓపెన్ చేయవచ్చు. ప్రస్తుతం ఈ పథకంపై సంవత్సరానికి 7.1 శాతం వడ్డీ రేటు ఉంది. అయితే పిల్లల పేరుతో పిపిఎఫ్ అకౌంట్ తెరిచేటప్పుడు కొన్ని ముఖ్యమైన నియమాలు పాటించాలి.
మైనర్ పిల్లల పేరుతో తల్లిదండ్రులు లేదా చట్టపరమైన సంరక్షకులు పిపిఎఫ్ అకౌంట్ ఓపెన్ చేయవచ్చు. పిల్లలు మేజర్ అయ్యే వరకు గార్డియన్స్ (సంరక్షకులే) అకౌంట్ నిర్వహిస్తారు. ఒక వ్యక్తి తన పేరుతో ఒక పిపిఎఫ్ అకౌంట్ మాత్రమే కలిగి ఉండవచ్చు. అదనంగా మైనర్ పిల్లల పేరుతో మరో పిపిఎఫ్ అకౌంట్ కూడా నిర్వహించేందుకు అనుమతి ఉంది.
అయితే ఒకే బిడ్డ పేరుతో తల్లి, తండ్రి ఇద్దరూ వేర్వేరు పిపిఎఫ్ ఖాతాలు తెరవడానికి అనుమతి లేదు. ఇద్దరు పిల్లలు ఉంటే, తల్లి ఒక బిడ్డ పేరుతో అకౌంట్ ఓపెన్ చేయవచ్చు. తండ్రి మరో బిడ్డ పేరుతో పిపిఎఫ్ ఖాతా ప్రారంభించవచ్చు.
మైనర్ పిపిఎఫ్ ఖాతాలో ఆర్థిక సంవత్సరానికి కనీసం రూ.500 జమ చేయాలి. ఒక ఆర్థిక సంవత్సరంలో గరిష్ఠంగా రూ.1.5 లక్షలు మొత్తం మాత్రమే జమ చేసేందుకు పరిమితి ఉంది. తల్లిదండ్రుల సొంత పిపిఎఫ్ ఖాతా ఉన్నా ఈ గరిష్ఠ పరిమితి మారదు. తల్లిదండ్రుల ఖాతా, మైనర్ పిల్లల ఖాతా కలిపిన జమలు రూ.1.5 లక్షలకు మించకూడదు. ఉదాహరణకు తండ్రి తన పిపిఎఫ్ ఖాతాలో రూ.1 లక్ష జమ చేశారని అనుకుందాం. అదే ఆర్థిక సంవత్సరంలో పిల్లల ఖాతాలో రూ.80,000 జమ చేస్తే మొత్తం రూ.1.8 లక్షలు అవుతుంది. అయితే నిబంధనల ప్రకారం రూ.1.5 లక్షలు మాత్రమే పరిమితిలోకి వస్తాయి. మిగిలిన రూ.30,000పై పిపిఎఫ్ వడ్డీ లేదా పన్ను ప్రయోజనం లభించదు.
పిల్లలకు 18 సంవత్సరాలు పూర్తైన తర్వాత వారి పిపిఎఫ్ అకౌంట్ వారే స్వయంగా నిర్వహించవచ్చు. అయితే ముందుగా అకౌంట్ స్టేటస్ మైనర్ నుంచి మేజర్గా మార్చాలి. దీనికోసం అవసరమైన దరఖాస్తును సంబంధిత సంస్థకు సమర్పించాలి. ప్రక్రియ పూర్తైన తర్వాత పిల్లలు తమ ఖాతాను స్వయంగా నిర్వహించాలి.
పిపిఎఫ్ ఖాతా సాధారణంగా ప్రారంభించిన తేదీ నుంచి 15 సంవత్సరాలకు మెచ్యూర్ అవుతుంది. మెచ్యూరిటీ సమయంలో ఖాతాలో ఉన్న మొత్తాన్ని విత్డ్రా చేసుకోవచ్చు. డబ్బు అవసరం లేకపోతే ఖాతాను మరో ఐదేళ్ల కాలానికి పొడిగించవచ్చు. ఇలా ఐదేళ్ల చొప్పున అకౌంట్ కొనసాగించే అవకాశం ఉంటుంది.
పిపిఎఫ్ అకౌంట్ EEE (ఈఈఈ) పన్ను ప్రయోజనాల కేటగిరీలో ఉంటుంది. పాత పన్ను విధానంలో సెక్షన్ 80C కింద పెట్టుబడులపై మినహాయింపు పొందవచ్చు. ఈ సెక్షన్ కింద సంవత్సరానికి రూ.1.5 లక్షల వరకు మినహాయింపు పొందే అవకాశం ఉంటుంది.
పిపిఎఫ్పై వచ్చే వడ్డీ సాధారణంగా పన్ను నుంచి మినహాయింపు పొందుతుంది. మెచ్యూరిటీ సమయంలో లభించే మొత్తానికి కూడా పన్ను ప్రయోజనం ఉంటుంది.
కొత్త పన్ను విధానంలో సెక్షన్ 80C ప్రయోజనం అందుబాటులో ఉండదు. అందుకే పెట్టుబడి నిర్ణయం తీసుకునే ముందు మీ ట్యాక్స్ సిస్టమ్ పరిశీలించాలి.
ప్రతి నెల క్రమం తప్పకుండా పెట్టుబడి చేస్తే మంచి మొత్తాన్ని కూడబెట్టవచ్చు. ఉదాహరణకు నెలకు రూ.1,000 పెట్టుబడి పెడితే 15 సంవత్సరాల్లో సుమారు రూ.3.18 లక్షలు వరకు లభిస్తుంది. నెలకు రూ.2,000 పెట్టుబడి పెడితే అదే కాలంలో సుమారు రూ.6.37 లక్షలు పొందవచ్చు. అయితే వాస్తవ రాబడి.. ఆ సమయంలో వర్తించే వడ్డీ రేట్లపై ఆధారపడి ఉంటుంది.
Also Read: కుటుంబ సభ్యులకు కూడా ఈ 5 విషయాలు చెప్పకూడదు.. జీవితం సంతోషంగా సాగడానికి చాణక్య సూచనలు
పోస్టాఫీసులు, బ్యాంకుల ద్వారా పిపిఎఫ్ అకౌంట్ ప్రారంభించవచ్చు. మైనర్ పిల్లల తరఫున తల్లిదండ్రులు లేదా చట్టపరమైన సంరక్షకులు అకౌంట్ ఓపెన్ చేయవచ్చు. పెట్టుబడి చేసే ముందు తాజా వడ్డీ రేట్లు, పరిమితులు, పన్ను నిబంధనలను పరిశీలించాలి.
గమనిక: పిపిఎఫ్ వడ్డీ రేట్లు, ప్రభుత్వ నిబంధనలు కాలానుగుణంగా మారవచ్చు. పెట్టుబడి నిర్ణయం తీసుకునే ముందు తాజా అధికారిక సమాచారాన్ని తప్పనిసరిగా పరిశీలించండి.
Share
నేపాల్లో విధ్వంసం.. భారత్కు గుణపాఠం
కొండా కథ ముగిసినట్టేనా..?
