మన రోజువారీ జీవనశైలిలో ఉదయం చేసే పనులు ఆరోగ్యంపై కీలక ప్రభావం చూపుతాయి. మంచి అలవాట్లు గుండెను ఆరోగ్యంగా ఉంచుతాయి. అయితే కొన్ని చెడు అలవాట్లు నెమ్మదిగా గుండె ఆరోగ్యాన్ని దెబ్బతీసే ప్రమాదం ఉంది. అందుకే గుండెను కాపాడుకోవాలంటే ఈ అలవాట్లను గుర్తించి మార్చుకోవడం చాలా అవసరం.
చాలామంది అలారం మోగగానే వెంటనే మంచం నుంచి లేచి నిలబడతారు. ఇది గుండెపై అనవసర ఒత్తిడిని కలిగించవచ్చు. నిద్రలో ఉన్న శరీరం ఒక్కసారిగా చురుకుగా మారే సమయంలో రక్తపోటులో మార్పులు రావచ్చు. గుండె వేగం కూడా పెరిగే అవకాశం ఉంటుంది. కాబట్టి నిద్రలేవగానే కొన్ని నిమిషాలు మంచంపైనే కూర్చోవాలి. చేతులు, కాళ్లు కొద్దిగా స్ట్రెచ్ చేయాలి. ఆ తర్వాత నెమ్మదిగా లేవాలి. ఇలా చేయడం వల్ల రక్తప్రసరణ క్రమంగా, సవ్యంగా జరుగుతుంది.
చాలామంది ఉదయం లేవగానే టీ లేదా కాఫీ తాగడం అలవాటుగా చేసుకుంటారు. కానీ ఖాళీ కడుపుతో కెఫీన్ తీసుకోవడం ఆరోగ్యానికి మంచిది కాదు. ఇలా చేయడం వల్ల గుండె వేగంగా కొట్టుకునే అవకాశం ఉంటుంది. కొందరిలో రక్తపోటు కూడా పెరుగుతుంది. అలాగే గ్యాస్ట్రిక్ సమస్యలు, అసిడిటీ వంటి ఇబ్బందులు రావచ్చు. ఉదయం ముందుగా ఒకటి లేదా రెండు గ్లాసుల నీరు తాగడం మంచిది. ఆ తర్వాత అల్పాహారంతో పాటు టీ లేదా కాఫీ తీసుకోవచ్చు.
అల్పాహారం రోజులో అత్యంత ముఖ్యమైన భోజనం. ఇది శరీరానికి శక్తిని అందిస్తుంది. కొందరు సమయం లేక అల్పాహారం మానేస్తారు. మరికొందరు ఎక్కువ నూనె, వేయించిన పదార్థాలు తీసుకుంటారు.
అల్పాహారం మానేయడం వల్ల జీవక్రియ మందగిస్తుంది. దీంతో బరువు పెరిగే అవకాశం ఉంటుంది. అలాగే అధిక కొలెస్ట్రాల్ సమస్యలు కూడా తలెత్తవచ్చు. పండ్లు, ఓట్స్, కోడి గుడ్లు, బాదం, వాల్ నట్స్, హోల్ గ్రెయిన్స్‌తో కూడిన అల్పాహారం లేదా టిఫిన్ తీసుకోవడం బెస్ట్.
ఉదయం లేవగానే పని ఒత్తిడి లేదా ఇతర విషయాల గురించి ఎక్కువగా ఆలోచించడం గుండె ఆరోగ్యాన్ని దెబ్బతీస్తుంది. ఒత్తిడి సమయంలో శరీరంలో కొన్ని హార్మోన్లు విడుదలవుతాయి. ఇవి గుండె వేగాన్ని, రక్తపోటును పెంచుతాయి. దీర్ఘకాలంలో గుండెపై ప్రతికూల ప్రభావం చూపుతాయి. అందుకే ఉదయం ప్రశాంతంగా ఉండేందుకు ప్రయత్నించాలి. కొద్దిసేపు ధ్యానం లేదా లోతైన శ్వాస వ్యాయామాలు చేయడం మంచిది.
Also Read: అంతంత మాత్రమే పెరుగుతన్న నెలజీతాలు.. మధ్యతరగతికి దూరమవుతున్న సొంత ఇంటి కల
రాత్రంతా విశ్రాంతి తీసుకున్న తర్వాత శరీరానికి కొంత కదలిక అవసరం. కానీ చాలామంది ఉదయం ఎలాంటి వ్యాయామం చేయకుండా కూర్చుంటారు. శారీరక కదలికలు లేకపోతే రక్తప్రసరణ మందగిస్తుంది. దీంతో గుండె ఎక్కువ శ్రమ చేయాల్సి వస్తుంది. రోజూ 20 నుంచి 30 నిమిషాల పాటు నడక, యోగా లేదా స్ట్రెచింగ్ చేయడం వల్ల గుండె ఆరోగ్యం మెరుగుపడుతుంది.
గుండె ఆరోగ్యం మన రోజువారీ అలవాట్లపై ఆధారపడి ఉంటుంది. చిన్న చిన్న తప్పులు కూడా కాలక్రమేణా పెద్ద సమస్యలకు దారితీయవచ్చు. నెమ్మదిగా లేవడం, నీరు బాగా తాగడం, ఆరోగ్యకరమైన టిఫిన్ తీసుకోవడం, ఒత్తిడిని తగ్గించడం, వ్యాయామం చేయడం వంటి అలవాట్లు గుండెను ఆరోగ్యంగా ఉంచుతాయి.
Also Read: చికెన్, మటన్ ఇష్టంగా తింటున్నారా? ఆ వెంటనే ఈ ఫుడ్స్ తింటే జీర్ణక్రియ సమస్యలు
Share
పోలీసు ఉద్యోగాల నోటిఫికేషన్! సర్కార్ మెడపై కత్తి.. ప్రతిపక్షం చేతికి అస్త్రం!
నిండు గర్భిణిని సొంత భర్తే చంపే స్పైన్ చిల్లింగ్ మలయాళం థ్రిల్లర్
