Balayya: నందమూరి నట సింహం, హిందూపురం శాసనసభ్యుడు బాలకృష్ణకు భారత ప్రభుత్వం ఇటీవల పద్మభూషణ్ పురస్కారం ప్రకటించిన విషయం తెలిసిందే. ఈ గౌరవంపై బాలకృష్ణ తాజాగా స్పందిస్తూ, ఇది ఆలస్యంగా వచ్చిందని చాలా మంది భావించినా, తనకు మాత్రం సరైన సమయానికే వచ్చిందని వ్యాఖ్యానించారు.
ఈ సందర్భంగా, ఆయన “ఆదిత్య 369” చిత్రం ఏప్రిల్ 4న రీరిలీజ్ కానున్న నేపథ్యంలో హైదరాబాద్లో నిర్వహించిన ప్రీ రిలీజ్ ఈవెంట్లో మాట్లాడారు. బాలకృష్ణ తన స్పీచ్ లో సినిమా, రాజకీయాలు, సేవా కార్యక్రమాల గురించి కొన్ని ఇంటరెస్టింగ్ విషయాలను పంచుకున్నారు. “నేను ఎప్పుడూ అవార్డుల కోసం చూడలేదు, పద్మభూషణ్ రావడం ఆలస్యం అయ్యిందని కొంతమంది అన్నారు. నిజానికి అది సరైన సమయానికే వచ్చిందని నేను భావిస్తున్నాను. 50 ఏళ్ల సినీ ప్రయాణం, మూడు సార్లు ఎమ్మెల్యేగా గెలిచా, ఒటీటీలో అన్-స్టాపబుల్ గా ఉన్నా, బ్యాక్ టు బ్యాక్ సూపర్ హిట్స్ కొడుతున్నా, హాస్పిటల్ చూసుకుంటున్నా… ఇవన్నీ ఆలోచిస్తే పద్మభూషణ్ అవార్డు సరైన సమయానికి వచ్చింది” అని బాలయ్య మాట్లాడాడు.
బాలకృష్ణ తన సినీ ప్రయాణంలో ఎన్నో విభిన్నమైన పాత్రలు పోషించారు. ఒకవైపు సినీ నటుడిగా ప్రేక్షకులను అలరిస్తూనే, మరోవైపు హిందూపురం శాసనసభ్యుడిగా ప్రజలకు సేవలు అందిస్తున్నారు. అంతేకాకుండా, ఓటీటీ వేదికలపై కూడా తనదైన ముద్ర వేస్తూ, కొత్త తరహా ప్రోగ్రామ్లకు అండగా నిలుస్తున్నారు. ఇవి కాకుండా, బసవతారకం ఇండో-అమెరికన్ క్యాన్సర్ ఆసుపత్రి చైర్మన్గా, అనేకమంది రోగులకు అత్యుత్తమ వైద్యం అందించేలా కృషి చేస్తున్నారు.
అన్ని రంగాల్లో తనకున్న బాధ్యతలను నిబద్ధతతో నిర్వర్తిస్తున్న బాలకృష్ణ, “పద్మభూషణ్” అనేది కేవలం ఒక గౌరవమే కాదు, తన బాధ్యతను మరింత పెంచే అవార్డ్ అని తెలిపారు. ప్రజలు, అభిమానులు ఇచ్చే ప్రేమే తనకు నిజమైన పురస్కారం అని పేర్కొన్నారు.
బాలకృష్ణ మాట్లాడుతూ, “ఆదిత్య 369” చిత్రాన్ని రీరిలీజ్ చేయడం తనకు చాలా గర్వకారణమని అన్నారు. ఈ సినిమా 1991లో విడుదలైనప్పటికీ, ఇప్పటికీ అదే కొత్తతనాన్ని, మిస్టరీని కలిగి ఉందని చెప్పుకొచ్చారు. తెలుగు సినీ చరిత్రలో సైన్స్ ఫిక్షన్ జానర్లో వచ్చిన గొప్ప చిత్రాల్లో ఒకటిగా దీనిని గుర్తించారని పేర్కొన్నారు.
“తెలుగు ప్రేక్షకులు ఎప్పుడూ కొత్తదనాన్ని కోరుకుంటారు. అందుకే, ‘ఆదిత్య 369’ లాంటి సినిమా చేయగలిగాం. ఈ తరహా సినిమాలు చేయాలని చాలామంది ప్రయత్నించారు. కానీ కొన్ని కథలుగా మాత్రమే మిగిలిపోయాయి, మరికొన్ని ప్రారంభించకుండానే ఆగిపోయాయి. కొన్ని స్టార్ట్ అయ్యినా, ఈ స్థాయి విజయాన్ని అందుకోలేకపోయాయి” అని బాలకృష్ణ వివరించారు.
ఈ సినిమా టైమ్ ట్రావెల్ కాన్సెప్ట్ను ఆధారంగా చేసుకుని రూపొందించబడింది. ఈ చిత్రాన్ని సింగీతం శ్రీనివాసరావు దర్శకత్వంలో తెరకెక్కించగా, ఇప్పటికీ ఇది తెలుగు ప్రేక్షకులకు చాలా ప్రత్యేకమైన చిత్రంగా నిలిచింది. ఈ రీరిలీజ్ తో, కొత్త తరానికి ఈ సినిమా మరింత నచ్చుతుందని బాలకృష్ణ ఆశాభావం వ్యక్తం చేశారు.
నందమూరి బాలకృష్ణ సినీ రంగం, రాజకీయ రంగం, సేవా కార్యక్రమాల్లో సమానంగా ముందుకు సాగుతున్నారు. పద్మభూషణ్ పురస్కారం తనకు వచ్చినదంటే, అది నాకో గౌరవమే కాదు, మరింత బాధ్యతను మోపినట్లుగా ఉంది అని బాలకృష్ణ చెప్పిన మాటలు చాలా మందికి స్ఫూర్తినిచ్చాయి. ఇక “ఆదిత్య 369” మరోసారి వెండితెరపై సందడి చేయబోతుండటంతో, తెలుగు సినీ ప్రేమికులు ఎప్పుడెప్పుడా అని ఎదురుచూస్తున్నారు.
Share
Monalisa : మోనాలిసాకు షాక్... ఆఫర్ ఇచ్చిన డైరెక్టర్ రే*ప్ కేసులో అరెస్ట్
Today Gold Rate: దమ్ముంటే పట్టుకోండి.. బంగారం @ రూ.1 లక్ష..
