జంతర్ మంతర్ వద్ద నిరసనలు బంద్.. ఢిల్లీ పోలీసుల సంచలన నిర్ణయం!

Jantar Mantar: అన్నదాతల ఆందోళనల నుంచి నిరుద్యోగ పోరాటాల వరకు దశాబ్దాలుగా ఎన్నో చారిత్రక ఉద్యమాలకు వేదికగా నిలిచిన ఢిల్లీలోని జంతర్ మంతర్‌పై ఎట్టకేలకు వేటు పడింది. ఇకపై అక్కడ ఎలాంటి నిరసనలు, ధర్నాలు నిర్వహించడానికి వీల్లేదని ఢిల్లీ పోలీసులు సంచలన నిర్ణయం తీసుకున్నారు.

చరిత్రలో నిలిచిన జంతర్ మంతర్ ప్రస్థానం

మొగల్ చక్రవర్తి మహమ్మద్ షా కాలంలో 1731లో రాజ్‌పుత్ పాలకుడు మహారాజా సవాయి జయ్‌సింగ్-2 దీనిని నిర్మించారు. మొదట్లో ఇండియా గేట్ సమీపంలోని బోట్ క్లబ్ మైదానంలో నిరసనలు జరిగేవి. అయితే, 1993 నాటికి ఇక్కడ నిరసనల కారణంగా ప్రజలకు తీవ్ర ఇబ్బందులు కలుగుతుండటంతో, జంతర్ మంతర్ రోడ్డును అధికారిక ధర్నా వేదికగా మార్చారు. అప్పటి నుంచి దేశ రాజధానిలో ఏ సమస్య వచ్చినా ఇక్కడే ఆందోళనలు చేపట్టడం ఆనవాయితీగా వస్తోంది.

డీనోటిఫై వెనుక కారణాలు

తాజాగా సీఈసీ జ్ఞానేశ్ కుమార్ రాజీనామా డిమాండ్‌తో పాటు పలు విపక్షాలు, సంఘాలు పెద్ద ఎత్తున ఇక్కడ ఆందోళనలు చేపట్టాయి. దీనివల్ల ట్రాఫిక్ నిలిచిపోయి సామాన్యులు తీవ్ర ఇబ్బందులు పడుతున్నారన్న ఫిర్యాదులు వెల్లువెత్తాయి. ప్రజా సమస్యలను దృష్టిలో ఉంచుకుని, కేంద్ర హోంశాఖ ఏర్పాటు చేసిన ప్రత్యేక కమిటీ సిఫార్సుల మేరకు జంతర్ మంతర్‌ను నిరసన వేదికల జాబితా నుంచి పూర్తిగా తొలగిస్తూ పోలీసులు ఉత్తర్వులు జారీ చేశారు.

ప్రత్యామ్నాయ వేదికలు ఇవే

జంతర్ మంతర్‌కు బదులుగా ఢిల్లీ పోలీసులు మూడు ప్రాంతాలను ప్రత్యామ్నాయ నిరసన వేదికలుగా ప్రకటించారు. ఇకపై ఆందోళనకారులు రామ్‌లీలా మైదాన్, బురారీ గ్రౌండ్, అలాగే సీబీడీ గ్రౌండ్స్‌లో మాత్రమే ధర్నాలు చేసుకోవాలని స్పష్టం చేశారు. ఈ కొత్త వేదికల వద్ద నిరసనలు నిర్వహించేందుకు త్వరలోనే ప్రత్యేక విధివిధానాలను విడుదల చేయనున్నట్లు ఢిల్లీ పోలీసు కమిషనర్ అనురాగ్ కుమార్ వెల్లడించారు. దేశ రాజధానిలో దశాబ్దాల రాజకీయ, సామాజిక పోరాటాలకు కేంద్ర బిందువుగా ఉన్న జంతర్ మంతర్ మూతపడటం ప్రస్తుతం జాతీయ రాజకీయాల్లో తీవ్ర చర్చనీయాంశమైంది.

Also Read: రైతులు ఇబ్బంది పడుతుంటే మంత్రులు గోవా, ఢిల్లీ ట్రిప్పులా?: హరీశ్‌రావు