Gelupu OTT: పిల్లలు గెలిస్తే తల్లిదండ్రులకు అంతకంటే ఆనందం మరొకటి ఉండదు. కానీ తమ పిల్లలు ఎప్పుడూ గెలవాలనే మొండిపట్టుదల ఉంటే? ఎదుటివాళ్ల ప్రతిభను కూడా ఓర్చుకోలేకపోతే? చివరికి తమ కొడుకు విజయం కోసం ఓ చిన్నారి ప్రాణాలనే తీయాలనుకుంటే? వినడానికి షాకింగ్గా ఉన్నా.. ఇలాంటి ఆసక్తికరమైన పాయింట్తో తెరకెక్కిన తెలుగు స్పోర్ట్స్ ఎమోషనల్ థ్రిల్లర్ ‘గెలుపు’. బిగ్ బాస్ ఫేమ్ ఇనయా సుల్తానా నెగెటివ్ షేడ్స్ ఉన్న పాత్రలో కనిపించిన ఈ సినిమా తాజాగా ఓటీటీలో స్ట్రీమింగ్కు వచ్చింది. మరి ఈ కథలోని అసలు ట్విస్ట్ ఏంటో తెలుసుకుందాం పదండి.
పురుషోత్తం చిన్న వయసులోనే చెస్లో అద్భుతమైన ప్రతిభ చూపిస్తూ ఛాంపియన్గా ఎదుగుతుంటాడు. అతడి తల్లి (ఇనయా సుల్తానా)కు మాత్రం కొడుకు ఎప్పుడూ గెలవడమే ముఖ్యం. ఓటమి అనే మాటే అతడి జీవితంలో ఉండకూడదని భావిస్తుంది. తల్లి ఇచ్చే అతిగా ప్రోత్సాహం, గెలుపుపై పెంచే మోజుతో పురుషోత్తంలోనూ గర్వం పెరిగిపోతుంది. తనను ఓడించే వాళ్లే లేరన్న ధీమాతో ఉంటాడు.
అయితే అదే సమయంలో ఓ పేదింటి చిన్నారి చెస్లో తన తెలివితేటలతో అందరినీ ఆశ్చర్యపరుస్తుంది. పెద్ద పెద్ద ఆటగాళ్లను సైతం ఓడిస్తూ దూసుకెళ్తుంది. ఓ సందర్భంలో పురుషోత్తాన్ని కూడా ఓడించడంతో అతడి తల్లికి కోపం కట్టలు తెంచుకుంటుంది. తన కొడుకు ఓటమిని అంగీకరించలేని ఆమె.. ఆ చిన్నారి భవిష్యత్తులోనూ అతడికి పోటీగా మారుతుందని భావిస్తుంది. అందుకే ఆ పాపను అడ్డు తొలగించుకోవాలని దారుణమైన నిర్ణయం తీసుకుంటుంది.
ఒక ఆటలో గెలుపు కోసం ఎంతవరకైనా వెళ్లడానికి సిద్ధపడిన ఆ తల్లి.. చివరికి ఎలాంటి పరిణామాలను ఎదుర్కొంది? ఆ చిన్నారి ప్రాణాలకు వచ్చిన ముప్పు నుంచి ఎలా బయటపడింది? గెలుపు అంటే ప్రత్యర్థిని ఓడించడమేనా, లేక ప్రతిభను గుర్తించడమా? అన్నదే ఈ సినిమా మిగతా కథ.
ఈ సినిమాలో ఇనయా సుల్తానా, చైత్ర పెద్ది, అశ్విని, మహీధర్, అన్విష తదితరులు కీలక పాత్రల్లో నటించారు. ప్రవీణ్ రామరాజు దర్శకత్వం వహించగా, బొమ్మదేవర నాగకుమారి కథను అందించారు. ‘కథా సుధా’ పేరుతో ETV Win పరిచయం చేస్తున్న కథల్లో భాగంగా రూపొందిన ఈ చిన్న సినిమా 2026 నవంబర్ 15 నుంచి ETV Win ఓటీటీలో స్ట్రీమింగ్ అవుతోంది. చెస్ ఆట నేపథ్యంలో తల్లిదండ్రుల అతిప్రేమ, గెలుపుపై ఉండే వ్యామోహం, పిల్లల మనస్తత్వాలను చూపించే ఈ ఎమోషనల్ థ్రిల్లర్ను ఇప్పుడు ఇంట్లోనే చూసేయొచ్చు.