బాగా చెమట పట్టేంత వ్యాయామం చేసినా ఫ్యాట్ తగ్గడం లేదా? అసలు కారణం ఇదే

చాలా మంది ఎక్కువగా చెమట పడితే శరీరంలోని కొవ్వు వేగంగా కరుగుతుందని భావిస్తారు. జిమ్‌లో చెమటతో తడిసిపోయిన వారిని చూసినా, తాము ఎక్కువగా చెమట పట్టినా అదే అనుకుంటారు. కొంతమంది బరువు తగ్గాలనే ఉద్దేశంతో ఫ్యాన్ లేకుండా వ్యాయామం చేస్తారు. మరికొందరు స్లిమ్మింగ్ బెల్టు ధరించి చెమటను పెంచేందుకు ప్రయత్నిస్తారు. అయితే చెమట పట్టడం, కొవ్వు కరగడం రెండూ ఒకే విషయం కాదు.

చెమట ఎందుకు పడుతుంది?

చెమట అనేది శరీరానికి సహజమైన చల్లబరిచే వ్యవస్థ. వ్యాయామం చేసినప్పుడు లేదా వేడి వాతావరణంలో ఉన్నప్పుడు శరీర ఉష్ణోగ్రత పెరుగుతుంది. ఆ ఉష్ణోగ్రతను తగ్గించేందుకు చెమట గ్రంథులు చర్మం ద్వారా నీటిని బయటకు పంపిస్తాయి. ఆ నీరు ఆవిరిగా మారినప్పుడు శరీరానికి చల్లదనం కలుగుతుంది. అందువల్ల చెమట ప్రధానంగా శరీర ఉష్ణోగ్రతను నియంత్రిస్తుంది. ఇది నేరుగా కొవ్వును కరిగించదు.

బరువు తగ్గినట్లు ఎందుకు కనిపిస్తుంది?

తీవ్రమైన వ్యాయామం తర్వాత బరువు కొద్దిగా తగ్గినట్లు కనిపించవచ్చు. కొన్నిసార్లు అర కిలో నుంచి ఒక కిలో వరకు కూడా తక్కువగా చూపించవచ్చు. అయితే అది కొవ్వు తగ్గడం వల్ల కాదు. చెమట రూపంలో శరీరం నుంచి నీరు బయటకు వెళ్లడం వల్ల అలా జరుగుతుంది. చెమటతో పాటు సోడియం, పొటాషియం వంటి ఖనిజాలు కూడా బయటకు వెళ్తాయి. తర్వాత నీరు లేదా ఇతర ద్రవాలు తాగితే ఆ బరువు మళ్లీ తిరిగి వస్తుంది.

నిజంగా కొవ్వు ఎలా కరుగుతుంది?

కొవ్వు తగ్గడం శరీరంలో జరిగే జీవక్రియలపై ఆధారపడి ఉంటుంది. వ్యాయామం చేసే సమయంలో శరీరానికి శక్తి అవసరం అవుతుంది. ఆ శక్తిని పొందేందుకు శరీరం నిల్వ ఉన్న కొవ్వును ఉపయోగిస్తుంది. ఈ ప్రక్రియలో కొవ్వు శక్తిగా మారుతుంది. దీని ఫలితంగా కార్బన్ డైఆక్సైడ్, నీరు వంటి సైడ్ ప్రొడక్ట్స్ ఏర్పడతాయి. కార్బన్ డైఆక్సైడ్ శ్వాస ద్వారా బయటకు వెళ్తుంది.

చెమట తక్కువగా రావడం అంటే బరువు తగ్గకపోవడం కాదు

ప్రతి వ్యక్తి శరీరం భిన్నంగా ఉంటుంది. కొందరికి తక్కువ వ్యాయామంలోనే ఎక్కువ చెమట పడుతుంది. మరికొందరికి కఠినమైన వ్యాయామం చేసినా తక్కువ చెమట మాత్రమే వస్తుంది. వాతావరణం, తేమ, చెమట గ్రంథుల సంఖ్య, జన్యుపరమైన లక్షణాలు దీనిపై ప్రభావం చూపుతాయి. కాబట్టి తక్కువ చెమట పట్టిందని మీ క్యాలరీలు ఖర్చు కాలేదని అనుకోవద్దు.

ఎక్కువ చెమట కోసం చేసే పొరపాట్లు

ఎక్కువ చెమట పట్టించి బరువు తగ్గాలని ప్రయత్నించడం ఆరోగ్యానికి హానికరం కావచ్చు.

డీహైడ్రేషన్ ప్రమాదం

శరీరం నుంచి ఎక్కువ నీరు బయటకు వెళ్తే తల తిరగడం, బలహీనత, తలనొప్పి వంటి సమస్యలు రావచ్చు.

Also Read: మీరు రోజుకు ఎన్ని స్క్వాట్స్ చేయాలి? మీ ఫిట్‌నెస్ లెవెల్ తెలిపేందుకు గుంజీల పరీక్ష

స్లిమ్మింగ్ బెల్టు, ప్లాస్టిక్ ర్యాప్స్

కొంతమంది పొట్ట చుట్టూ ప్లాస్టిక్ లేదా బెల్టు కట్టుకుని వ్యాయామం చేస్తారు. ఇవి కేవలం వేడిని పెంచుతాయి. అవి కొవ్వును కరిగించవు. పైగా చర్మానికి హాని కలిగించే అవకాశం ఉంటుంది.

చెమట పట్టడం ఆరోగ్యకరమైన శరీర ప్రక్రియ. కానీ అది కొవ్వు కరుగుతున్న సంకేతం కాదు. నిజమైన కొవ్వు తగ్గుదల కోసం క్రమం తప్పకుండా వ్యాయామం చేయాలి. సమతుల్య ఆహారం తీసుకోవాలి. శరీరానికి తగినంత నీరు అందించాలి. ఇవే ఆరోగ్యకరంగా బరువు తగ్గేందుకు ఉత్తమ మార్గాలు.