Pearl Millet Upma| ప్రతిరోజూ ఉదయం పోహా, ఇడ్లీ, రవ్వ ఉప్మా తింటూ బోర్ కొడుతోందా? అయితే ఈసారి మీ బ్రేక్ఫాస్ట్లో చిన్న మార్పు చేయండి. సాధారణ రవ్వతో కాకుండా పోషకాలు పుష్కలంగా ఉండే సజ్జలతో రుచికరమైన ఉప్మా తయారుచేసుకోండి. ముఖ్యంగా చలికాలంలో ఉదయాన్నే వేడివేడి సజ్జల ఉప్మా తింటే కడుపు నిండటంతో పాటు మంచి రుచిని ఆస్వాదించవచ్చు. ఇందులో మీకు నచ్చిన కూరగాయలు కూడా వేసుకోవచ్చు. మరి ఈ హెల్తీ బ్రేక్ఫాస్ట్ ఇంట్లోనే ఎలా తయారుచేసుకోవాలో తెలుసుకుందాం.
ఈ ఉప్మా తయారుచేయడానికి కింద పేర్కొన్న పదార్థాలు సిద్ధం చేసుకోవాలి.
ఒక కప్పు సజ్జల రవ్వ లేదా దంచిన సజ్జలు
ఒక ఉల్లిపాయ (సన్నగా తరగాలి)
ఒక టమాటా (ముక్కలుగా కోయాలి)
ఒక చిన్న క్యారెట్
అర కప్పు పచ్చి బఠానీలు
ఒక పచ్చిమిర్చి
అర టీస్పూన్ ఆవాలు
అర టీస్పూన్ జీలకర్ర
6 నుంచి 7 కరివేపాకులు
చిటికెడు ఇంగువ
అర టీస్పూన్ పసుపు
తగినంత ఉప్పు
1 నుంచి 2 టేబుల్ స్పూన్ల నూనె లేదా నెయ్యి
3 కప్పుల నీళ్లు
కొద్దిగా కొత్తిమీర
ముందుగా సజ్జలను శుభ్రం చేసి బాగా కడగాలి. ఒకవేళ పొట్టు తీసిన సజ్జలను ఉపయోగిస్తే కొన్ని గంటలు నానబెట్టుకోవాలి. తర్వాత నీటిని వంపేసి సజ్జలను కొద్దిగా దంచుకోవాలి. లేదంటే మార్కెట్లో దొరికే సజ్జల రవ్వ ఉపయోగించవచ్చు.
స్టవ్పై కడాయి పెట్టి నూనె లేదా నెయ్యి వేయాలి. అది వేడయ్యాక ఆవాలు, జీలకర్ర వేసుకోవాలి. అవి చిటపటలాడిన తర్వాత ఇంగువ, కరివేపాకు, పచ్చిమిర్చి వేసి వేయించాలి.
తరిగిన ఉల్లిపాయ ముక్కలు వేసి బంగారు రంగు వచ్చే వరకు వేయించాలి. తర్వాత క్యారెట్, బఠానీలు, టమాటా ముక్కలు వేయాలి. వీటిలో పసుపు, ఉప్పు వేసి కాసేపు ఉడికించాలి.
Also Read: చాణక్య నీతి.. నిజమైన స్నేహితులు ఎవరో, నటించే వారు ఎవరో ఇలా తెలుసుకోండి
ఇప్పుడు సజ్జల రవ్వ కడాయిలో వేసి రెండు లేదా మూడు నిమిషాలు వేయించాలి. తర్వాత మూడు కప్పుల నీళ్లు పోసి బాగా కలపాలి. మూతపెట్టి తక్కువ మంటపై ఉడికించాలి. మధ్యమధ్యలో కలుపుతూ ఉండాలి. సజ్జలు మెత్తగా ఉడికి నీరు ఇంకిపోయే వరకు ఉంచాలి.
సజ్జలు పూర్తిగా ఉడికిన తర్వాత స్టవ్ ఆఫ్ చేయాలి. కొద్దిగా కొత్తిమీర వేసి కలపాలి. అంతే.. వేడివేడి సజ్జల ఉప్మా సిద్ధమైపోతుంది.
తయారుచేసిన ఉప్మా వేడివేడిగా ఉదయం బ్రేక్ఫాస్ట్గా లేదా సాయంత్రం అల్పాహారం తీసుకోవచ్చు. దీనికి కొబ్బరి చట్నీ, పచ్చి చట్నీ లేదా పెరుగు మంచి కాంబినేషన్. కొద్దిగా పుల్లటి రుచి కావాలనుకుంటే పైన నిమ్మరసం కూడా పిండుకోండి. చలికాలంలో కుటుంబ సభ్యులందరికీ ఈ రుచికరమైన బ్రేక్ఫాస్ట్ తయారుచేసి పెట్టండి.