ప్రజా యుద్ధం, సాయుధ పోరాటం అంటూ దశాబ్దాలుగా అడవుల్లో సాగుతున్న మావోయిస్టు ఉద్యమానికి ఛత్తీస్గఢ్లో భారీ విఘాతం కలిగింది. వరుస ఎన్కౌంటర్లు, కీలక నేతల అరెస్టులతో ఇప్పటికే కకావికలమవుతున్న మావోయిస్టు పార్టీకి మరో గట్టి ఎదురుదెబ్బ తగిలింది. ఛత్తీస్గఢ్లోని బీజాపూర్ జిల్లాలో ఏకంగా 52 మంది మావోయిస్టులు గురువారం పోలీసుల ఎదుట లొంగిపోయారు. ఒకేసారి ఇంత పెద్ద సంఖ్యలో కేడర్ జనజీవన స్రవంతిలోకి రావడం మావోయిస్టు శ్రేణుల్లో ఆందోళన కలిగిస్తోంది.
బీజాపూర్ జిల్లా ఎస్పీ డాక్టర్ జితేంద్ర కుమార్ యాదవ్, సీఆర్పీఎఫ్ ఉన్నతాధికారుల సమక్షంలో ఈ లొంగుబాటు ప్రక్రియ జరిగింది. సరెండర్ అయిన వారిలో 21 మంది మహిళలు, 31 మంది పురుషులు ఉన్నారు. వీరంతా దండకారణ్యం, ఏవోబీ (ఆంధ్ర-ఒడిశా బోర్డర్), మహారాష్ట్రలోని భామ్రాఘర్ ఏరియా కమిటీలకు చెందిన కీలక సభ్యులుగా పోలీసులు గుర్తించారు. ప్రభుత్వం ప్రకటించిన పునరావాస పథకాల పట్ల ఆకర్షితులై, హింసా మార్గాన్ని వీడి శాంతియుత జీవనం గడపాలని వీరు నిర్ణయించుకున్నారు.
లొంగిపోయిన వారి నేపథ్యం పరిశీలిస్తే, వీరిలో అత్యధికులు కీలకమైన ఆపరేషన్లలో పాల్గొన్నవారే. మొత్తం 52 మందిలో 49 మంది మావోయిస్టులపై ప్రభుత్వం గతంలోనే భారీ రివార్డులను ప్రకటించింది. వీరిపై ఉన్న మొత్తం రివార్డు విలువ దాదాపు 1.41 కోట్ల రూపాయలు ఉంటుందని ఎస్పీ జితేంద్ర కుమార్ యాదవ్ వెల్లడించారు. అనేక హింసాత్మక ఘటనలు, ఐఈడీ దాడులు, పోలీసులపై మెరుపు దాడుల్లో వీరికి ప్రమేయం ఉన్నట్లు రికార్డులు చెబుతున్నాయి.
ఈ సందర్భంగా ఎస్పీ మాట్లాడుతూ.. మావోయిస్టు పార్టీ అనుసరిస్తున్న సిద్ధాంతాలకు కాలం చెల్లిందని అభిప్రాయపడ్డారు. అభివృద్ధికి ఆటంకం కలిగిస్తూ, అమాయక గిరిజనులను బలి చేస్తున్న హింసా మార్గాన్ని వీడాలని ఆయన కోరారు. ప్రభుత్వం కల్పిస్తున్న పునరావాస ప్యాకేజీలను అందిపుచ్చుకుని, సాధారణ పౌరులుగా గౌరవప్రదమైన జీవితాన్ని ప్రారంభించాలని అడవుల్లో ఉన్న మిగిలిన మావోయిస్టులకు ఆయన పిలుపునిచ్చారు.
గత కొంతకాలంగా బస్తర్ రీజియన్తో పాటు తెలంగాణ, ఆంధ్రప్రదేశ్ సరిహద్దుల్లో పోలీసులు గాలింపు చర్యలను ముమ్మరం చేశారు. డ్రోన్ల నిఘా, అత్యాధునిక సాంకేతికతతో కూంబింగ్ నిర్వహిస్తుండటంతో మావోయిస్టులు తీవ్ర ఒత్తిడికి లోనవుతున్నారు. మరోవైపు, గ్రామాల్లో జరుగుతున్న అభివృద్ధి పనులు, రోడ్ల నిర్మాణం వల్ల మావోయిస్టుల ప్రాబల్యం తగ్గుతోంది. తాజా లొంగుబాటుతో పార్టీ నెట్వర్క్ మరింత బలహీనపడినట్లయింది.
Share
Health Benefits of Pineapple: వీలైతే ఈ పండును రోజూ తినండి.. ఎంతటి మొండి వ్యాధులైనా పారిపోవాల్సిందే!
Malavika Mohanan: పట్టుచీరలో కవ్విస్తున్న మాళవిక.. ఫోటోలు వైరల్!
