Malayalam Thriller: పెద్దగా పేరూ ఊరూ తెలియని వాళ్ళతో ప్రేమలో పడితే, ఆ తరువాత జరిగే పరిణామాలు ఎలా ఉంటాయో చాలామంది అమాయకపు ఆడపిల్లలకు తెలియదు. అమాయకులం అనుకునే వాళ్ళే కాదు ప్రతీ ఒక్కరూ చూడాల్సిన మలయాళం మూవీ ఈరోజు మన మూవీ సజెషన్. ఆ సినిమా మరేంటో కాదు… 2020లో విడుదలైన మలయాళ బ్లాక్బస్టర్ సినిమా ‘కప్పెల’ (Kappela). మరి ఈ మూవీ ఏ ఓటీటీలో స్ట్రీమింగ్ అవుతోంది ? స్టోరీ ఏంటి ? అనే వివరాల్లోకి వెళ్తే…
వయనాడ్ కు చెందిన జెస్సీ (అన్నా బెన్) అనే అమాయకపు పల్లెటూరి అమ్మాయి కథ ఇది. చదువు మధ్యలోనే ఆపేసిన ఈ అమ్మాయి ఇంట్లోనే ఉంటుంది. తల్లికి కుట్టుపనుల్లో సాయం చేస్తుంటుంది. ఒకరోజు పొరపాటున తాను రింగ్ చేసిన నెంబర్ ఒక రాంగ్ నెంబర్ కు కలుస్తుంది. ఆ ఫోన్ కాల్ కోజికోడ్ లో ఆటో నడుపుకునే విష్ణు (రోషన్ మాథ్యూ) అనే యువకుడికి వెళ్తుంది. ఆ ఫోన్ పరిచయం కాస్తా ప్రేమగా మారుతుంది. ముందుగా ఆ రాంగ్ నెంబర్ పరిచయం వారిద్దరి మధ్య ఫోన్ స్నేహంగా ఉంటుంది.
ఒకరినొకరు చూసుకోకపోయినా, కేవలం మాటలతోనే ఇద్దరూ గాఢంగా ప్రేమలో పడతారు. మరోవైపు జెస్సీకి ఇంట్లో పెళ్లి సంబంధాలు చూస్తుంటారు. ఇలాంటి సమయంలో విష్ణుని కలవడానికి ఆమె ఇంట్లో చెప్పకుండా మొదటిసారి కోజికోడ్ నగరానికి బస్సు ఎక్కి ఒంటరిగా ప్రయాణం చేస్తుంది. ఇక్కడే కథ మలుపు తిరుగుతుంది. జెస్సీ సిటీకి రాగానే విష్ణు ఆమెను కలుస్తాడు. ఇద్దరూ కలిసి ఒక రెస్టారెంట్ లో భోజనానికి వెళ్తారు. అదే సమయంలో రాయ్ (శ్రీనాథ్ భాసి) అనే ఒక అగ్రెసివ్, ముక్కుసూటి మనస్తత్వం గల యువకుడు అక్కడకు వెళ్తాడు.
రాయ్ నిజానికి ఉద్యోగం కోసం తిరుగుతుంటాడు. కానీ అతను ఆ పని వదిలేసి విష్ణు, జెస్సీలను ఫాలో అవ్వడం మొదలు పెడతాడు. ఒక సందర్భంలో విష్ణు, రాయ్ మధ్య గొడవ షూరూ అవుతుంది. దీంతో రాయ్ ప్రవర్తన చూసి జెస్సీ వణికిపోతుంది. ప్రేక్షకులకు కూడా రాయ్ ఒక విలన్ లాగా, ఇంకా బాగా చెప్పలాంటే సైకో లాగా కనిపిస్తాడు. ఈ నేపథ్యంలోనే విష్ణు జెస్సీని తీసుకుని ఒక లాడ్జికి వెళ్తాడు. అక్కడికి రాయ్ కూడా వెళ్తాడు. అక్కడ విష్ణు నిజ స్వరూపం బయట పడుతుంది. నిజానికి విష్ణు మామూలు ఆటో డ్రైవర్ కాదు, అతను అమాయకపు అమ్మాయిలను ప్రేమ పేరుతో ట్రాప్ చేసి, వ్యభిచార ముఠాలకు అమ్మేసే ఒక పెద్ద క్రిమినల్ అనే షాకింగ్ నిజం తెలుస్తుంది.
జెస్సీని కూడా అదే లాడ్జిలో ఒక దళారికి అమ్మడానికి డీల్ మాట్లాడుకుంటాడు. ఇక్కడే రాయ్ నిజ స్వరూపం కూడా బయట పడుతుంది.
మరి ఇంతకీ రాయ్ ఎవరు ? అతను విష్ణుని ఏం చేశాడు ? అమాయకంగా ఆటో డ్రైవర్ ను నమ్మిన జెస్సీని ఎలా కాపాడతాడు ? అన్నది స్టోరీ. ‘కప్పెల’ అనే ఈ మలయాళం మూవీ Netflix లో ఉంది. అయితే తెలుగు ఆడియో అందుబాటులో లేదు. కావాలంటే ఇంగ్లీష్ సబ్టైటిల్స్ తో ఈ మూవీని చూడొచ్చు. ఈ సినిమాను తెలుగులో ‘బుట్టబొమ్మ’ (Butta Bomma – 2023) పేరుతో అధికారికంగా రీమేక్ చేశారు. ఆ రీమేక్ వెర్షన్ ప్రస్తుతం Netflix లోనే తెలుగు ఆడియోతో స్ట్రీమింగ్ అవుతోంది.
Read Also : సూపర్ హీరోలందరినీ చంపేసే క్రూరత్వం… మైండ్ బ్లోయింగ్ యానిమే సూపర్ హీరో సిరీస్
Share
కోటి కొట్టేసి బెట్టింగ్లో... కట్ చేస్తే కుర్చీ దెయ్యానికి బానిసగా... 2 ఓటీటీలలో స్ట్రీమింగ్
గ్యాస్ వినియోగదారులకు బిగ్ రిలీఫ్.. సిలిండర్ల ధర రూ.183 తగ్గింపు, నేటి నుంచి అమల్లోకి
