ఉదయం సమయం చాలా కుటుంబాల్లో హడావిడిగా ఉంటుంది. ముఖ్యంగా స్కూల్కు వెళ్లే చిన్న పిల్లలు ఉన్న ఇళ్లలో ఈ పరిస్థితి ఎక్కువగా కనిపిస్తుంది. పిల్లలను నిద్రలేపడం, రెడీ చేయడం, టిఫిన్ పెట్టడం, స్కూల్ బస్ వరకు పంపించడం వంటి పనులు తల్లిదండ్రులకు ఒత్తిడితో కూడుకున్న పనులు. అయితే కొన్ని చిన్న అలవాట్లు మార్చుకుంటే ఉదయపు సమయాన్ని ప్రశాంతంగా మార్చుకోవచ్చు.
ఉదయం వేళ ఈ హడావుడి, తొందరపాటును తగ్గించాలంటే ముందుగానే ప్లానింగ్ చేయడం అవసరం. అందుకే కొన్ని పనులను రాత్రే పూర్తి చేయడం మంచిది. పిల్లల స్కూల్ యూనిఫాం, షూస్, సాక్స్ వంటి వస్తువులను ఒకేచోట సిద్ధంగా ఉంచండి. స్కూల్ టైమ్టేబుల్ ప్రకారం బ్యాగ్ను కూడా రాత్రే సర్దేయండి. టిఫిన్, స్నాక్స్ కోసం ఏం తయారు చేయాలో ముందుగానే నిర్ణయించుకోండి. వీలైతే కొన్ని పదార్థాలను కూడా ముందే సిద్ధం చేసుకోండి. ఇలా చేస్తే ఉదయం చాలా సమయం ఆదా అవుతుంది.
చాలా మంది పిల్లలు నిద్ర పూర్తికాకపోవడం వల్ల ఉదయం లేవడానికి ఇష్టపడరు. దీంతో ఇంట్లో చిరాకు వాతావరణం ఏర్పడుతుంది. పిల్లలు ప్రతిరోజూ ఒకే సమయంలో నిద్రపోయేలా చూడాలి. సరిపడా నిద్రపోతే వారు ఉదయం ఉత్సాహంగా లేస్తారు. అలాగే తల్లిదండ్రులు కూడా పిల్లల కంటే కొంత ముందే లేవడం మంచిది. దీంతో తమ పనులను ప్రశాంతంగా పూర్తి చేసుకునే అవకాశం ఉంటుంది.
పిల్లలు ఒక క్రమంలో పనులు చేయడం లాంటి అలవాట్లు త్వరగా నేర్చుకుంటారు. అందుకే ప్రతి రోజు ఒకే రకమైన రొటీన్ను పాటించడం మంచిది. మొదట లేవడం, తర్వాత పళ్లు బ్రష్ చేయడం, స్నానం చేయడం, యూనిఫాం ధరించడం, చివరగా టిఫిన్ చేయడం వంటి క్రమాన్ని నిర్ణయించండి. ఇలా ప్రతిరోజూ ఒకే విధంగా చేస్తే పిల్లలకు గందరగోళం ఉండదు. కొంతకాలానికి వారు చెప్పకుండానే పనులు పూర్తి చేయడం ప్రారంభిస్తారు.
ఉదయం ఆలస్యం అవుతోందని పిల్లలపై అరవడం సరైన పద్ధతి కాదు. అలా చేస్తే వారి మూడ్ చెడిపోతుంది. పిల్లలను ప్రేమగా నిద్రలేపేందుకు ప్రయత్నించండి. చిరునవ్వుతో, ముద్దు పెట్టి లేదా మృదువుగా మాట్లాడి లేపండి. వారి ఇష్టమైన పాటను కూడా వినిపించవచ్చు. మంచి ప్రారంభం వారి రోజంతా సానుకూలంగా ఉండేందుకు సహాయపడుతుంది.
Also Read: మీకు తెలియకుండానే మీ శరీరంలో ఎనర్జీ తగ్గిపోతోందా? ఈ రోజువారీ అలవాట్లే కారణం
చాలా మంది తల్లిదండ్రులు పిల్లల పనులన్నీ తామే చేస్తుంటారు. అయితే ఇది పిల్లల్లో స్వతంత్రతను తగ్గిస్తుంది. వారి వయసుకు తగిన చిన్న బాధ్యతలను అప్పగించండి. షూస్ వేసుకోవడం, లంచ్ బాక్స్ బ్యాగ్లో పెట్టడం వంటి పనులను వారినే చేయనివ్వండి. మొదట్లో కొంచెం నెమ్మదిగా చేసినా ఓర్పుగా ఉండాలి. క్రమంగా వారు వేగంగా, బాధ్యతగా పనులు చేయడం నేర్చుకుంటారు.
ఉదయం ప్రశాంతంగా సాగితే.. తల్లిదండ్రులు, పిల్లలు ఇద్దరూ చురుకుగా ఉంటారు. ఇంట్లో అనవసర వాదనలు తగ్గుతాయి. పిల్లలు కూడా మంచి మూడ్తో స్కూల్కు వెళ్తారు. దీంతో చదువుపై దృష్టి మరింత మెరుగవుతుంది. తల్లిదండ్రులు కూడా తక్కువ ఒత్తిడిని అనుభవిస్తారు. కుటుంబంతో సంతోషంగా గడిపే సమయం పెరుగుతుంది.
పిల్లలకు స్కూల్ కోసం రెడీ చేయడం ఒక ఎమర్జెన్సీలా చేసే పనికాదు. ముందస్తు ప్రణాళిక, సరైన నిద్ర, ప్రేమతో వ్యవహారించడం, చిన్న బాధ్యతలు పిల్లలకు అప్పగించడం వల్ల ఉదయపు హడావుడి తగ్గుతుంది.
Share
'మనం' తర్వాత మళ్లీ అఖిల్ కోసమే ...నాగార్జున ఎమోషనల్ కామెంట్స్!
పాడె మోసిన రషీద్ ఖాన్, మహ్మద్ నబీ..కన్నీళ్లు ఆపుకోలేరు
