Ukraine Border Security Promise USA | రష్యాతో మూడేళ్లు యుద్ధం చేస్తున్న ఉక్రెయిన్ అధ్యక్షుడు వ్లోడిమిర్ జెలెన్స్కీ ఇప్పుడు అమెరికా కొత్త అధ్యక్షుడు ట్రంప్ రాకతో చిక్కుల్లో పడ్డారు. ఇన్నాళ్లు యుద్ధంలో తాము అందించిన సాయానికి బదులుగా ట్రంప్ తమకు ఉక్రెయిన్ లోని విలువైన ఖనిజ సంపద కావాలని పట్టుబట్టారు. ఇందుకోసం ఉక్రెయిన్ తో డీల్ చేసుకునేందుకు ప్రయత్నిస్తున్నారు. కానీ జెలెన్స్కీ అందుకు అంత ఈజీగా ఒప్పుకునేలా లేరు. అలా చేయాలంటే అమెరికా తమకు పూర్తి భద్రత భరోసా ఇవ్వాలంటూ చెప్పారు.
మూడేళ్లుగా అమెరికా అందించిన ఆయుధ, ఆర్థిక సహాయానికి కృతజ్ఞతగా, అత్యంత విలువైన, అరుదైన ఖనిజాలను అందించేందుకు సిద్ధమే కానీ.. తమ దేశ రక్షణ, భద్రత విషయంలో అమెరికా అగ్రరాజ్యంగా ముందుండాలని కీలకమైన షరతును జెలెన్స్కీ విధించారు. ఈ షరతుకు అమెరికా ఎంతవరకు అంగీకరిస్తుందో శుక్రవారం స్పష్టమవుతుంది.
శుక్రవారం జెలెన్స్కీ అమెరికాలో పర్యటించి, అమెరికా అధ్యక్షుడు డోనాల్డ్ ట్రంప్తో సమావేశమై విస్తృత స్థాయిలో చర్చలు జరపనున్నారు. ఈ చర్చలు విజయవంతమైతే, కీలకమైన ఖనిజ మరియు ఆర్థిక ఒప్పందంపై సంతకాలు జరగనున్నాయి. అయితే, ఈ ఒప్పందం కుదిరినప్పటికీ, యుద్ధంలో రష్యాకు ఎదురు నిలబడటంలో అమెరికా ఎంతవరకు మద్దతు ఇస్తుందన్న అనుమానాలు జెలెన్స్కీ మనస్సులో ఇప్పటికీ ఉన్నాయి. ఇటీవలే, ఐక్యరాజ్యసమితిలో రష్యాకు వ్యతిరేకంగా తీర్మానానికి మద్దతు తెలిపేందుకు బదులు, రష్యాకు అనుకూలంగా అమెరికా ఓటు వేసిన నేపథ్యంలో, భద్రతా అంశంపై జెలెన్స్కీ పట్టుబడినట్లు తెలుస్తోంది.
Also Read: ఎలాన్ మస్క్‌కు వరుస షాక్ లు.. డొజెలో రాజీనామాలు.. ప్రమాదంలో కెనెడా పౌరసత్వం
మూడేళ్లుగా కొనసాగుతున్న యుద్ధంలో వందల బిలియన్ల డాలర్ల ఆర్థిక మరియు ఆయుధ సహాయం అందిన కారణంగా, ఉక్రెయిన్ తన అరుదైన ఖనిజ సంపదను అమెరికాకు అందించేందుకు సిద్ధంగా ఉంది. ఈ విషయంపై బుధవారం ఉక్రెయిన్ రాజధాని కీవ్లో జెలెన్స్కీ మీడియాతో మాట్లాడారు. “అమెరికాతో ఆర్థిక ఒప్పందం కుదుర్చుకోవడానికి మేం సిద్ధంగా ఉన్నాం. ఈ ఒప్పందం భవిష్యత్తులో మరింత సమగ్ర ఒప్పందానికి దారి తీస్తుంది. ఈ ఒప్పందంలో మా దేశ భద్రతా అంశమే అత్యంత ముఖ్యమైనది. ఈ అంశాన్ని తేల్చుకోవడానికి నేను అమెరికాకు వెళ్లి ట్రంప్తో సమావేశం కానున్నాను. ఖనిజ వనరులపై పాక్షిక హక్కులు ఇవ్వడం మరియు యుద్ధంలో ఆయుధ సహాయం కొనసాగించే అంశాలపై చర్చిస్తాను. అమెరికా యుద్ధంలో మాకు సైనిక సహాయం కొనసాగించాలనుకుంటోందో లేదో తెలుసుకుంటాను. అమెరికా నుండి నేరుగా ఆయుధాలు కొనుగోలు చేయడం గురించి కూడా చర్చిస్తాను. రష్యా యాజమాన్యంలో ఉన్న స్థిరాస్తులు మరియు చరాస్తులను మేం ఆయుధాల కొనుగోలు కోసం ఉపయోగించుకునే అంశాన్ని కూడా ప్రస్తావిస్తాను. ఈ అంశాలన్నీ స్పష్టమైతే, సమగ్ర ఒప్పందంపై సంతకాలు చేస్తాం,” అని జెలెన్స్కీ వివరించారు.
భారీ ఒప్పందం కుదురుతుంది: ట్రంప్
“మూడేళ్ల సహాయానికి ప్రతిఫలంగా విలువైన ఉక్రెయిన్ భూభాగంలోని ఖనిజ సంపద, సహజ వనరులపై వాటా కోరుతున్న ట్రంప్ ఈ ఒప్పందంపై మాట్లాడారు. బుధవారం వాషింగ్టన్‌లో తన మంత్రివర్గం తొలి సమావేశం సందర్భంగా ట్రంప్ మీడియాతో మాట్లాడారు. “జెలెన్స్కీ శుక్రవారం వాషింగ్టన్‌కు వస్తారు. నాతో కలిసి అతిపెద్ద ఒప్పందంపై సంతకాలు చేస్తారు. అమెరికన్లు పన్నుల రూపంలో ప్రభుత్వానికి చెల్లించిన సొమ్మును మేం ఉక్రెయిన్ కోసం యుద్ధంలో సహాయంగా ఖర్చు చేశాం. ఇప్పుడు ఆ సొమ్ము తిరిగి వస్తోంది. ఖనిజాల తవ్వకం ద్వారా అమెరికా లాభం పొందుతుంది. ఉక్రెయిన్‌తో దాదాపు 1 ట్రిలియన్ డాలర్ల విలువైన ఒప్పందం కుదురుతోంది,” అని ట్రంప్ అన్నారు. “నాటోలో సభ్యత్వం కోసం ఉక్రెయిన్ కోరికను వదులుకుంటే మంచిది. నాటో కూటమి కూడా ఈ అంశాన్ని మరచిపోతే బాగుంటుంది,” అని ట్రంప్ తన అభిప్రాయాన్ని తెలిపారు.
ఖరారైన ప్రాథమిక ఒప్పందం
ఇరు దేశాల మధ్య ప్రాథమిక ఒప్పందం దాదాపు ఖరారైందని ఉక్రెయిన్ ప్రధాన మంత్రి డెనిస్ ష్మిహాల్ బుధవారం వెల్లడించారు. “యుద్ధంలో పడిన దెబ్బల కారణంగా ఉక్రెయిన్ పునర్నిర్మాణం, శాంతి మరియు పెట్టుబడుల ప్రాతిపదికన అమెరికాతో ఆర్థిక ఒప్పందం కుదురుస్తున్నాం. ఉక్రెయిన్ పునర్నిర్మాణ ప్రక్రియలో అమెరికా క్రియాశీలక పాత్ర పోషిస్తుందని మేం భావిస్తున్నాం,” అని ఉక్రెయిన్ ప్రభుత్వ టెలివిజన్లో ప్రధాన మంత్రి డెనిస్ ప్రకటించారు.
Share
Cooking Oil: ఒక సారి వాడిన నూనె.. మళ్లీ వాడుతున్నారా ? జాగ్రత్త !
Younis Khan vs Pak Coach: ఆఫ్ఘనిస్తాన్ భయంకరమైన ఆట వెనుక పాకిస్తాన్ ఆటగాడు?
