కంపెనీ చరిత్రలోనే ఇంతకుముందెన్నడూ లేని విధంగా అమెజాన్ సంచలన నిర్ణయం తీసుకునేందుకు సిద్ధమైంది. ఏకంగా 10 వేల మంది ఉద్యోగుల్ని సంస్థ నుంచి తీసేయాలనే ఆలోచనలో ఉన్నారు… అమెజాన్ అధిపతి జెఫ్ బెజోస్. అందులో భాగంగా ఇప్పటికే అమెజాన్ నుంచి ఒప్పంద కార్మికులను తొలగించినట్లు చెబుతున్నారు. ఒప్పందం ముగిసిందని తెలిపే సమాచారాన్ని వర్కర్లకు కూడా కంపెనీ తెలిపిందని అంటున్నారు.
కార్పొరేట్‌, టెక్నాలజీ ఉద్యోగులను ఈ వారం నుంచే తొలగించాలని అమెజాన్ భావిస్తున్నట్లు సమాచారం. ఆర్థిక మందగమనం కారణంగా కొత్త నియామకాలు చేపట్టడాన్ని ఆపేసినట్లు, ఓ ఉన్నతాధికారికి అమెజాన్ పంపిన ఇంటర్నల్ మెమో ద్వారా బయటపడింది. అమెజాన్ రోబోటిక్స్‌ బృందంలో పనిచేస్తున్న వారికి ఇప్పటికే పింక్‌ స్లిప్‌లు కూడా ఇచ్చారని ప్రచారం జరుగుతోంది. ప్రస్తుతం అమెజాన్ రోబోటిక్స్‌ విభాగంలో 3,766 మంది పనిచేస్తుండగా… వీరిలో ఎంత మందిని తీసేశారనేది ఇంకా అధికారికంగా ప్రకటించలేదు. అంతగా లాభాలు రాని విభాగాల సిబ్బందికి కొత్త ఉద్యోగాలు వెతుక్కోవాల్సిందిగా ఇప్పటికే అమెజాన్ చెప్పినట్లు సమాచారం.
సంస్థలోని ఏయే విభాగాల్లో ఉద్యోగుల్ని తీసేయాలో… ఆయా విభాగాలకు సంబంధించిన ఉన్నతాధికారులే నిర్ణయం తీసుకోవాలని జెఫ్ బెజోస్ ఆదేశించినట్లు చెబుతున్నారు. ముఖ్యంగా ఎకో స్మార్ట్ స్పీకర్స్‌, అలెక్సా డిజిటల్ అసిస్టెంట్లకు బాధ్యత వహించే బృందాలు… అమెజాన్ రిటైల్, హెచ్‌ఆర్‌ విభాగాల్లో ఉద్యోగుల తొలగింపు ఉండొచ్చని అంటున్నారు.
ఏడాది కిందటి లెక్కల ప్రకారం ప్రపంచవ్యాప్తంగా అమెజాన్‌లో ఫుల్‌టైమ్, పార్ట్‌టైమ్ ఉద్యోగులు కలిపి మొత్తం 16 లక్షలకు పైగా పని చేస్తున్నారు. ఫెస్టివల్స్, హాలిడే సీజన్లలో డిమాండ్‌కు అనుగుణంగా, భారీ సంఖ్యలో తాత్కాలిక ఉద్యోగుల్ని నియమించుకుంటూ ఉంటుంది… అమెజాన్. కానీ, ఇటీవలి త్రైమాసిక ఫలితాల్లో కంపెనీ ఆదాయం పడిపోవడం… ఆర్థికమాంద్యం కారణంగా సమీప భవిష్యత్తులోనూ ఆదాయం పెరిగే సూచనలు కనిపించకపోవడంతో… భారీగా ఉద్యోగుల్ని తీసేయాలని అమెజాన్ నిర్ణయించుకుందని చెబుతున్నారు.
Share
Burripalem : బుర్రిబాలెంలో విషాద ఛాయలు.. మౌనం పాటించిన విద్యార్ధులు..
Arjuna Awards: తెలుగు తేజాలకు అర్జున అవార్డులు
