ఆధ్యాత్మికత కాదు.. దేవుడిని పూజించేటప్పుడు కళ్లు మూసుకోవడం వెనుకున్న పక్కా సైన్స్ ఇదే!

Psychology Of Prayer: సాధారణంగా ప్రార్థన అనగానే మనకు వెంటనే గుర్తుకువచ్చే దృశ్యం.. రెండు చేతులు జోడించి, తల స్వల్పంగా వంచి, కళ్లు మూసుకుని దైవాన్ని ప్రార్థించడం. చిన్నతనం నుంచి పెద్దలను చూస్తూ మనం కూడా అలవాటు చేసుకున్న ఈ పద్ధతి కేవలం ఒక సంప్రదాయం మాత్రమే కాదు. దీని వెనుక మనస్తత్వశాస్త్రం, ఆధ్యాత్మికత, ఏకాగ్రతకు సంబంధించిన ఎన్నో ఆసక్తికరమైన కారణాలు ఉన్నాయి.

కళ్లు మూసుకున్న వెంటనే మన చుట్టూ ఉన్న దృశ్యాలు కనుమరుగై, మన దృష్టి క్రమంగా అంతర్ముఖంగా మారుతుంది. దీంతో బయట ప్రపంచం నుంచి మనసును కొంతసేపు దూరంగా ఉంచి, ప్రార్థనపై పూర్తిగా దృష్టి పెట్టడం సులభమవుతుంది. అందుకే పూజలు, ధ్యానం లేదా ప్రార్థనల సమయంలో కళ్లు మూసుకోవడం ప్రపంచంలోని అనేక సంస్కృతుల్లో సహజంగా కనిపించే ఆచారంగా మారింది. అయితే అసలు కళ్లు మూసుకోవడం వల్ల మన మనసులో ఏం జరుగుతుంది? దీనివల్ల ఏకాగ్రత ఎలా పెరుగుతుంది? ఆధ్యాత్మికంగా దీని వెనుక ఉన్న అర్థం ఏమిటి? వంటి వివరాలు ఇప్పుడు తెలుసుకుందాం..

ఏకాగ్రత పెరుగుతుంది..

కళ్లు తెరచి ఉన్నప్పుడు మన మైండ్ నిమిషానికి ఎన్నో విషయాలను గమనిస్తుంది. కాంతి, మనుషుల కదలికలు వంటివి మన దృష్టిని పక్కకు మళ్లిస్తాయి. అందుకే కళ్లు మూసుకున్నప్పుడు ఈ బాహ్య దృశ్యాల తాకిడి తగ్గి, మనసు వెంటనే ప్రశాంతపడుతుంది. దీనివల్ల మనం చెప్పే ప్రార్థన లేదా అనుకునే ఆలోచనలపై పూర్తి శ్రద్ధ పెట్టడం చాలా తేలికవుతుంది.

అహంకారం విడనాడడం..

కళ్లు మూసుకోవడం అనేది ఒక రకమైన శరణాగతికి సంకేతం. మనకంటే గొప్పదైన దైవిక శక్తి ముందు మనం ఏమీ కాదనే వినయాన్ని ఇది తెలియజేస్తుంది. బయటి ప్రపంచాన్ని చూడటం ఆపి, దేవుని ముందు మనల్ని మనం సమర్పించుకోవడానికి ఇది తోడ్పడుతుంది. పైగా ఇతరులు మనల్ని ఎలా చూస్తున్నారనే ఆలోచన కూడా పోయి, మనసు నిర్మలంగా మారుతుంది.

Also Read: ఉదయాన్నే పిల్లలకు ఈ టిఫిన్స్ తినిపిస్తే రోజంతా చురుగ్గా, ఆరోగ్యంగా ఉంటారు!

మానసిక ప్రశాంతత, గోప్యత..

ప్రార్థన అనేది ప్రతి ఒక్కరికీ చాలా వ్యక్తిగతమైన విషయం. మనలోని బాధలు, ఆశలు, కోరికలు దేవుడితో చెప్పుకునేటప్పుడు కొంచెం ప్రైవసీ కావాలి. గుడిలో లేదా గుంపులో ఉన్నా సరే, కళ్లు మూసుకోగానే మనకోసం ఒక చిన్న ప్రశాంత వాతావరణం ఏర్పడుతుంది. ఇది మనలో దాగున్న భావాలను ఎలాంటి భయం లేకుండా బయటకు తీసుకురావడానికి సహాయపడుతుంది.

కళ్లముందు దైవ రూపం..

ధ్యానం లేదా పూజ చేసే సమయంలో మన మనసులో దేవుడి రూపాన్ని, పవిత్రమైన కాంతిని ఊహించుకుంటాం. కళ్లు మూసుకున్నప్పుడే ఈ దృశ్యాలను స్పష్టంగా ఊహించడం సాధ్యమవుతుంది. బయటి దృశ్యాలు కనపడకపోవడం వల్ల ఆధ్యాత్మిక భావనలు మరింత బలంగా, లోతుగా అనిపిస్తాయి.

సహజ స్వభావం..

చిన్నప్పటి నుంచి పెద్దలను చూసి నేర్చుకోవడం వల్ల ఇది ఒక అలవాటుగా మారుతుంది. అయితే కేవలం అలవాటే కాకుండా, మనిషి అంతరంగంలోకి తొంగిచూడటానికి ఇదొక సహజమైన మార్గం. సంగీతాన్ని ఆస్వాదించేటప్పుడే లేదా తీవ్రంగా ఆలోచించేటప్పుడు కూడా మన ప్రమేయం లేకుండానే కళ్లు మూసుకుంటాం. ప్రార్థనలో కూడా సరిగ్గా ఇదే జరుగుతుంది.

Also Read: ఆఫీస్‌లో తెలియక చేసే ఈ 5 తప్పులు కెరీర్‌ను దెబ్బతీస్తాయి.. జాగ్రత్త!