Trump India Tariffs: భారత్‌పై ఏప్రిల్ 2 నుంచే సుంకాలు అమలు.. ట్రంప్‌ టారిఫ్లపై బఫెట్ చురకలు

Trump India Tariffs| అమెరికా అధ్యక్షుడు డొనాల్డ్ ట్రంప్ తన పదవిని చేపట్టిన తర్వాత మొదటిసారిగా కాంగ్రెస్ సంయుక్త సెషన్‌లో ప్రసంగించారు. ఈ సందర్భంగా, తాను పదవిని చేపట్టిన ఆరు వారాల్లో సాధించిన విజయాలు మరియు చేపట్టిన చర్యల గురించి వివరించారు. నాలుగు లేదా ఎనిమిది సంవత్సరాలలో సాధించిన దానికంటే ఈ 43 రోజుల్లోనే ఎక్కువ సాధించానని ట్రంప్ చెప్పారు. ఇది కేవలం ప్రారంభం మాత్రమేనని ఆయన అన్నారు. ఈ ప్రసంగంలో, అమెరికా విధిస్తున్న సుంకాలను గురించి కూడా ట్రంప్ ప్రస్తావించారు. భారత్, చైనా సహా అనేక దేశాలపై ఏప్రిల్ 2 నుంచి ప్రతీకార సుంకాలు విధించబడతాయని ఆయన ప్రకటించారు.

ట్రంప్ మాట్లాడుతూ.. “దశాబ్దాలపాటు మాపై కొన్ని దేశాలు అధిక సుంకాలు విధిస్తున్నాయి. ఇప్పుడు మా సమయం వచ్చింది. సగటున చూస్తే, యూరోపియన్ యూనియన్, చైనా, బ్రెజిల్, భారత్ వంటి దేశాలు మాపై అధిక సుంకాలు విధిస్తున్నాయి. భారత్ మాపై 100% కంటే ఎక్కువ ఆటో సుంకాలు విధించింది. ప్రస్తుత వ్యవస్థలో అమెరికాకు న్యాయం జరగలేదు. అందుకే, ఏప్రిల్ 2 నుంచి మేము కూడా ఆ దేశాలపై ప్రతీకార సుంకాలు విధిస్తాము. వారు ఎంత విధిస్తే, మేము కూడా అంతే విధిస్తాం. ఇది అమెరికాను మరింత సంపన్న దేశంగా మారుస్తుంది. మేము మళ్లీ గొప్ప దేశంగా అవతరిస్తాము. వాస్తవానికి ఏప్రిల్ 1 నుంచే ఈ సుంకాలను అమలు చేయాలనుకున్నాను, కానీ ఏప్రిల్ ఫూల్స్ డేతో పాటు ఈ ప్రకటనను ముడిపెట్టలేదు” అని అన్నారు.

 100 ఎగ్జిక్యూటివ్ ఆర్డర్లపై సంతకాలు
ట్రంప్ తన ప్రసంగంలో, అమెరికాలో భావ వ్యక్తీకరణ స్వేచ్ఛ మళ్లీ పునరుద్ధరించబడిందని పేర్కొన్నారు. జనవరి 20న తన పదవిని చేపట్టిన తర్వాత, గత ఆరు వారాల్లో 100 ఎగ్జిక్యూటివ్ ఆర్డర్లపై సంతకాలు చేశానని తెలిపారు. ఇంకా 400 కార్యనిర్వాహక చర్యలు చేపట్టినట్లు ఆయన వెల్లడించారు. “ఈ ఎన్నికల్లో నా విజయం తప్పనిసరి అనే పరిస్థితి నెలకొంది. దశాబ్దాల్లో ఎన్నడూ చూడని విజయం ఇది. అమెరికా మళ్లీ తన పాత గొప్ప దశకు తిరిగి వస్తోంది. ఇక మేల్కోవాల్సిన అవసరం లేదు” అని ట్రంప్ వ్యాఖ్యానించారు.

Also Read: అమెరికాపై చైనా కౌంటర్ టారిఫ్.. వాణిజ్య యుద్ధంలో ట్రంప్‌నకు ధీటుగా డ్రాగన్!

ట్రంప్ టారిఫ్లపై వారెన్ బఫెట్ హెచ్చరిక:
అమెరికా అధ్యక్షుడు ట్రంప్ తాజా టారిఫ్ నిర్ణయాలపై అగ్రగామి పెట్టుబడిదారుడు (ఇన్‌వెస్ట్‌మెంట్ గురు)  వారెన్ బఫెట్ విమర్శలు చేశారు. కెనడా, మెక్సికో ఉత్పత్తులపై 25%, చైనా వస్తువులపై 10-20% మేరకు కొత్త సుంకాలు విధించిన నేపథ్యంలో బఫెట్ ఒక వార్తా సంస్థకు ఇచ్చిన ఇంటర్వ్యూలో.. “అమెరికా విధిస్తున్న టారిఫ్‌లు ఒక విధంగా యుద్ధ చర్యల్లాంటివే. సుంకాల భారం చివరికి వినియోగదారులపైనే పడుతుంది” అని అన్నారు. అంతర్జాతీయ ఆర్థిక వ్యవస్థపై ప్రభావం చూపే ఈ కఠిన వాణిజ్య విధానాల గురించి 2018, 2019లోనూ బఫెట్ హెచ్చరించారు. అమెరికా ప్రభుత్వం తన ఆర్థిక విధానాల విషయంలో జాగ్రత్తగా ఉండాలని ఆయన సూచించారు. అయితే, అమెరికాలో పెట్టుబడులు పెట్టడానికి పరిస్థితి ఆశావహంగానే ఉందని బఫెట్ పేర్కొన్నారు.

భారత్-అమెరికా వాణిజ్య ఒప్పందం:
భారత్-అమెరికా వాణిజ్య భాగస్వామ్యాన్ని మరింత బలోపేతం చేయాలంటే, టారిఫ్ యేతర అడ్డంకులు మరియు మార్కెట్లోకి ప్రవేశాన్ని ఆలస్యం చేసే నిబంధనలను తొలగించాల్సిన అవసరం ఉందని యూఎస్-ఇండియా వ్యాపార మండలి (యూఎస్‌ఐబీసీ) పేర్కొంది. ఇరు దేశాల మధ్య ఒక వాణిజ్య ఒప్పందం కోసం ప్రాథమిక చర్చలు ప్రారంభమయ్యాయని తెలిపింది. ఇప్పటికే అమెరికా వెళ్లిన భారత వాణిజ్య మంత్రి పీయూష్ గోయల్, ఇరు దేశాల మధ్య వాణిజ్య ఒప్పందం కోసం చర్చలు జరుపుతున్నారు.

Share

• 
• 
• 
• 
• 
•