Smoothies For Energy: ఈ స్మూతీస్ తాగితే.. రోజంతా ఫుల్ ఎనర్జీ

Smoothies For Energy: రోజువారీ జీవితంలో చురుకుగా, ఉత్సాహంగా ఉండాలంటే సరైన ఆహారం చాలా ముఖ్యం. అన్నిటికంటే ముఖ్యంగా ఉదయం పూట శక్తినిచ్చే ఆహారం తీసుకోవడం వల్ల రోజంతా ఉత్సాహంగా ఉంటాం. దీనికి హై-ప్రొటీన్ స్మూతీలు ఒక అద్భుతమైన మార్గం. ఇవి కేవలం రుచికరంగా ఉండటమే కాకుండా.. పుష్కలంగా పోషకాలను కలిగి ఉంటాయి. రోజంతా ఫుల్ ఎనర్జీతో, యాక్టీవ్ గా ఉండాలంటే ఎలాంటి స్మూతీస్ తాగాలో ఇప్పుడు తెలుసుకుందాం.

1. బనానా & ఆల్మండ్ బటర్ స్మూతీ:
చాలా మంది అరటిపండ, బాదం బటర్‌లతో స్మూతీ తయారు చేసుకుని తాగుతుంటారు. అరటిపండు తక్షణ శక్తిని ఇస్తుంది. బాదం బటర్లో ఉండే ఆరోగ్యకరమైన కొవ్వులు, ప్రొటీన్ ఎక్కువసేపు కడుపు నిండినట్లు అనిపిస్తాయి. ఫలితంగా రోజంతా ఫుల్ ఎనర్జీతో ఉంటాం.

కావాల్సినవి:
ఒక పండిన అరటిపండు
ఒక టేబుల్ స్పూన్ బాదం బటర్
ఒక కప్పు పాలు (ఆవు పాలు లేదా బాదం పాలు)
ఒక టేబుల్ స్పూన్ చియా సీడ్స్

తయారీ:
ఈ పదార్థాలన్నింటినీ బ్లెండర్లో వేసి మెత్తగా అయ్యే వరకు బ్లెండ్ చేయండి. ఇలా తయారు చేసుకున్న ఈ స్మూతీని ఉదయం పూట తాగండి.

2. బెర్రీ & యోగర్ట్ స్మూతీ:
ఈ స్మూతీలో ప్రొటీన్‌తో పాటు యాంటీ ఆక్సిడెంట్లు పుష్కలంగా ఉంటాయి. బెర్రీస్ మీ చర్మ ఆరోగ్యానికి కూడా సహాయపడతాయి.

కావాల్సినవి:
అర కప్పు మిక్స్డ్ బెర్రీస్ (స్ట్రాబెర్రీ, బ్లూబెర్రీ, రాస్ప్బెర్రీ)
అర కప్పు గ్రీక్ యోగర్ట్ (ప్రొటీన్ కోసం)
అర కప్పు పాలు లేదా నీరు
ఒక టేబుల్ స్పూన్ తేనె (రుచికి)

తయారీ:
అన్ని పదార్థాలను బ్లెండర్లో వేసి నురుగులా మారే వరకు బ్లెండ్ చేయండి. తర్వాత తాగండి. దీనిలోని పోషకాలు మీకు అవసరం అయిన శక్తిని అందిస్తాయి.

3. స్పినాచ్ & పీనట్ బటర్ స్మూతీ:
పాలకూర (స్పినాచ్) ఆరోగ్యానికి చాలా మంచిది. దీనిని ఈ స్మూతీలో కలపడం వల్ల ప్రొటీన్‌తో పాటు ఐరన్ కూడా లభిస్తుంది. పీనట్ బటర్ రుచిని పెంచుతుంది.

కావాల్సినవి:
ఒక కప్పు తాజా పాలకూర ఆకులు
ఒక టేబుల్ స్పూన్ పీనట్ బటర్
ఒక అరటిపండు
అర కప్పు పాలు

తయారీ:
ముందుగా పాలకూరను, పాలను బ్లెండ్ చేసి.. తరువాత మిగిలిన పదార్థాలు కలిపి బ్లెండ్ చేయాలి. ఇలా తయారు చేసిన ఈ స్మూతీని ఉదయం పూట తాగడం వల్ల మంచి ఫలితం ఉంటుంది.

4. చాక్లెట్ & ఓట్స్ స్మూతీ:
చాక్లెట్ ప్రియులకు ఇది ఒక అద్భుతమైన ఎంపిక. ఓట్స్ నెమ్మదిగా శక్తిని విడుదల చేస్తాయి. అంతే కాకుండా ఇది మీకు రోజంతా శక్తిని ఇస్తుంది. కోకో పౌడర్ యాంటీఆక్సిడెంట్లతో నిండి ఉంటుంది.

కావాల్సినవి:
ఒక టేబుల్ స్పూన్ ఓట్స్
ఒక టేబుల్ స్పూన్ కోకో పౌడర్
ఒక టేబుల్ స్పూన్ పీనట్ బటర్ లేదా బాదం బటర్
అర కప్పు పాలు
కొద్దిగా తేనె లేదా ఖర్జూర పండు (తియ్యదనం కోసం)

తయారీ:
ముందుగా ఓట్స్‌ని కొంతసేపు నానబెట్టి, తరువాత అన్ని పదార్థాలతో కలిపి బ్లెండ్ చేయాలి.

5. సన్ఫ్లవర్ సీడ్ & మ్యాంగో స్మూతీ:
ఈ స్మూతీ కొంచెం భిన్నంగా.. చాలా రుచికరంగా ఉంటుంది. సన్ఫ్లవర్ సీడ్స్‌లో మంచి కొవ్వులు, ప్రొటీన్ ఉంటాయి. మామిడిపండు రుచిని, పోషకాలను అందిస్తుంది.

కావాల్సినవి:
ఒక కప్పు తాజా మామిడి గుజ్జు
ఒక టేబుల్ స్పూన్ సన్ ఫ్లవర్ సీడ్స్
అర కప్పు పాలు లేదా కొబ్బరి పాలు
కొద్దిగా తేనె

తయారీ:
ఈ పదార్థాలన్నింటినీ ఒక బ్లెండర్లో వేసి.. మెత్తగా అయ్యే వరకు బ్లెండ్ చేయండి. ఉదయం పూట ఈ స్మూతీ క్రమం తప్పకుండా తాగడం వల్ల మంచి ఫలితం ఉంటుంది.

ఈ స్మూతీలను రోజూ ఉదయం అల్పాహారంగా తీసుకోవడం వల్ల మీ శరీరానికి అవసరమైన ప్రొటీన్, ఇతర పోషకాలు అందుతాయి. వీటిని తయారు చేయడం చాలా సులభం, కేవలం ఐదు నిమిషాలలో సిద్ధం చేసుకోవచ్చు. వీటితో మీరు రోజంతా ఉత్సాహంగా, ఆరోగ్యంగా ఉండగలుగుతారు.