Vitamin D: విటమిన్ డి అనేది శరీరానికి అత్యవసరమైన ఒక కీలక పోషకం. ఇది శరీరంలో కాల్షియం, ఫాస్పరస్ శోషణకు సహాయపడుతుంది. తద్వారా ఎముకల ఆరోగ్యాన్ని కూడా కాపాడుతుంది. అంతేకాకుండా.. ఇది రోగనిరోధక శక్తిని బలోపేతం చేయడంలో.. కండరాల పనితీరులో, నాడీ వ్యవస్థ ఆరోగ్యంలో కూడా కీలక పాత్ర పోషిస్తుంది. సూర్యరశ్మికి గురికావడం ద్వారా శరీరం సహజంగా విటమిన్ డిని ఉత్పత్తి చేస్తుంది. కొన్ని ఆహార పదార్థాలలో (చేపలు, గుడ్డు పచ్చసొన) కూడా ఇది లభిస్తుంది, లేదా సప్లిమెంట్ల ద్వారా కూడా తీసుకోవచ్చు.
మహిళల్లో విటమిన్ డి లోపం చాలా సాధారణం. ముఖ్యంగా వయస్సు పెరిగే కొద్దీ.. లేదా సరైన సూర్యరశ్మి అందనప్పుడు ఈ సమస్య ఎక్కువగా కనిపిస్తుంది. విటమిన్ డి లోపం ఉన్నప్పుడు కనిపించే కొన్ని ముఖ్యమైన లక్షణాలను గురించి ఇప్పుడు తెలుసుకుందాం.
1. అలసట, నీరసం:
విటమిన్ డి లోపం యొక్క అత్యంత సాధారణ లక్షణాలలో ఒకటి నిరంతర అలసట లేదా నీరసం. తగినంత నిద్ర ఉన్నప్పటికీ.. రోజంతా అలసటగా అనిపించడం లేదా శక్తి లేకపోవడం వంటివి విటమిన్ డి లోపం యొక్క సాధారణ లక్షణం.
2. ఎముకలు, కండరాల నొప్పి:
విటమిన్ డి లోపం ఎముకల ఆరోగ్యంపై తీవ్ర ప్రభావం చూపుతుంది. ఇది ఎముకలను బలహీనపరిచి.. నొప్పికి దారితీస్తుంది. ముఖ్యంగా నడుము నొప్పి, కీళ్ల నొప్పులు, కండరాల బలహీనత లేదా నొప్పి వంటివి మహిళల్లో సాధారణంగా కనిపిస్తాయి. ఈ సమస్యలు తీవ్రమైన సందర్భాలలో, ఆస్టియోమలాసియా (ఎముకల మెత్తబడటం) లేదా ఆస్టియోపొరోసిస్ (బోలు ఎముకల వ్యాధి) వంటి సమస్యలకు దారితీసే ప్రమాదం కూడా ఉంటుంది.
3. తరచుగా ఇన్ఫెక్షన్లు:
విటమిన్ డి రోగ నిరోధక వ్యవస్థ పనితీరుకు చాలా అవసరం. దీని లోపం వల్ల శరీరం అంటువ్యాధులతో పోరాడే సామర్థ్యం తగ్గుతుంది. తద్వారా తరచుగా జలుబు, ఫ్లూ, ఇతర ఇన్ఫెక్షన్లు వస్తూ ఉంటాయి.
4. మూడ్ స్వింగ్స్, డిప్రెషన్:
విటమిన్ డి మెదడులోని సెరోటోనిన్ అనే హార్మోన్ను నియంత్రించడంలో సహాయపడుతుంది.అంతే కాకుండా ఇది మానసిక స్థితిని ప్రభావితం చేస్తుంది. దీని లోపం మహిళల్లో మూడ్ స్వింగ్స్, చిరాకు, ఆందోళన, డిప్రెషన్ లక్షణాలకు దారితీయవచ్చు.
5. జుట్టు రాలడం:
విటమిన్ డి లోపం ఉన్న కొందరు మహిళల్లో అధికంగా జుట్టు రాలడం వంటివి కూడా గమనించవచ్చు. జుట్టు కుదుళ్లను ఉత్తేజపరచడంలో విటమిన్ డి పాత్ర కూడా ఎక్కువగానే ఉంటుంది. దీని లోపం జుట్టు పెరుగుదలను ప్రభావితం చేస్తుంది.
6. గాయాలు నయం కాకపోవడం :
విటమిన్ డి శరీరంలో వాపును తగ్గించడంలో అంతే కాకుండా గాయాలను నయం చేయడంలో ముఖ్యమైనది. ఈ లోపం ఉన్నప్పుడు, గాయాలు లేదా దెబ్బలు నయం కావడానికి సాధారణం కంటే ఎక్కువ సమయం పడుతుంది.
7. బరువు పెరగడం:
విటమిన్ డి లోపం ఉన్నవారిలో బరువు పెరిగే అవకాశం ఉందని కొన్ని అధ్యయనాలు సూచిస్తున్నాయి. ఇది జీవక్రియను ప్రభావితం చేయవచ్చు. ఫలితంగా బరువు పెరిగేందుకు ఎక్కువగా అవకాశాలు ఉంటాయి.
Also Read: డైలీ 20 నిమిషాలు నడిస్తే.. ఆశ్చర్యపోయే లాభాలు !
8. పీరియడ్స్ సమస్యలు:
కొంతమంది మహిళల్లో విటమిన్ డి లోపం వల్ల క్రమరహిత పీరియడ్స్ లేదా ప్రీమెన్స్ట్రువల్ సిండ్రోమ్ (PMS) లక్షణాలు తీవ్రతరం కావచ్చు. అందుకే ఇలాంటి లక్షణాలు కనిపించినప్పుడు నిర్లక్ష్యం చేయడకుండా ఉంటే మంచిది.
పైన పేర్కొన్న లక్షణాలు ఏవైనా కనిపించినట్లయితే.. విటమిన్ డి స్థాయిలను చెక్ చేయడానికి డాక్టర్ను సంప్రదించడం ముఖ్యం. సరైన పరీక్షల ద్వారా లోపాన్ని గుర్తించి,.. అవసరమైన సప్లిమెంట్లు లేదా జీవనశైలి మార్పుల ద్వారా దీనిని సరిదిద్దుకోవచ్చు. సూర్యరశ్మికి తగినంత సమయం గురికావడం, విటమిన్ డి అధికంగా ఉండే ఆహారాలు తీసుకోవడం, అవసరమైతే సప్లిమెంట్లు వాడటం ద్వారా విటమిన్ డి స్థాయిలను ఆరోగ్యకరంగా ఉంచుకోవచ్చు.
Share
War 2: తెలుగు రాష్ట్రాలలో వార్ 2 ప్రీ రిలీజ్ ఈవెంట్ కి సర్వం సిద్ధం.. ఎప్పుడంటే?
Operation Sindoor: ఆపరేషన్ సిందూర్పై చర్చకు రంగం సిద్ధం
