రూ.10 వేల జీతం తీసుకునే ఉద్యోగి.. కట్ చేస్తే ఖాతాలో రూ.10 వేల కోట్లు.. చివరికి ఏమైందంటే!

Rs 10,000 Crore Lien: నెలకు రూ.10 వేల జీతం తీసుకునే సామాన్య యువకుడి బ్యాంకు ఖాతాలో ఏకంగా రూ.10 వేల కోట్లు కనిపిస్తే ఎలా ఉంటుంది? భలే అద్భుతంగా ఉంటుంది కదూ. వినడానికే ఆశ్చర్యంగా ఉన్నా రాజస్థాన్‌లోని సికార్ జిల్లాలో సరిగ్గా ఇలాంటి విచిత్ర ఘటనే చోటుచేసుకుంది. ఓ వ్యక్తి తన ఖాతాను చెక్ చేసుకోగా ఏకంగా రూ.10 వేల కోట్లు అకౌంట్ లో ఉన్నట్లు చూపించింది.

సికార్‌లోని సాలాసర్ బస్ స్టాండ్ సమీపంలో ఉన్న ‘నిర్మల్ మెడికల్ పాయింట్’లో సమీర్ ఖాన్ (22) అనే యువకుడు పనిచేస్తున్నాడు. బుధవారం తన ప్రిపెయిడ్ మొబైల్ రీఛార్జ్ చేసుకునేందుకు బ్యాంకింగ్ యాప్ ఓపెన్ చేసి పిన్ నంబర్ నమోదు చేయగా.. ఖాతాలో జీరో బ్యాలెన్స్ అని చూపించింది. ఏమైందో అర్థంకాక వివరాలు చూడగా.. తన ఖాతాపై ఏకంగా రూ. 10,00,00,00,00,000 (రూ.10 వేల కోట్లు) ‘లీన్’ (Lien) పడినట్లు కనబడింది. అంతేకాకుండా బ్యాంక్ విధించిన ఈ లిమిట్ కారణంగా అతని ఖాతాలోని అసలు సొమ్ము రూ. 55,000 కూడా లాక్ అయిపోయింది. కనీసం సొంత డబ్బులు కూడా వాడుకోలేని పరిస్థితి ఏర్పడింది.

తన బ్యాంక్ ఖాతా పరిస్థితి చూసి కంగారుపడ్డ సమీర్ ఖాన్.. వెంటనే తన యజమాని ధీరజ్ శర్మకు విషయం చెప్పాడు. ఇద్దరూ కలసి సికార్ సైబర్ పోలీస్ స్టేషన్‌కు వెళ్లారు. అక్కడ పోలీసులు వారిని నేరుగా బ్యాంకు అధికారులతో మాట్లాడాల్సిందిగా సూచించారు. దాంతో బ్యాంక్‌ను సంప్రదించగా… సాంకేతిక లోపం వల్ల ఈ సమస్య వచ్చిందని అధికారులు తెలిపారు. బ్యాంకు సిబ్బంది తమ సిస్టమ్‌లోని సాంకేతిక లోపాన్ని సరిచేయడంతో సమీర్ ఖాతా యథాతథ స్థితికి వచ్చింది. అతని అసలు బ్యాలెన్స్ రూ. 55,000 తిరిగి కనిపించడంతో అతను ఊపిరి పీల్చుకున్నాడు.

ఈ సందర్భంగా సమీర్ ఖాన్ మాట్లాడుతూ ‘నా ఖాతాలో అంతకుముందు రూ. 55,000 బ్యాలెన్స్ ఉండేది. కానీ రూ. 10,000 కోట్ల లీన్ పడటంతో నా సొంత డబ్బులను కూడా వాడుకోలేకపోయాను. పోలీసులకు, బ్యాంకుకు సమాచారం ఇవ్వడంతో సమస్య పరిష్కారమైంది’ అని తెలిపాడు. మరోవైపు మెడికల్ షాప్ యజమాని ధీరజ్ శర్మ మాట్లాడుతూ.. ‘సమీర్ జనవరి నుండి నా వద్ద రూ. 10,000 జీతానికి పనిచేస్తున్నాడు. తన అకౌంట్‌లో రూ. 10,000 కోట్ల లీన్ పడిందని చెప్పినప్పుడు నేను షాక్ అయ్యాను. నా జీవితంలో ఇలాంటిది చూడటం ఇదే తొలిసారి’ అని ఆశ్చర్యం వ్యక్తం చేశారు.

Also Read: ఇస్రో మరో సంచలనం.. విజయవంతంగా నింగిలోకి GSLV ఎఫ్18.. ఎన్‌వీఎస్ 03 ఉపగ్రహ ప్రయోగం సక్సెస్!

బ్యాంక్ పరిభాషలో లీన్ అంటే.. ‘హక్కును తాత్కాలికంగా నిలిపివేయడం’ లేదా ‘హామీగా ఉంచుకోవడం’. బ్యాంక్‌కు డబ్బులు బాకీ ఉన్నప్పుడు ఖాతాలో ఉన్న డబ్బును విత్‌డ్రా చేయకుండా, ఇతరులకు పంపకుండా బ్యాంక్ విధించే లాక్ (Lock) ని ‘లీన్’ అంటారు. ఉదాహరణకు ఖాతాలో రూ.50,000 ఉన్నాయనుకుంటే బ్యాంక్ రూ.20,000పై ‘లీన్’ విధించింది అనుకుందాం. అప్పుడు ఖాతాదారుడు మిగిలిన రూ.30,000 మాత్రమే వాడుకునేందుకు వీలుపడుతుంది. పై ఘటనలో ఓ సామాన్య ఉద్యోగికి ఏకంగా రూ.10 వేల కోట్లకు లీన్ విధించడం చర్చకు కారణమైంది.

Also Read: ‘గెలిచే దమ్ములేక.. ఈసీపై నిందలా?’.. రాహుల్, అఖిలేష్‌లకు అమిత్ షా ఓపెన్ ఛాలెంజ్!

Join WhatsApp Channel

Share

• 
• 
• 
• 
• 
•