వర్షాకాలంలో ఈ దుస్తులు అసలు ధరించకూడదు.. దురద, అలర్జీకి ఇవే కారణం

ఎండాకాలంలో వేడి వల్ల చాలా ఇబ్బందికరంగా ఉంటుంది. వర్షాకాలం రాగానే ఎంతో చల్లగా, రిలీఫ్‌గా ఉంటుంది. అయితే ఈ సీజన్ గాలిలో తేమ ఎక్కువగా ఉంటుంది. దీంతో చెమట, చర్మంపై తడి ఎక్కువసేపు ఉండే అవకాశం ఉంటుంది. తప్పుడు రకమైన దుస్తులు ధరిస్తే చర్మంపై దురద, దద్దుర్లు, అలర్జీలు వంటి సమస్యలు వచ్చే ప్రమాదం పెరుగుతుంది. అందువల్ల వర్షాకాలంలో దుస్తుల ఎంపికపై ప్రత్యేక శ్రద్ధ అవసరం.

హెవీ డ్రెస్‌లు దూరంగా పెట్టాలి

వర్షాకాలంలో గాలిలో తేమ అధికంగా ఉంటుంది. ఈ పరిస్థితుల్లో ఫంగల్ ఇన్ఫెక్షన్లు త్వరగా వ్యాపిస్తాయి. దుస్తులు తడిగా ఉండటం లేదా చెమటను ఎక్కువసేపు పట్టి ఉంచడం వల్ల చర్మంలో ఇర్రిటేషన్ (చికాకు)గా ఉంటుంది. అందుకే కొన్ని ప్రత్యేకమైన వస్త్రాలను ఈ కాలంలో ధరించకుండా ఉండటం మంచిది.

1. డెనిమ్ దుస్తులు

డెనిమ్ జీన్స్, జాకెట్లు, షర్ట్లు వర్షాకాలంలో ఎక్కువగా ఉపయోగించకపోవడం మంచిది. ఈ వస్త్రాలు నీటిని ఎక్కువగా పీల్చుకుంటాయి. ఒకసారి తడిస్తే అవి బరువుగా మారుతాయి. పైగా త్వరగా ఆరవు. తడిగా ఉన్న డెనిమ్ దుస్తులు చర్మానికి అసౌకర్యం కలిగించి దురదకు కారణం కావచ్చు.

2. వెల్వెట్ దుస్తులు

వెల్వెట్ వస్త్రాలు మందంగా ఉంటాయి. ఇవి నీరు, చెమటను సులభంగా పీల్చుకుంటాయి. ఈ కారణంగా శరీరానికి సరైన గాలి అందదు. ఫలితంగా చర్మంపై దద్దుర్లు, మంట, దురద వంటి సమస్యలు రావచ్చు.

3. సిల్క్ దుస్తులు

సిల్క్ దుస్తులు అందంగా కనిపించినా వర్షాకాలానికి అనుకూలం కావు. వర్షపు నీరు పడితే సిల్క్‌పై మచ్చలు ఏర్పడే అవకాశం ఉంటుంది. దీంతో దుస్తుల అందం తగ్గిపోతుంది. అందువల్ల వర్షపు రోజులలో సిల్క్ చీరలు లేదా డ్రెస్సులు ధరించకుండా ఉండటం మంచిది.

4. షిఫాన్ దుస్తులు

షిఫాన్ వస్త్రాలు చాలా సున్నితంగా ఉంటాయి. ఇవి తడిస్తే రంగు వెలిసే ప్రమాదం ఉంటుంది. అలాగే ఈ దుస్తులు వేసుకున్న తరువాత జారిపోతుంటాయి. వీటిని క్యారీ చేయడం కూడా కష్టంగా మారుతుంది. అందువల్ల వర్షాకాలంలో వీటిని తగ్గించడం మంచిది.

5. లెదర్ దుస్తులు

లెదర్ జాకెట్లు, ప్యాంట్లు లేదా స్కర్ట్లు వర్షాకాలంలో త్వరగా పాడయ్యే అవకాశం ఉంటుంది. నీటి కారణంగా లెదర్ నాణ్యత తగ్గిపోతుంది. కొన్నిసార్లు పగుళ్లు కూడా ఏర్పడవచ్చు.

Also Read: వర్షాకాలంలో బట్టల నుంచి దుర్వాసన వస్తోందా? ఈ సింపుల్ చిట్కాలతో సమస్యకు చెక్

వర్షాకాలంలో ఎలాంటి దుస్తులు ధరించాలి?

తేలికపాటి, గాలి సులభంగా వెళ్లే దుస్తులను ఎంచుకోవాలి. త్వరగా ఆరిపోయే ఫ్యాబ్రిక్‌లు మంచి ఎంపికగా ఉంటాయి. లూజ్‌గా ఉండే దుస్తులు శరీరానికి గాలి అందేలా చేస్తాయి. దీంతో చర్మం పొడిగా ఉండడంతో ఇన్ఫెక్షన్ల ప్రమాదం తగ్గుతుంది.

వర్షాకాలంలో సరైన దుస్తులు ధరించడం ఆరోగ్యానికి చాలా ముఖ్యం. డెనిమ్, వెల్వెట్, సిల్క్, షిఫాన్, లెదర్ వంటి వస్త్రాలను వీలైనంత వరకు నివారించాలి. తేలికపాటి, త్వరగా ఆరిపోయే దుస్తులు ధరిస్తే చర్మ అలర్జీలు, దురద, ఇతర సమస్యల నుంచి రక్షణ పొందవచ్చు.