హోసూర్ ఐఫోన్ ప్లాంట్‌లో ఘోరం.. ఒకరిని కాపాడబోయి ముగ్గురు మృతి.. అసలేం జరిగింది?

iPhone Factory: తమిళనాడులోని హోసూర్ సమీపంలో ఉన్న ఐఫోన్ విడి భాగాల తయారీ ప్లాంట్‌లో చోటుచేసుకున్న ఘోర ప్రమాదం స్థానికంగా తీవ్ర కలకలం రేపింది. టాటా ఎలక్ట్రానిక్స్ నిర్వహిస్తున్న ఈ ప్లాంట్‌లో విషపూరిత వాయువులు పీల్చి ముగ్గురు కార్మికులు ప్రాణాలు కోల్పోవడం తీవ్ర విషాదాన్ని నింపింది. నిత్యం వందలాది మంది సిబ్బందితో కోలాహలంగా ఉండే ఫ్యాక్టరీలో క్షణాల వ్యవధిలోనే ఈ ఊహించని విషాదం జరిగిపోయింది.

ఒక్కసారిగా మారిన దృశ్యం

సోమవారం ప్లాంట్‌లోని మెయింటెనెన్స్ విభాగంలో పనిచేస్తున్న కార్మికులు వ్యర్థ జలాల శుద్దీకరణ ట్యాంక్ వద్ద విధుల్లో ఉన్నారు. ఈ క్రమంలో ఒక కార్మికుడు పరిశీలించేందుకు ట్యాంకు లోపలికి తొంగి చూశాడు. అక్కడ దట్టంగా అలుముకున్న విషవాయువుల ప్రభావంతో అతడు ఒక్కసారిగా స్పృహ తప్పి కుప్పకూలిపోయాడు.

కాపాడబోయి ప్రాణాలు వదిలారు

తన తోటి సిబ్బంది ఏమైందో తెలుసుకునేందుకు, అతడిని రక్షించేందుకు మిగతా ఇద్దరు కార్మికులు వెంటనే అక్కడికి పరుగెత్తారు. కానీ, అప్పటికే అక్కడ క్రమంగా వ్యాపిస్తున్న ప్రమాదకర వాయువుల తీవ్రతకు వారు కూడా స్పృహ కోల్పోయారు. గమనించిన తోటి సిబ్బంది వెంటనే స్పందించి వారిని సమీపంలోని ఆసుపత్రికి తరలించినప్పటికీ, అప్పటికే వారు మృతి చెందినట్లు వైద్యులు ధ్రువీకరించారు.

అంతర్గత దర్యాప్తు ప్రారంభం

ఈ ఘోర ఘటనపై కంపెనీ యాజమాన్యం గానీ, ఆపిల్ సంస్థ గానీ ఇప్పటివరకు అధికారికంగా ఎలాంటి ప్రకటన చేయలేదు. అయితే, ప్రమాదానికి గల కారణాలపై కంపెనీ అంతర్గత విచారణను చేపట్టినట్లు తెలుస్తోంది. మృతదేహాలకు పోస్ట్ మార్టం నివేదిక వచ్చిన తర్వాతే మరణాలకు అసలు కారణం ఏంటనేది స్పష్టమవుతుందని పోలీసు అధికారులు పేర్కొన్నారు.

Also Read: ఏపీ ఎంపీపీ, జడ్పీ అధ్యక్షుల ఎన్నికల షెడ్యూల్ విడుదల.. పూర్తి వివరాలు ఇవే!