Horror Mystery Thriller: హారర్ థ్రిల్లర్ సినిమాలను ఇష్టపడే తెలుగు ఆడియన్స్‌ కోసం ఓటీటీలోకి ఒక అదిరిపోయే సినిమా వచ్చేసింది. ఈ చలికాలంలోనూ ఒంటికి చెమటలు పట్టించేలా, భయంకరమైన వాతావరణంతో సాగే ఆ మిస్టరీ హారర్ మూవీ పేరే ‘హోకమ్’ (Hokum). ఓ పాత హోటల్‌లోని హనీమూన్ గదికి సంబంధించిన మంత్రగత్తె కథ, అక్కడ చోటుచేసుకునే వింత సంఘటనల చుట్టూ ఈ సినిమా సాగుతుంది. మరి హారర్ మూవీ లవర్స్ ఈ సినిమాను తెలుగులో ఏ ఓటీటీలో చూడవచ్చు ? అన్నది తెలుసుకుందాం పదండి.
ఓమ్ బామన్ ప్రముఖ హారర్ నవలా రచయిత. తన తల్లిదండ్రుల అస్తికలను చల్లడానికి ఐర్లాండ్‌లోని ఓ మారుమూల ప్రాంతంలో ఉన్న పాత హోటల్‌కు వెళ్తాడు. ఆ హోటల్ కు అతని తల్లిదండ్రుల జీవితంతోనూ ప్రత్యేకమైన అనుబంధం ఉంటుంది. ఎందుకంటే గతంలో వాళ్లు హనీమూన్ గడిపిన ప్రదేశం అదే. అయితే, ఆ హోటల్‌లోని హనీమూన్ సూట్ గురించి అక్కడి సిబ్బంది చెప్పే కథలు మాత్రం ఓమ్‌కు ఆసక్తిని కలిగిస్తాయి. ఆ గదిలో ఓ మంత్రగత్తె ఉంటుందని, అందుకే దాన్ని చాలా కాలంగా మూసి ఉంచారని చెబుతారు.
మొదట ఈ విషయాలను ఓమ్ పెద్దగా పట్టించుకోడు. కానీ హోటల్‌లో ఉంటున్న సమయంలో అతనికి కొన్ని వింత సంఘటనలు జరిగినట్టు అన్పిస్తుంది. ఇదే సమయంలో హోటల్‌లో పనిచేసే ఓ వ్యక్తి అనూహ్యంగా కనిపించకుండా పోతాడు. అతని అదృశ్యంతో పరిస్థితులు మరింత భయంకరంగా మారతాయి. ఓమ్‌కు కనిపించే వింత దృశ్యాలు, హోటల్‌లో చోటుచేసుకునే సంఘటనలు అతని గతంలోని జ్ఞాపకాలను కూడా బయటకు తీసుకొస్తాయి.
దీంతో అతను కేవలం ఓ మంత్రగత్తె కథను తెలుసుకోవడమే కాకుండా, తనను వెంటాడుతున్న గతాన్ని కూడా బయట పెట్టాల్సి వస్తుంది. అసలు ఆ హనీమూన్ సూట్‌లో ఏం జరుగుతోంది ? మాయమైన హోటల్ ఉద్యోగి ఏమయ్యాడు ? అక్కడి మంత్రగత్తె కథ వెనుక ఉన్న అసలు రహస్యం ఏంటి ? ఓమ్ తన గతంతో పాటు ఆ హోటల్‌లోని భయంకరమైన నిజాలను ఎలా ఎదుర్కొన్నాడు ? అన్నది సినిమాలో చూసి తెలుసుకోవలసిన అంశం.
‘హోకమ్’ 2026లో విడుదలైన ఇంగ్లీష్ హారర్ మిస్టరీ థ్రిల్లర్. ఈ సినిమా అమెజాన్ ప్రైమ్ వీడియో (Amazon Prime Video)లో A సర్టిఫికేషన్‌తో స్ట్రీమింగ్ అవుతోంది. ఒరిజినల్ ఇంగ్లీష్‌తో పాటు హిందీ, తమిళం, తెలుగు ఆడియోలు కూడా అందుబాటులో ఉన్నాయి. కాబట్టి తెలుగు ప్రేక్షకులు డబ్బింగ్ వెర్షన్‌లోనూ ఈ హారర్ మిస్టరీని చూడొచ్చు. ప్రముఖ హారర్ దర్శకుడు డామియన్ మెక్‌కార్తీ (Damian McCarthy) తెరకెక్కించిన ఈ హాలీవుడ్ చిత్రంలో ఆడమ్ స్కాట్ (Adam Scott), డేవిడ్ విల్మట్ (David Wilmot), పీటర్ కూనన్ (Peter Coonan), ఫ్లోరెన్స్ ఓర్డేష్ (Florence Ordesh) తదితరులు కీలక పాత్రల్లో నటించారు.
Read Also: గర్భిణి చుట్టూ గత్తరలేపే పనులు… చేతబడులు, క్షుద్రపూజలతో వణికించే సైకలాజికల్ హారర్ థ్రిల్లర్
Share
పదో తరగతి పాసైనా చేతికి రాని మెమో.. గద్వాల్లో స్కూల్ యాజమాన్యం వేధింపులు!
కార్పొరేషన్లలో కూటమి ప్రభంజనం.. గుంటూరు, తిరుపతి, చిత్తూరు, మచిలీపట్నం కైవసం!
