తెల్ల జుట్టు ఆరోగ్యానికి మంచిదే.. ఆ ప్రమాదకర వ్యాధి నుంచి రక్షణకు సూచన

White Hair Prevents Cancer| చాలామంది తెల్ల జుట్టు వయసు పెరగడం లేదా ఒత్తిడి వల్ల వస్తుందని భావిస్తారు. అయితే తాజా పరిశోధన మరో ఆసక్తికరమైన విషయాన్ని వెల్లడించింది. శరీరంలోని కొన్ని కణాలు క్యాన్సర్ ప్రమాదాన్ని తగ్గించేందుకు చేసే రక్షణ చర్యల ఫలితంగా కూడా జుట్టు తెల్లబడే అవకాశం ఉందని శాస్త్రవేత్తలు చెబుతున్నారు. ఈ పరిశోధన ప్రస్తుతం ఎలుకలపై మాత్రమే జరిగింది.

జుట్టుకు నలుపు లేదా తెలుపు రంగు ఎలా వస్తుంది?

మన జుట్టుకు మెలనోసైట్స్ అనే కణాల నుంచి కలర్ వస్తుంది. ఈ కణాలను నిరంతరం తయారు చేసే మెలనోసైట్ స్టెమ్ సెల్స్ వెంట్రుకల కుదుళ్లలో ఉంటాయి. ఇవి కొత్త రంగు కణాలను ఉత్పత్తి చేస్తూ జుట్టు సహజ రంగును చాలా సంవత్సరాల పాటు నిలబెడతాయి.

డీఎన్‌ఏ దెబ్బతింటే ఏం జరుగుతుంది?

సూర్యకిరణాలు, కాలుష్యం, రసాయనాలు, అలాగే శరీరంలోని సహజ జీవక్రియల వల్ల కణాల డీఎన్‌ఏ దెబ్బతినవచ్చు. అప్పుడు మెలనోసైట్ స్టెమ్ సెల్స్ శాశ్వతంగా మార్పు చెంది తమ పనిని ఆపేస్తాయి. దీంతో కొత్త రంగు కణాలు తయారుకావు. ఫలితంగా జుట్టు క్రమంగా తెలుపు లేదా బూడిద రంగులోకి మారుతుంది.

ఈ విధంగా దెబ్బతిన్న కణాలను శరీరం తొలగిస్తుంది. ఈ దెబ్బతిన్న కణాల వల్ల క్యాన్సర్ లాంటి ప్రాణాంతక వ్యాధి వస్తుంది. శరీరం వీటిని తొలగించడం వల్ల భవిష్యత్తులో అవి క్యాన్సర్‌గా మారే అవకాశాన్ని తగ్గించే ప్రయత్నం చేస్తుందని, ఈ కోణంలో చూస్తే జుట్టు తెల్లబడడం ఆరోగ్యానికి మేలు చేస్తుందని పరిశోధకులు భావిస్తున్నారు.

రక్షణ వ్యవస్థ ఎప్పుడు విఫలమవుతుంది?

పరిశోధనలో ఎలుకలను యువి కిరణాలు, క్యాన్సర్‌కు కారణమయ్యే రసాయనాలకు గురిచేశారు. ఈ పరిస్థితిలో దెబ్బతిన్న కణాలు నశించకుండా మరింతగా పెరుగుతూ విభజించాయి. దీంతో మెలనోమా అనే ప్రమాదకరమైన చర్మ క్యాన్సర్ వచ్చే అవకాశం పెరిగింది.

ఆయుర్వేదం ఏమి చెబుతోంది?

వృద్ధాప్యం రాక ముందే జుట్టు తెల్లబడడాన్ని ఆయుర్వేదంలో “పాలిత్య” అని అంటారు. పిత్త దోషం పెరగడం, ఓజస్ తగ్గిపోవడం, అధిక ఒత్తిడి, సరైన ఆహారం తీసుకోకపోవడం వంటి కారణాలు దీనికి దారితీస్తాయని చెబుతుంది. ఈ సమయంలో శరీరం బయట అందం కంటే లోపలి ఆరోగ్యాన్ని కాపాడటానికి ఎక్కువ ప్రాధాన్యం ఇస్తుందని ఆయుర్వేదంలో వివరించబడింది.

జుట్టు ఆరోగ్యంగా ఉండాలంటే ఏం చేయాలి?

దోసకాయ, పండ్లు, పాలు, నెయ్యి వంటి చల్లదనాన్ని ఇచ్చే ఆహారాలను తీసుకోవాలి. ఎక్కువ మసాలా, అధిక కాఫీ, రాత్రి ఆలస్యంగా మేల్కొని ఉండడం తగ్గించాలి. ప్రతిరోజూ అనులోమ విలోమం, శీతలి వంటి ప్రాణాయామాలు చేయాలి. తగినంత నిద్రపోవడం, ఆరోగ్యకరమైన జీవనశైలిని పాటించడం కూడా ఎంతో ముఖ్యం.

Also Read: రోజంతా పనిచేసి అలసిపోయారా? కేవలం 15 నిమిషాల్లో డిన్నర్ రెడీ చేసే 5 రెసిపీలు ఇవిగో

ఇంకా మరిన్ని అధ్యయనాలు అవసరం

ఈ పరిశోధన ఇప్పటివరకు ఎలుకలపై మాత్రమే జరిగింది. మనుషులలో కూడా ఇదే విధంగా జరుగుతుందా అనే విషయాన్ని నిర్ధారించేందుకు మరిన్ని పరిశోధనలు అవసరం. తెల్ల జుట్టు ఉన్న ప్రతి వ్యక్తికి క్యాన్సర్ రాదని లేదా క్యాన్సర్ నుంచి రక్షణ లభిస్తుందని చెప్పలేము. జన్యు లక్షణాలు, జీవనశైలి, పర్యావరణం వంటి అనేక అంశాలు క్యాన్సర్ ప్రమాదాన్ని ప్రభావితం చేస్తాయి.

తెల్ల జుట్టును కేవలం వయసు పెరిగిందనే సంకేతంగా మాత్రమే చూడాల్సిన అవసరం లేదు. కొన్ని సందర్భాల్లో అది శరీరం దెబ్బతిన్న కణాలను తొలగించి తనను తాను రక్షించుకునే సహజ ప్రక్రియలో భాగంగా ఉండవచ్చని తాజా పరిశోధన సూచిస్తోంది. అయితే ఈ విషయాన్ని పూర్తిగా నిర్ధారించేందుకు మనుషులపై మరింత పరిశోధన అవసరం.

Also Read: నెలకు రూ.10 లక్షల వరకు జీతం.. ప్రపంచమంతా తిరిగిరావొచ్చు.. ఇంటర్మీడియట్ ఉంటే చాలు