ఫేస్ క్రీమ్ లేదా సన్‌స్క్రీన్ ముందుగా ఏది పూసుకోవాలి? చర్మ సంరక్షణ కోసం సరైన విధానం ఇదే

అందంగా కనిపించాలని ప్రతి ఒక్కరూ భావిస్తారు. అందుకే ఈ రోజుల్లో చాలా మంది ఆరోగ్యకరమైన చర్మం కోసం స్కిన్‌కేర్ జాగ్రత్తలు పాటిస్తున్నారు. ప్రస్తుతం చాలామంది చర్మాన్ని ఆరోగ్యంగా మరియు మెరిసేలా ఉంచేందుకు మాయిశ్చరైజర్, ఫేస్ క్రీమ్, సన్‌స్క్రీన్ ఉపయోగిస్తున్నారు. అయితే ఈ ఉత్పత్తులను ఏ క్రమంలో ఉపయోగించాలో చాలామందికి సందేహాలు ఉంటాయి. సరైన పద్ధతిలో స్కిన్ కేర్ ప్రొడక్ట్స్ వాడితే వాటి ప్రయోజనాలు మెరుగ్గా లభిస్తాయి.

స్కిన్ కేర్ రొటీన్ ఎప్పుడూ ముఖాన్ని శుభ్రం చేయడం ద్వారా ప్రారంభించాలి. ఇందుకోసం మైల్డ్ ఫేస్ వాష్ ఉపయోగించాలి. ఇది ముఖంపై పేరుకున్న దుమ్ము, చెమట, అదనపు నూనె తొలగిస్తుంది. శుభ్రమైన చర్మంపై ఉపయోగించే ఉత్పత్తులు మెరుగ్గా పనిచేస్తాయి. అయితే ఎక్కువ కెమికల్స్ ఉన్న క్లెన్సర్లు వాడటం వల్ల చర్మంలోని సహజ తేమ తగ్గే అవకాశం ఉంటుంది.

ముఖం శుభ్రం చేసిన తర్వాత మాయిశ్చరైజర్ లేదా క్రీమ్ అప్లై చేయాలి

ముఖం కడిగిన తర్వాత మీ చర్మ రకానికి సరిపోయే మాయిశ్చరైజర్ లేదా ఫేస్ క్రీమ్ ఉపయోగించాలి. పొడి చర్మం ఉన్నవారు ఎక్కువ తేమ కోసం మాయిశ్చరైజర్‌ ఎంచుకోవాలి. ఇది చర్మాన్ని మృదువుగా ఉంచుతుంది. ఆయిలీ స్కిన్ ఉన్నవారు తేలికైన లేదా జెల్ ఆధారిత మాయిశ్చరైజర్ ఉపయోగించడం మంచిది. మాయిశ్చరైజర్ రాసిన తర్వాత కొన్ని నిమిషాలు వేచి ఉండాలి. దీనివల్ల అది చర్మంలో పూర్తిగా కలిసిపోతుంది.

సన్‌స్క్రీన్‌ ఎప్పుడూ చివరిగా ఉపయోగించాలి

చర్మ నిపుణుల ప్రకారం.. మాయిశ్చరైజర్ తర్వాత సన్‌స్క్రీన్ అప్లై చేయాలి. సన్‌స్క్రీన్ చర్మంపై రక్షణ పొరను తయారు చేస్తుంది. ఇది సూర్యుడి నుంచి వచ్చే హానికరమైన యూవీ కిరణాల నుంచి చర్మాన్ని కాపాడుతుంది. సూర్యరశ్మి ఎక్కువగా తగిలితే చర్మం ట్యాన్ అవ్వడం, ముందుగానే వృద్ధాప్య లక్షణాలు కనిపించడం వంటి సమస్యలు రావచ్చు. సన్‌స్క్రీన్ తర్వాత మరో క్రీమ్ రాస్తే దాని రక్షణ ప్రభావం తగ్గవచ్చు. అందుకే పగటి సమయంలో సన్‌స్క్రీన్‌ను చివరి దశగా ఉంచాలి.

సరైన రక్షణ కోసం మంచి సన్‌స్క్రీన్ ఎంచుకోవాలి

రోజువారీ ఉపయోగం కోసం ఎసిపిఎఫ్ 30 లేదా అంతకంటే ఎక్కువ ఉన్న బ్రాడ్ స్పెక్ట్రమ్ సన్‌స్క్రీన్ ఎంచుకోవడం మంచిది. ఇది యువిఏ, యువిబి కిరణాల నుంచి చర్మాన్ని రక్షించడంలో సహాయపడుతుంది. ఎక్కువ సమయం బయట గడిపేవారు ప్రతి రెండు లేదా మూడు గంటలకు ఒకసారి సన్‌స్క్రీన్ మళ్లీ రాయాలి. చెమట వచ్చిన తర్వాత లేదా ముఖం కడిగిన తర్వాత కూడా సన్‌స్క్రీన్ తిరిగి అప్లై చేయాలి.

Also Read: దోమలను చంపేందుకు కొత్త దోమలు.. 6 లక్షల స్పెషల్ దోమలు విడుదల

మేకప్‌కు ముందు కూడా సరైన స్కిన్ కేర్ పద్ధతిని పాటించాలి

మేకప్ ఉపయోగించే వారు ముందుగా ముఖాన్ని శుభ్రం చేసుకోవాలి. తర్వాత మాయిశ్చరైజర్ రాసి, ఆపై సన్‌స్క్రీన్ అప్లై చేయాలి. కొన్ని నిమిషాల తర్వాత ప్రైమర్, మేకప్ వేసుకోవాలి. ఈ పద్ధతి చర్మాన్ని రక్షించడంతో పాటు మేకప్ ఎక్కువసేపు ఉండేలా చేస్తుంది.

మంచి చర్మం కోసం సరైన అలవాట్లు పాటించాలి

ఆరోగ్యకరమైన చర్మం కోసం ఖరీదైన ఉత్పత్తులు మాత్రమే అవసరం లేదు. వాటిని సరైన విధంగా ఉపయోగించడం కూడా చాలా ముఖ్యం. ముందుగా ముఖాన్ని శుభ్రం చేయాలి. తర్వాత మాయిశ్చరైజర్ లేదా క్రీమ్ రాయాలి. చివరగా సన్‌స్క్రీన్ ఉపయోగించాలి. ఈ సులభమైన విధానం చర్మాన్ని మృదువుగా, తేమగా, సూర్యరశ్మి నుంచి రక్షితంగా ఉంచడంలో సహాయపడుతుంది.

Also Read: నెలకు రూ.10 లక్షల వరకు జీతం.. ప్రపంచమంతా తిరిగిరావొచ్చు.. ఇంటర్మీడియట్ ఉంటే చాలు