Denial Of marital intimacy| భార్యాభర్తల మధ్య చిన్న చిన్న గొడవలు సహజమే. కానీ అవి దీర్ఘకాలం కొనసాగితే మానసిక వేదనకు కారణమైతాయి. ముఖ్యంగా పిల్లలను ఈ గొడవల్లో లాగడం కుటుంబ బంధాలను దెబ్బతీస్తుంది. ఇలాంటి వివాహ వివాదంలో ఢిల్లీ హైకోర్టు కీలక తీర్పు ఇచ్చింది.
ఈ దంపతులకు 1990 మార్చి 3న హిందూ సంప్రదాయం ప్రకారం వివాహం జరిగింది. 1997 అక్టోబర్ 3న వారికి కుమారుడు జన్మించాడు. అయితే కొంతకాలానికి వారి మధ్య విభేదాలు మొదలయ్యాయి. భార్య తరచూ పుట్టింటికి వెళ్లిపోయేదని భర్త ఆరోపించాడు. కుటుంబ సభ్యులు, పంచాయతీలు జోక్యం చేసుకున్న తర్వాతే ఆమె తిరిగి వచ్చేదని పేర్కొన్నాడు. 2008 నుంచి భార్య తనతో శారీరక సంబంధాలకు దూరంగా ఉందని కూడా ఆరోపించాడు. అంతేకాకుండా తన ఆస్తిని భార్య పేరు మీద రాయాలని ఒత్తిడి చేసిందని చెప్పాడు. తన కుటుంబ సభ్యులపై క్రిమినల్ కేసులు పెడతానని బెదిరించిందని ఆరోపించాడు.
భార్య ప్రవర్తన వల్ల మానసికంగా ఇబ్బందులు ఎదుర్కొంటున్నానని భర్త పేర్కొన్నాడు. దీంతో 2009లో హిందూ వివాహ చట్టంలోని సెక్షన్ 13(1)(ia) కింద విడాకుల పిటిషన్ దాఖలు చేశాడు. తనపై, కుటుంబ సభ్యులపై భార్య పలు క్రిమినల్ ఫిర్యాదులు చేసిందని ఆరోపించాడు. ఈ పరిణామాలు తనకు వేధింపులుగా మారాయని వాదించాడు.
వాదనలు, ఆధారాలను పరిశీలించిన ఫ్యామిలీ కోర్టు భర్తకు అనుకూలంగా తీర్పు ఇచ్చింది. భార్య ప్రవర్తన మొత్తంగా మానసిక క్రూరత్వానికి సమానమని పేర్కొంటూ విడాకులు మంజూరు చేసింది.
ఫ్యామిలీ కోర్టు నిర్ణయాన్ని భార్య ఢిల్లీ హైకోర్టులో సవాలు చేసింది. భర్త, అతని కుటుంబ సభ్యులే సమస్యలకు కారణమని ఆమె తరఫు న్యాయవాదులు వాదించారు. తనను దూరంగా ఉండేలా చేసిన పరిస్థితులను కూడా వివరించారు. అయితే భర్త మాత్రం తనతో చాలాకాలంగా శారీరక సాన్నిహిత్యాన్ని నిరాకరించిందని వాదించాడు. తన పిల్లలను కలవకుండా అడ్డుపడుతోందని ఆరోపించాడు.
2008 నుంచి శారీరక సంబంధాలు లేవన్న విషయాన్ని భార్య అంగీకరించినట్లు హైకోర్టు గుర్తించింది. అయితే శారీరక సంబంధాలు లేకపోవడం ఒక్కటే విడాకులకు కారణం కాదని స్పష్టం చేసింది. భార్యాభర్తల మధ్య ఉన్న మొత్తం పరిస్థితులను, ప్రవర్తనను పరిశీలించిన తర్వాతే మానసిక క్రూరత్వంపై నిర్ణయం తీసుకోవాలని పేర్కొంది.
Also Read: పెళ్లి కోసం ఇన్సూరెన్స్ పాలసీ తీసుకుంటున్నారా? ఈ 7 సందర్భాల్లో మాత్రం మీకే నష్టం
తన కుమారుడిని కలుసుకోవడానికి ప్రయత్నించినప్పుడు భార్య అడ్డంకులు సృష్టించిందని భర్త ఆరోపించాడు. కోర్టు ఆదేశాల ప్రకారం కలుసుకునే అవకాశాలు ఉన్నప్పటికీ ఇబ్బందులు ఎదురయ్యాయని తెలిపాడు. ఒక పేరెంట్పై పిల్లలకు వ్యతిరేక భావన కలిగించేలా చేయడం పేరెంటల్ ఏలియనేషన్గా కోర్టు పరిగణించింది. ఇది తల్లిదండ్రులతో పాటు పిల్లల మానసిక ఆరోగ్యంపై కూడా ప్రభావం చూపుతుందని తెలిపింది.
Also Read: ఒకప్పుడు ఫుడ్ డెలివరీ బాయ్.. ఇప్పుడు ఏఐ కంపెనీ ఓనర్.. ఎలా ఎదిగాడంటే
2025 సెప్టెంబర్ 19న ఢిల్లీ హైకోర్టు భార్య అప్పీల్ను కొట్టివేసింది. ఫ్యామిలీ కోర్టు ఇచ్చిన విడాకుల తీర్పులో జోక్యం చేసుకోవాల్సిన అవసరం లేదని స్పష్టం చేసింది.