Telugu Romantic Drama: ఒక అమ్మాయిని తాకితే ఏకంగా కరెంట్ షాక్ కొడుతుంది… అలాంటి అమ్మాయిని పెళ్లి చేసుకున్న తర్వాత ఆ భర్త పరిస్థితి ఎలా ఉంటుంది ? ప్రేమ ఉంటే ఇలాంటి సమస్యను కూడా అధిగమించగలమా ? ఇదే కాన్సెప్ట్తో తెరకెక్కిన విభిన్నమైన తెలుగు డ్రామెడీ డ్రామా ‘ఓ..! సుకుమారి’. తిరువీర్, ఐశ్వర్య రాజేష్ జంటగా నటించిన ఈ సినిమా ఇప్పుడు ఓటీటీలో స్ట్రీమింగ్ అవుతోంది. మరి మూవీ స్టోరీ ఏంటి ? ఏ ఓటీటీలో అందుబాటులో ఉంది ? అనే వివరాలపై ఒక లుక్కేద్దాం పదండి.
తెలంగాణలోని ఓ పల్లెటూరిలో దామిని అనే యువతి ఉంటుంది. పుట్టుకతో వచ్చిన ఓ విచిత్రమైన సమస్య కారణంగా ఆమెను ఎవరైనా తాకితే వారికి ఎలక్ట్రిక్ షాక్ కొడుతుంది. ఈ కారణంగా దామినికి పెళ్లి చేయడం కుటుంబానికి పెద్ద సమస్యగా మారుతుంది. ఊరిలో వాళ్లు కూడా ఆమెకు దూరంగానే ఉంటారు. ఇదే సమయంలో రాజకీయాల్లో ఎదగాలని కలలు కనే యాదగిరి పెళ్లిచూపుల కోసం ఆ ఊరికి వస్తాడు. దామినిని చూసిన వెంటనే ఆమెపై మనసు పారేసుకుంటాడు. అయితే ఆమెకు ఉన్న కరెంట్ షాక్ సమస్య గురించి అతడికి మాత్రం అసలు తెలియదు. దామినినే పెళ్లి చేసుకుంటానని పట్టుబట్టడంతో కుటుంబ సభ్యులు కూడా ఈ సంబంధాన్ని ఎలాగైనా ఖరారు చేయాలని నిర్ణయించుకుంటారు.
అయితే అసలు ట్విస్ట్ పెళ్లి తర్వాతే వస్తుంది. దామినికి ఉన్న సమస్యను యాదగిరికి చెప్పకుండా పెళ్లి జరిపించేస్తారు. శోభనం గదిలో భార్యను తాకగానే యాదగిరికి కరెంట్ షాక్ కొట్టడంతో అసలు విషయం బయట పడుతుంది. అప్పటి నుంచి భార్యను వదిలేయలేక.. దగ్గరకు వెళ్లలేక యాదగిరి పడే ఇబ్బందులతో కథలో కామెడీ మొదలవుతుంది. భార్యాభర్తలుగా జీవించాలంటే శారీరకంగా దగ్గరవ్వడం ఒక్కటే ముఖ్యమా? దామినిని యాదగిరి అర్థం చేసుకోగలిగాడా? ఆమెకు ఉన్న ఈ వింత సమస్య నుంచి బయటపడే మార్గం దొరికిందా? చివరికి వీరి ప్రేమకథ ఎలాంటి ముగింపుకు చేరింది? అనేది సినిమాలో చూడాల్సిందే.
సాధారణ ప్రేమకథలకు భిన్నంగా ఓ విచిత్రమైన కాన్సెప్ట్తో ఈ సినిమాను రూపొందించారు. ముఖ్యంగా తిరువీర్ తన సహజమైన కామెడీ టైమింగ్తో యాదగిరి పాత్రలో ఆకట్టుకోగా, ఐశ్వర్య రాజేష్ దామిని పాత్రలో ఎమోషనల్గా మెప్పించారు. భార్యను తాకకుండా ఉండేందుకు హీరో చేసే ప్రయత్నాలు, వారి మధ్య వచ్చే సన్నివేశాలు నవ్వులు తెప్పిస్తాయి. అదే సమయంలో ప్రేమ అంటే కేవలం శారీరక బంధం కాదని, ఒకరినొకరు అర్థం చేసుకోవడం, కష్టాల్లో తోడుగా నిలవడం కూడా ప్రేమలో ముఖ్యమైన భాగమేననే భావనను కథ ద్వారా చెప్పే ప్రయత్నం చేశారు. ‘ఓ..! సుకుమారి’ (O..! Sukumari)ప్రస్తుతం Amazon Prime Videoలో తెలుగు ఆడియోతో స్ట్రీమింగ్ అవుతోంది. ఆగస్టు 7 నుంచి ఓటీటీలో అందుబాటులోకి వచ్చింది. విభిన్నమైన కాన్సెప్ట్తో వచ్చిన ఫ్యామిలీ డ్రామెడీ చూడాలనుకుంటే ఈ సినిమాను ఓసారి ట్రై చేయొచ్చు.
Read Also: 95 ఏళ్ల తాత చివరి కోరిక కోసం పాక్ కు మనవడు… కన్నీళ్లు పెట్టించే క్లైమాక్స్
Share
ఆర్టీసీ బస్సు రన్నింగ్లో ఉండగానే డ్రైవర్కు ఫిట్స్.. స్పాట్లో ప్రయాణికులు..!
‘టాక్సిక్’ ట్రైలర్.. నువ్వు జోకర్వి కాదు బాస్టర్డ్.. వామ్మో ఇంత వైల్డ్గా ఉందేంటి?
