మీ జీవితాన్ని నడిపించేది ఎవరు? భగవద్గీతలో శ్రీకృష్ణుడు చెప్పిన సమాధానం ఇదే

Three Gunas in Bhagavad Gita| కొన్నిసార్లు మనసు ప్రశాంతంగా ఉంటుంది. మరికొన్నిసార్లు కోరికలు, ఆశలు మనల్ని వెంటాడుతుంటాయి. ఇంకొన్ని సందర్భాల్లో ఏ పని చేయాలన్నా బద్ధకం ఆవరిస్తుంది. అసలు మన ఆలోచనలు, నిర్ణయాలు, ప్రవర్తనను ప్రభావితం చేసేది ఏమిటి? భగవద్గీతలో శ్రీకృష్ణుడు మూడు శ్లోకాల ద్వారా దీనికి ఆధ్యాత్మిక వివరణ ఇచ్చారు. ఆ శ్లోకాల అర్థాలు, వాటి వెనుక ఉన్న సందేశాలను తెలుసుకుందాం. ప్రకృతిలోని మూడు గుణాలు ప్రతి జీవిని ప్రభావితం చేస్తాయి.

శ్లోకం:

సత్త్వం రజస్తమ ఇతి గుణాః ప్రకృతిసంభవాః।
నిబధ్నంతి మహాబాహో దేహే దేహినమవ్యయమ్॥

అర్థం:

శ్రీకృష్ణ పరమాత్ముడు అర్జునుడితో ప్రకృతి నుంచి సత్వ, రజో, తమో అనే మూడు గుణాలు పుడతాయని వెల్లడించారు. ఈ మూడు గుణాలు శాశ్వత ఆత్మను తాత్కాలిక శరీరంతో బంధిస్తాయని వివరించారు.

ఈ శ్లోకం సందేశం ఏమిటంటే?

ఈ మూడు గుణాలు మన ఆలోచనలు, భావాలు, ప్రవర్తనపై ప్రభావం చూపుతాయి. సంతోషం, బాధ వంటి అనుభవాలపై మన స్పందనను కూడా ఇవి ప్రభావితం చేస్తాయి. ఈ అనుభవాలపై మమకారం పెరిగితే మనిషి భౌతిక ప్రపంచానికి మరింతగా బంధించబడతాడని గీత బోధిస్తుంది. పరమాత్మ ప్రకృతిలో సృష్టికి బీజం వేస్తారని శ్రీకృష్ణుడు చెబుతారు.

శ్లోకం:

మమ యోనిర్మహద్బ్రహ్మ తస్మిన్ గర్భం దధామ్యహమ్।
సంభవః సర్వభూతానాం తతో భవతి భారత॥

అర్థం:

భగవాన్ శ్రీకృష్ణుడు ప్రకృతిని సమస్త జీవుల పుట్టుకకు ఆధారంగా వివరించారు. అందులో తాను చైతన్యరూపమైన బీజాన్ని ఉంచుతానని చెప్పారు. ఈ కలయిక వల్లే సమస్త జీవుల ఉత్పత్తి జరుగుతుందని వివరించారు.

ఈ శ్లోకం ద్వారా లభించే సందేశం ఇదే

ప్రకృతి సృష్టికి గర్భం వంటిది. పరమాత్మ అందులో చైతన్య బీజాన్ని స్థాపిస్తారు. ఈ బోధన ప్రకృతి, దైవ చైతన్యం మధ్య ఉన్న సంబంధాన్ని వివరిస్తుంది. సత్వగుణం జ్ఞానం, సంతోషంపై మమకారాన్ని పెంచవచ్చు.

శ్లోకం:

తత్ర సత్త్వం నిర్మలత్వాత్ ప్రకాశకమనామయమ్।
సుఖసంగేన బధ్నాతి జ్ఞానసంగేన చానఘ॥

Also Read: కోపం వస్తే దాన్ని అణుచుకోకూడదు.. మన:శాంతి కోసం ఓషో చెప్పిన ఈ 4 విషయాలు పాటించండి

అర్థం:

సత్వగుణం స్వచ్ఛమైనది, జ్ఞానాన్ని వెలిగించేది, బాధలు లేనిదని శ్రీకృష్ణుడు వివరించారు. అయితే సుఖం, జ్ఞానంపై ఆసక్తి ద్వారా కూడా ఇది మనిషిని బంధిస్తుంది.

ఈ శ్లోకం సందేశం ఏమిటంటే?

సత్వగుణం మనిషిలో ప్రశాంతత, జ్ఞానం, మంచి ఆలోచనలను పెంచుతుంది. అయితే తన జ్ఞానం, మంచి పనులు, సంతోషం పట్ల అహంకారం లేదా మమకారం ఏర్పడితే అది కూడా బంధనంగా మారుతుంది. అందువల్ల మంచి లక్షణాలపైనా అతిగా ఆసక్తి పెంచుకోకూడదని ఈ శ్లోకం సూచిస్తుంది.

Also Read: తగ్గేదెలే.. ఈ 5 రాశుల్లో పుట్టినవారు చివరి నిమిషం దాకా పోరాడుతారు

మూడు గుణాల గురించి భగవద్గీత మనకు ఏం చెబుతోంది?

సత్వగుణం స్వచ్ఛత, రజోగుణం కోరికలు, చురుకుదనం, తమోగుణం అజ్ఞానం, బద్ధకాన్ని సూచిస్తాయి. ఈ మూడు గుణాలు మన ఆలోచనలు, ప్రవర్తనను ప్రభావితం చేస్తాయని గీత వివరిస్తుంది. వాటిని అర్థం చేసుకోవడం ద్వారా మనలోని మమకారాలను గుర్తించి, ఆధ్యాత్మిక అవగాహన పెంచుకోవచ్చని ఈ బోధనలు సూచిస్తున్నాయి.

Join WhatsApp Channel

Share

• 
• 
• 
• 
• 
•