Mangoes For Heart Disease: మామిడి పళ్లతో బిపి, గుండె జబ్బులకు చెక్.. రోజూ ఎన్ని తినాలంటే?

Mangoes For Heart Disease| ప్రపంచవ్యాప్తంగా ప్రతి సంవత్సరం సుమారు 2.5 కోట్ల మంది మహిళలు.. 45 నుండి 55 సంవత్సరాల మధ్య మెనోపాజ్‌ను అనుభవిస్తారు. ఈ సహజ దశలో ఋతుచక్రం ఆగిపోతుంది. మెనోపాజ్ తర్వాత, కనీసం 12 నెలలు ఋతుస్రావం లేని సమయాన్ని పోస్ట్-మెనోపాజ్ అంటారు. ఈ సమయంలో మహిళల్లో స్థూలకాయం, డిప్రెషన్, ఎముకల సన్నబడటం, గుండె జబ్బులు వచ్చే ప్రమాదం పెరుగుతుంది. ఈస్ట్రోజన్ స్థాయిలు తగ్గడం వల్ల రక్తపోటు, కొలెస్ట్రాల్ స్థాయిలు పెరిగి గుండె, జీవక్రియ ఆరోగ్యం ప్రభావితమవుతుందని నిపుణులు చెబుతున్నారు.

జర్నల్ ఆఫ్ అమెరికన్ న్యూట్రిషన్ అసోసియేషన్‌లో ప్రచురితమైన ఒక కొత్త అధ్యయనం ప్రకారం.. రోజూ రెండు సార్లు మామిడి పళ్లు తినడం వల్ల పోస్ట్-మెనోపాజ్‌లో మహిళల గుండె ఆరోగ్యం మెరుగవుతుంది. ఈ పళ్లు రక్తపోటును.. “చెడు” కొలెస్ట్రాల్ స్థాయిలను తగ్గిస్తాయి. ఈ అధ్యయనానికి నేషనల్ మాంగో బోర్డ్ నుండి గ్రాంట్ లభించింది. అంతేకాకుండా, మామిడి పళ్లు తినడం వల్ల రక్తంలో చక్కెర స్థాయిలు తక్కువగా పెరిగి, కొన్ని గంటల్లోనే త్వరగా తగ్గిపోతాయని, తెల్ల బ్రెడ్‌తో పోలిస్తే ఇది మెరుగైన ఫలితమని పరిశోధకులు కనుగొన్నారు.

మామిడి పళ్లు ఎందుకు?

ఈ అధ్యయనం కోసం 50 నుండి 70 సంవత్సరాల మధ్య వయస్సు గల.. అధిక బరువు లేదా స్థూలకాయం ఉన్న 24 మహిళలను ఎంపిక చేశారు. రెండు వారాల పాటు వారు రోజూ సుమారు 1.5 కప్పుల మామిడి పళ్లు తిన్నారు. వారి రక్తపోటు, కొలెస్ట్రాల్, ఇతర శరీర కొలతలను రోజుకు రెండు సార్లు రికార్డ్ చేశారు. కాలిఫోర్నియా యూనివర్సిటీ, డేవిస్‌లోని న్యూట్రిషన్ విభాగంలో అసోసియేట్ పరిశోధకురాలు రోబెర్టా హోల్ట్ మాట్లాడుతూ.. “మామిడి పళ్లలో ఫైబర్, యాంటీఆక్సిడెంట్లు, గుండె ఆరోగ్యాన్ని పెంపొందించే బయోయాక్టివ్ పదార్థాలు ఉంటాయి. అందుకే వీటిని ఎంచుకున్నాము” అని చెప్పారు. గత అధ్యయనాలు కూడా మామిడి తినడం వల్ల రక్తపోటు, కొలెస్ట్రాల్ నిర్వహణలో సానుకూల ప్రభావం చూపిందని రోబెర్టా హోల్ట్ తెలిపారు.

చెడు కొలెస్ట్రాల్ ని తగ్గించే మామిడి పళ్లు

అధ్యయనం ముగిసిన తర్వాత.. మామిడి పళ్లు తిన్న రెండు గంటల్లో పాల్గొనేవారి సిస్టోలిక్ రక్తపోటు 6 పాయింట్లు తగ్గింది, సగటు ఆర్టీరియల్ ప్రెషర్ 2.3 mmHG తగ్గింది. ఈ ఫలితాలు మామిడి పళ్లు “చెడు” కొలెస్ట్రాల్ (LDL) స్థాయిలను తగ్గించడంలో, రక్తపోటును నియంత్రించడంలో సహాయపడతాయని సూచిస్తున్నాయి. మామిడిలోని ఫైబర్ జీర్ణవ్యవస్థను మెరుగుపరచడంతో పాటు, యాంటీఆక్సిడెంట్లు శరీరంలోని ఫ్రీ రాడికల్స్‌ను ఎదుర్కొంటాయి, ఇవి గుండె ఆరోగ్యానికి మేలు చేస్తాయి.

Also Read: మహిళల్లో పెరుగుతున్న గుండె పోటు కేసులు.. కారణాలు ఇవే.. ఈ జాగ్రత్తలు పాటించాలి!

రోజూ రెండు సార్లు మామిడి పళ్లు తినడం వల్ల పోస్ట్-మెనోపాజ్‌లో మహిళల గుండె ఆరోగ్యం మెరుగవుతుందని ఈ అధ్యయనం చూపిస్తోంది. రక్తపోటు, కొలెస్ట్రాల్ స్థాయిలను తగ్గించడంతో పాటు, మామిడి పళ్లు రక్తంలో చక్కెర స్థాయిలను నియంత్రించడంలో కూడా సహాయపడతాయి. ఈ సులభమైన ఆహార అలవాటుతో మహిళలు గుండె జబ్బుల నుండి రక్షణ పొందుతూ.. మెరుగైన ఆరోగ్యాన్ని కాపాడుకోవచ్చు. మామిడి పళ్లను రోజువారీ ఆహారంలో చేర్చడం ద్వారా గుండె ఆరోగ్యాన్ని పెంపొందించుకోవచ్చు.