Mahabubnagar: మహిళ డెడ్ బాడీని రోడ్డు పక్కన వదిలేసిన అంబులెన్స్ డ్రైవర్.. రాష్ట్రంలో దారుణ ఘటన

Mahabubnagar News: మహబూబ్ నగర్, శ్రీశైలం హైవేపై దారుణ ఘటన చోటుచేసుకుంది. ఫర్హాబాద్ చెక్‌పోస్ట్ సమీపంలో ఒక 108 అంబులెన్స్ డ్రైవర్ 29 ఏళ్ల చెంచు మహిళ మృతదేహాన్ని రోడ్డు పక్కన వదిలివేసిన దారుణ ఘటన జరిగింది. ఈ ఘటన స్థానికంగా తీవ్ర కలకలం రేపింది. మృతురాలిని నాగర్‌కర్నూల్ జిల్లా లింగాల్ మండలంలోని అప్పాపూర్ గ్రామ పంచాయతీలోని ఈర్లపెంటకు చెందిన ఎం. గురువమ్మగా గుర్తించారు. దీనికి సంబంధించిన పూర్తి వివరాలు ఇలా ఉన్నాయి.

లింగాల మండలానికి చెందిన గురువమ్మ అనారోగ్యంతో బాధపడుతూ వైద్య కోసం అచ్చంపేట ప్రభుత్వ ఆసుపత్రికి వెళ్లింది. ఆమె ఆరోగ్య పరిస్థితి విషమించడంతో మహబూబ్‌నగర్ జనరల్ ఆసుపత్రికి తరలించారు. అయితే, చికిత్స పొందుతూ గురువమ్మ గురువారం మరణించారు. గురువమ్మ మృతదేహాన్ని అమ్రాబాద్ టైగర్ రిజర్వ్‌లోని ఆమె స్వగ్రామానికి తీసుకెళ్లేందుకు 108 అంబులెన్స్‌లో ఏర్పాటు చేశారు. అయితే, అంబులెన్స్ డ్రైవర్ ఫర్హాబాద్ చెక్‌పోస్ట్ వద్ద మృతదేహాన్ని రోడ్డు పక్కన వదిలివేశారు.

ALSO READ: Hyderabad Skywalk: హైదరాబాద్‌లో మరో రెండు స్కైవాక్ లు.. ఈ ఏరియాల్లో ప్రజల కష్టాలు తీరినట్లే!

వాహనం పాడైన స్థితిలో ఉందని, అడవిలోకి మరింత ముందుకు వెళ్లలేమని చెప్పి డెడ్ బాడీని వదిలి వెళ్లిపోయాడు. ఈ ఘటన కుటుంబ సభ్యులను తీవ్ర ఆవేదనకు గురిచేసింది. వారు ఇంటిగ్రేటెడ్ ట్రైబల్ డెవలప్‌మెంట్ ఏజెన్సీ (ఐటీడీఏ)ని సంప్రదించి సహాయం కోరినప్పటికీ, ఎటువంటి సహకారం అందలేదని వాపోయారు. చివరకు, ఒక ఆటోరిక్షా డ్రైవర్ సహాయంతో మృతదేహాన్ని గ్రామానికి తరలించారు.

ALSO READ: CM Revanth Reddy: హైదరాబాద్ మెట్రో నుంచి ఎల్‌అండ్ టీ తప్పుకోలేదు.. ఇది కేసీఆర్ కుట్ర, సీఎం రేవంత్ సంచలన వ్యాఖ్యలు

ఈ ఘటన చెంచు సముదాయం జీవన పరిస్థితులను, వారు ఎదుర్కొంటున్న సమస్యల గురించి తెలియజేసింది. అమ్రాబాద్ టైగర్ రిజర్వ్‌లో నివసించే చెంచు తెగ వారు అటవీ ప్రాంతాల్లో ప్రాథమిక సౌకర్యాల కొరతతో ఇబ్బందులు ఎదుర్కొంటున్నారు. అంబులెన్స్ సేవలు సక్రమంగా అందకపోవడం, ఐటీడీఏ వంటి సంస్థల నుంచి సకాలంలో సహాయం లభించకపోవడం వంటి సమస్యలు ఈ ఘటనలో స్పష్టంగా కనిపిస్తున్నాయి. ఈ ఘటనపై స్థానికంగా తీవ్ర విమర్శలు వ్యక్తమవుతున్నాయి. అధికారులు ఈ సంఘటనను సీరియస్‌గా పరిగణించి, భవిష్యత్తులో ఇలాంటి ఘటనలు పునరావృతం కాకుండా చర్యలు తీసుకోవాలని కుటుంబ సభ్యులు, స్థానికులు కోరుతున్నారు.

Share

• 
• 
• 
• 
• 
•