డుగ్ డుగ్ బండిని పట్టుకుని దేవుడంటూ పూజలు… మైండ్ బ్లాక్ స్టోరీ

Bullet Baba Real Story: బైక్ అంటే ఎవరికి ఇష్టం ఉండదు చెప్పండి ? 24 గంటలూ బైక్ లపై తిరిగే వాళ్ళు ఉంటారు. అలాగే చాలామంది తమకు ఇష్టమైన బైక్ ను క్లీన్ గా ఉంచుకుంటూ, జాగ్రత్తగా, ప్రాణంతో సమానంగా చూసుకుంటారు. కానీ అదే బైక్ ను దేవుడిలా పూజిస్తే… వీడికేమన్నా పిచ్చి పట్టిందా అనుకుంటాం కదా. మరి అదే ఓ ఊరు ఊరంతా అదే పని చేస్తే… ఎలా ఉంటుందో తెలియాలంటే ఈ మూవీని చూడాల్సిందే. ‘బుల్లెట్ బాబా’ రియల్ లైఫ్ స్టోరీతో రూపొందిన ఈ మూవీ పేరు Dug Dug.

కథలోకి వెళ్తే…

కథ రాజస్థాన్‌ లోని ఒక చిన్న గ్రామం చుట్టూ తిరుగుతుంది. ఠాకూర్ అనే వ్యక్తి మద్యానికి బానిసై ఉంటాడు. ఒకరోజు రాత్రి అతను విపరీతంగా తాగి, తన పాత ఎన్‌ఫీల్డ్ బుల్లెట్ బైక్‌పై హైవే మీద వేగంగా వెళ్తూ ఘోరమైన రోడ్డు ప్రమాదానికి గురవుతాడు. అతను అక్కడికక్కడే మరణిస్తాడు. పోలీసులు సంఘటన స్థలానికి చేరుకుని పంచనామా చేసి, ఆ బైక్‌ను స్వాధీనం చేసుకుని పోలీస్ స్టేషన్ లాకప్‌లో భద్రపరుస్తారు. కానీ మరుసటి రోజు ఉదయం ఆ బైక్ అదృశ్యమవుతుంది. పోలీసులు వెతికి చూస్తే, అది ఎక్కడైతే ప్రమాదం జరిగిందో సరిగ్గా అదే స్థలంలో నిలబడి ఉంటుంది.

ఇలా ఒక్కసారి కాదు, తెచ్చిన ప్రతిసారీ జరుగుతుంది. బైక్‌ను మళ్లీ స్టేషన్‌కు తెచ్చి పెట్రోల్ తీసేసి, గొలుసులు, తాళాలు వేసి లాక్ చేసినా, మరుసటి రోజు అది మళ్లీ అదే స్పాట్‌లో కనిపిస్తుంది. ఈ వింత సంఘటన గ్రామస్తులకు తెలిసిపోతుంది. దీంతో గ్రామ ప్రజలు ఠాకూర్ ఆత్మ ఆ బైక్‌లోనే ఉందని, దానికి దైవిక శక్తులు ఉన్నాయని నమ్మడం మొదలు పెడతారు. ఠాకూర్‌ కు మద్యం అంటే ఇష్టం కాబట్టి, బైక్‌కు మద్యం నైవేద్యంగా పోస్తే కోరికలు నెరవేరతాయని ఒక నమ్మకం పుట్టుకొస్తుంది. మొదట్లో కొందరు మాత్రమే ప్రయత్నించగా, వారి కోరికలు నెరవేరడంతో ఆ వార్త చుట్టుపక్కల గ్రామాలు, నగరాల వరకు వ్యాపిస్తుంది.

క్రమంగా ఆ బైక్ ఒక దేవుడిగా మారిపోతుంది. రోడ్డు పక్కనే పెద్ద గుడి నిర్మాణం జరుగుతుంది. భక్తులు వేలాది సంఖ్యలో వస్తూ, మద్యం బాటిళ్లు, పూలమాలలు, ధూపాలు సమర్పిస్తారు. ఈ అవకాశాన్ని స్థానిక వ్యాపారులు, రాజకీయ నాయకులు, మతపెద్దలు ఉపయోగించుకుంటారు. గుడి చుట్టూ దుకాణాలు, హోటళ్లు, పార్కింగ్ స్థలాలు మొదలవుతాయి. విరాళాలు, డొనేషన్ల పేరుతో కోట్లాది రూపాయలు సేకరించి, భక్తిని ఒక పెద్ద వ్యాపారంగా మార్చేస్తారు. ఇంతకీ ఈ మూఢనమ్మకం వల్ల నష్టపోయింది ఎవరు ? లాభపడ్డది ఎవరు ? చివరికి ఏమైంది ? అన్నది తెలియాలంటే మూవీని మిస్ అవ్వకుండా చూడాల్సిందే.

తెలుగులో ఉందా ?

మన సమాజంలో ఇప్పటికీ ఉన్న మూఢనమ్మకాలను, వాటిని వ్యాపారంగా మార్చుకునే వ్యవస్థను తెలివిగా, సెటైర్ రూపంలో చూపించిన ఒక అద్భుతమైన చిత్రం ఇది. అంతర్జాతీయ చలనచిత్రోత్సవాల్లో ప్రదర్శించబడి ప్రశంసలు అందుకున్న ఈ సినిమా ఆలోచింపజేసేలా ఉంటుంది. మత విశ్వాసాలను అవమానించకుండా, సమాజపు బలహీనతలను తెలివిగా ఎత్తి చూపడం దీని ప్రత్యేకత. 2026లో విడుదలై అమెజాన్ ప్రైమ్ వీడియోలో హిందీ ఒరిజినల్‌తో ఇంగ్లీష్ సబ్‌టైటిల్స్‌తో స్ట్రీమింగ్ అవుతోంది. రాజస్థాన్‌లోని ప్రసిద్ధ ‘బుల్లెట్ బాబా’ (ఓం బన్నా) నిజ జీవిత సంఘటన స్ఫూర్తితో తెరకెక్కిన ఈ సినిమాను డెబ్యూ డైరెక్టర్ రిత్విక్ పరీక్ తెరకెక్కించారు. ఈ సినిమాకు అనురాగ్ కశ్యప్, విక్రమాదిత్య మోత్వానే, నిఖిల్ అద్వానీ వంటి ప్రముఖులు ఎగ్జిక్యూటివ్ ప్రొడ్యూసర్లు.