Jubilee Hills gold scam: జూబ్లీహిల్స్‌లో బంగారం మోసం.. మార్వాడీ వ్యాపారి ఎగిరిపోయాడు!

Jubilee Hills gold scam: హైదరాబాద్ నగరంలోని హైటెక్ ప్రాంతం జూబ్లీహిల్స్‌లో సంచలనంగా మారిన మోసం కేసు చుట్టూ ఆసక్తికర పరిణామాలు చోటుచేసుకుంటున్నాయి. నగరంలో పాన్ బ్రోకింగ్ వ్యాపారంలో పేరు ప్రఖ్యాతులు పొందిన ముకేష్ జైన్ పాన్ బ్రోకర్స్ యజమాని ముకేష్ జైన్, తన బాబాయ్ బాబూలాల్ జైన్‌లపై ఒక స్థానిక వ్యాపారి గోపాల్ నాయక్ చేసిన ఫిర్యాదు ఇప్పుడు చర్చనీయాంశమైంది.

ఈ మోసం కథనం ఏంటంటే.. శ్రీకృష్ణా నగర్లో నివాసం ఉన్న గోపాల్ నాయక్ కొన్ని ఆర్థిక అవసరాల నిమిత్తం తన రెండు నర తులాల బంగారం (సుమారు 25 గ్రాములు), అర కిలో వెండి ఆభరణాలును తాకట్టు పెట్టారు. గోపాల్ నాయక్ నమ్మకంతోనే ఈ ఆభరణాలను జూబ్లీహిల్స్‌లోని ముకేష్ జైన్ పాన్ బ్రోకర్స్ వద్ద డిపాజిట్ చేశారు. అప్పటి నుంచి వ్యాపారం సవ్యంగా సాగింది. మార్చిలో తన ఆభరణాలను విడిపించుకోవాలని వెళ్లిన గోపాల్ నాయక్‌కు ముకేష్ జైన్ ఒక షాకింగ్ సమాధానం ఇచ్చాడట.

నీ బంగారం, వెండి లాకర్‌లో ఉన్నాయి.. రా, తర్వాత తీసుకెళ్లి పో.. అంటూ కాలయాపన చేయడం మొదలుపెట్టాడు. గోపాల్ నాయక్ అనుమానం వ్యక్తం చేస్తుండగానే, ముకేష్ తన వ్యాపారాన్ని తన బాబాయ్ బాబూలాల్ జైన్ కు అప్పగించి చకచకా అదృశ్యమయ్యాడు. అప్పటి నుంచి గోపాల్ నాయక్ ఎన్నిసార్లు వెళ్లినా బాబూలాల్ జైన్ కూడా లాకర్ నుంచి వస్తువులు తెప్పిస్తాను అంటూ మాటలు ఇస్తూ కాలయాపన చేస్తూనే ఉన్నాడట.

నెలలు గడిచినా ఆభరణాలు తిరిగి రాకపోవడంతో గోపాల్ నాయక్ తనకు మోసం జరిగిందని అర్థమైంది. చివరకు ఆయన జూన్ 24న జూబ్లీహిల్స్ పోలీస్ స్టేషన్‌లో ఫిర్యాదు చేశాడు. పోలీసులను కలిసిన గోపాల్ నాయక్ ముకేష్ జైన్, బాబూలాల్ జైన్‌లపై కఠిన చర్యలు తీసుకోవాలని, తన బంగారం, వెండి ఆభరణాలు వెనక్కి ఇచ్చేలా చూడాలని కోరాడు.

అయితే, గోపాల్ నాయక్ ఆరోపణల ప్రకారం ఇప్పటివరకు పోలీసుల నుండి సరైన స్పందన రాలేదని తెలుస్తోంది. పోలీసులు ఇప్పటికీ కేసు నమోదు చేయలేదు. మాకు న్యాయం జరిగేలా చర్యలు తీసుకోవాలి. లేదంటే ఈ మోసం మరికొందరిపై పునరావృతం అవుతుందని గోపాల్ నాయక్ ఆగ్రహం వ్యక్తం చేశాడు.

స్థానికంగా ఈ ఘటన ఇప్పుడు పెద్ద చర్చనీయాంశమైంది. జూబ్లీహిల్స్, బంజారాహిల్స్ వంటి ప్రముఖ ప్రాంతాల్లో ఉన్న పాన్ బ్రోకింగ్ వ్యాపారాలపై విశ్వాసం ఉంచి ఆభరణాలు తాకట్టు పెట్టే వారి భద్రతపై ప్రశ్నలు తలెత్తుతున్నాయి. స్థానిక వ్యాపార వర్గాలు కూడా ఈ విషయంపై ఆందోళన వ్యక్తం చేస్తున్నాయి.

Also Read: AP Smart cities: 12 నగరాలకు కొత్త రూపం.. అక్కడ కోట్లల్లోనే ఖర్చు!

గోపాల్ నాయక్ ప్రకారం, తాను తాకట్టు పెట్టిన బంగారం, వెండి ఆభరణాలు అప్పటికే ఇతర వ్యాపార లావాదేవీల్లో ముకేష్ జైన్ ఉపయోగించి ఉండవచ్చని అనుమానం వ్యక్తం చేస్తున్నారు. మాకు అవసరమున్న సమయంలో నమ్మకంతో ఇచ్చిన ఆభరణాలు ఇలా ఎగిరిపోతాయని ఊహించలేదు. మా కష్టార్జిత సంపదను తిరిగి ఇచ్చేలా ప్రభుత్వం చర్యలు తీసుకోవాలని ఆయన వేడుకుంటున్నారు.

పోలీసులు మాత్రం ఈ కేసులో అన్ని కోణాల నుండి విచారణ జరుపుతున్నామని చెబుతున్నారు. బాధితుడు గోపాల్ నాయక్ సమర్పించిన రసీదులు, లావాదేవీల రికార్డులు పరిశీలిస్తున్నామని, త్వరలోనే నిందితులపై చట్టపరమైన చర్యలు తీసుకుంటామని స్పష్టం చేస్తున్నారు. అయితే బాధితుడు మాత్రం, కేసు నమోదు ప్రక్రియ ఆలస్యమవుతోందని, తనకు న్యాయం జరుగుతుందా లేదా అన్న భయం వేస్తోందని చెబుతున్నాడు.

నగరంలో ఇలాంటి మోసాలు మొదటిసారి కావు. ఆభరణాలను తాకట్టు పెట్టి రుణాలు తీసుకోవడం సాధారణ విషయం అయినా, నమ్మకద్రోహం జరిగితే ఇబ్బందులు తప్పవు. ఈ ఘటనతో నగరంలో ఆభరణాలను తాకట్టు పెట్టే వారికి జాగ్రత్తలు అవసరమని నిపుణులు సూచిస్తున్నారు. కేవలం వాక్చేతనంతో కాకుండా, అన్ని లావాదేవీలు లిఖితపూర్వక ఒప్పందాలతో ఉండేలా చూసుకోవాలని చెబుతున్నారు.

ప్రస్తుతం ఈ కేసు విచారణ దశలో ఉండగా, గోపాల్ నాయక్ తన ఆభరణాలు తిరిగి దక్కేనా లేదా అన్న సందేహంతో ఆందోళన చెందుతున్నాడు. నగరంలో హాట్ టాపిక్‌గా మారిన ఈ ఘటనపై మరిన్ని వివరాలు వచ్చే రోజుల్లో వెలుగులోకి వచ్చే అవకాశం ఉంది.