Kids Height Yogasanas| పిల్లలు పెరుగుతున్న కొద్దీ వారి ఎత్తుపై తల్లిదండ్రుల దృష్టి ఎక్కువగా ఉంటుంది. తమ పిల్లలు వయసుకు తగిన విధంగా ఎదగాలని ప్రతి తల్లిదండ్రి కోరుకుంటారు. ఎత్తు విషయంలో జన్యుపరమైన అంశాలు ప్రధాన పాత్ర పోషిస్తాయి. అయితే మంచి ఆహారం, తగిన నిద్ర, శారీరక వ్యాయామం పిల్లల ఆరోగ్యకరమైన ఎదుగుదలకు సహాయపడతాయి. యోగా నేరుగా పిల్లల శరీరంలో జన్యుపరమైన ఎత్తు లేదా ఇతర మార్పులు చేయదు. అయితే కొన్ని ఆసనాలు శరీర సౌలభ్యం, భంగిమ, సమతుల్యతను మెరుగుపరచడంలో సహాయపడతాయి.
ఫిట్నెస్ ట్రైనర్, ఫిజియోథెరపిస్ట్ డాక్టర్ ధరణా ఆర్య సూచించిన 5 ఆసనాలను పిల్లల దినచర్యలో చేర్చండి. పిల్లలు యోగా చేసేటప్పుడు.. ఎలాంటి కదలికను బలవంతంగా చేయకుండా, తమకు సౌకర్యంగా ఉన్నంత వరకు మాత్రమే చేయాలి.
తాడాసన వాక్ పిల్లల శరీరాన్ని సాగదీయడంతో పాటు సమతుల్యతను మెరుగుపరచడంలో సహాయపడుతుంది. ముందుగా పిల్లలను నిటారుగా నిలబెట్టాలి. తర్వాత రెండు చేతులను తలపైకి ఎత్తి, మడమలను పైకి లేపాలి. ఈ స్థితిలో శరీరానికి మంచి స్ట్రెచ్ లభిస్తుంది. అదే భంగిమను కొనసాగిస్తూ నెమ్మదిగా నడవాలి. పిల్లలు తమ సౌకర్యాన్ని బట్టి 5 నుంచి పది నిమిషాలు చేయవచ్చు.
హస్తపాదాసనం.. వెన్ను, కాళ్ల కండరాలకు మృదువైన స్ట్రెచ్ అందిస్తుంది. ముందుగా నిటారుగా నిలబడి, ఆపై నెమ్మదిగా ముందుకు వంగాలి. చేతులను పాదాల వైపు తీసుకెళ్లేందుకు ప్రయత్నించాలి. అయితే పాదాలను తాకాలని పిల్లలను బలవంతం చేయకూడదు. సౌకర్యంగా ఉన్నంత వరకు మాత్రమే ముందుకు వంగాలి. సుమారు 15 సెకన్లు ఈ భంగిమలో ఉండి, తిరిగి సాధారణ స్థితికి రావాలి. ఈ ఆసనాన్ని మూడు సార్లు చేయవచ్చు.
పశ్చిమోత్తానాసనం చేయడానికి పిల్లలను నేలపై కూర్చోబెట్టాలి. రెండు కాళ్లను ముందుకు నిటారుగా ఉంచాలి. తర్వాత నెమ్మదిగా ముందుకు వంగి, చేతులను పాదాల వైపు తీసుకెళ్లాలి. శరీరాన్ని ఎలాంటి ఒత్తిడి లేకుండా సౌకర్యంగా మాత్రమే వంచాలి. ఈ భంగిమను 10 నుంచి 15 సెకన్లు కొనసాగించవచ్చు. తర్వాత నెమ్మదిగా సాధారణ స్థితికి రావాలి.
ఈ ప్రక్రియను మూడు సార్లు చేయవచ్చు.
సేతుబంధాసనం కోసం ముందుగా పిల్లలను వెనుక భాగంపై పడుకోబెట్టాలి. మోకాళ్లను వంచి, పాదాలను నేలపై ఉంచాలి. తర్వాత నెమ్మదిగా నడుమును పైకి లేపాలి. భుజాలు, పాదాలు స్థిరంగా ఉండేలా చూసుకోవాలి. ఈ స్థితిలో 15 నుంచి 20 సెకన్లు ఉండవచ్చు. తర్వాత నెమ్మదిగా నడుమును కిందకు దించాలి. ఈ ఆసనాన్ని నాలుగు సార్లు చేయవచ్చు.
Also Read: భోజనం కంటే చాక్లెట్స్, ఐస్క్రీమ్స్, చిప్స్ ఎక్కువగా తినాలనిపిస్తోందా? ఇందుకు ఇవే కారణాలు
భుజంగాసనం చేయడానికి పిల్లలను బోర్లా పడుకోబెట్టాలి. రెండు చేతులను శరీరానికి దగ్గరగా నేలపై ఉంచాలి. చేతుల సహాయంతో ఛాతీని నెమ్మదిగా పైకి లేపాలి. కొంతసేపు ఈ భంగిమలో ఉండి, మళ్లీ సాధారణ స్థితికి రావాలి. ఈ ఆసనాన్ని పిల్లల సౌకర్యాన్ని బట్టి చేయించాలి. సూచించిన విధంగా 25 నుంచి 30 సార్లు చేయవచ్చు. అయితే ఎక్కువసార్లు చేయాలని పిల్లలను బలవంతం చేయకూడదు.
యోగా మాత్రమే పిల్లల ఎత్తును పెంచుతుందని చెప్పలేం. పిల్లల తుది ఎత్తును నిర్ణయించడంలో జన్యుపరమైన అంశాలు ప్రధాన పాత్ర పోషిస్తాయి. అదే సమయంలో సమతుల్యమైన ఆహారం, తగినంత నిద్ర, క్రమమైన శారీరక శ్రమ అవసరం. పిల్లల ఎదుగుదలను క్రమం తప్పకుండా గమనించడం కూడా ముఖ్యం. వయసుకు తగ్గట్టుగా ఎదుగుదల కనిపించకపోతే పిల్లల వైద్యుడిని సంప్రదించాలి.
ఈ సమాచారం సాధారణ అవగాహన కోసం మాత్రమే. ఇది వైద్యుల సలహాకు ప్రత్యామ్నాయం కాదు. పిల్లలకు ఏదైనా ఆరోగ్య సమస్య ఉంటే యోగా ప్రారంభించే ముందు వైద్యుడిని సంప్రదించాలి. వ్యాయామం సమయంలో నొప్పి, తల తిరగడం లేదా శ్వాస తీసుకోవడంలో ఇబ్బంది ఉంటే వెంటనే ఆపాలి.
Also Read: ఇంట్లో తిరిగే బల్లి విషపూరితమా? కరిస్తే ఈ జాగ్రత్తలు పాటించాలి
Share
నాని కెరీర్లోనే బిగ్ రిలీజ్.. ‘ది ప్యారడైజ్’ బాక్సాఫీస్ లెక్కలు ఇవే!
