Tere naam movie OTT : సల్మాన్ ఖాన్, భూమికా చావ్లా ప్రధాన పాత్రల్లో నటించిన సినిమా ‘తేరే నాం’ (Tere Naam). ఈ సినిమాతోనే భూమిక బాలీవుడ్లోకి అడుగుపెట్టింది. 2003లో వచ్చిన ఈ సినిమా ఇప్పటికి 23 ఏళ్లు పూర్తి చేసుకుంది. అయితే ఈ కల్ట్ క్లాసిక్ రొమాంటిక్ డ్రామా మళ్లీ థియేటర్లలోకి వచ్చేస్తోంది. ఇప్పుడు బిగ్ స్క్రీన్లో చూడాలని ఫ్యాన్స్ కూడా ఎక్సైట్ అవుతున్నారు. ఈ రీ రిలీజ్ సందర్భంగా సినిమా మళ్లీ ఓటీటీలో కూడా ట్రెండింగ్ అవుతోంది.
సతీష్ కౌశిక్ దర్శకత్వం వహించిన ‘తేరే నాం’ (Tere naam), 1999లో విక్రమ్ నటించిన ‘సేతు’ అనే తమిళ చిత్రానికి రీమేక్. హిమేష్ రేష్మీ అందించిన పాటలు అప్పట్లో పెద్ద హిట్ కూడా అయ్యాయి. ముఖ్యంగా సల్మాన్ ఖాన్ హెయిర్ స్టైల్ ఆ సమయంలో యువతలో ఒక ట్రెండ్గా మారింది. ఇది 2026 ఫిబ్రవరి 27నుంచి PVR, INOX మల్టీప్లెక్స్లలో రీ-రిలీజ్ అవుతోంది. దీంతో ఈ సినిమా ఇప్పుడు ZEE5లో ట్రెండ్ అవుతోంది. ఈ సినిమా అప్పట్లో ఫిల్మ్ఫేర్ అవార్డ్స్ లో ఉత్తమ చిత్రం, ఉత్తమ నటుడు, ఉత్తమ నటి, ఉత్తమ సంగీత దర్శకుడు వంటి 8 విభాగాల్లో నామినేషన్లు కూడా పొందింది.
రాధే మోహన్ (సల్మాన్ ఖాన్) అనే ఒక మాజీ కాలేజీ స్టూడెంట్ రౌడీలా తిరుగుతుంటాడు. అతను ఒక పూజారి కుమార్తె అయిన నిర్జర (భూమికా చావ్లా) అనే అమ్మాయితో ప్రేమలో పడతాడు. ఆమె చాలా అమాయకురాలు కూడా. మొదట్లో రాధే ప్రవర్తన చూసి ఆమె భయపడినప్పటికీ, అతనిని అర్థం చేసుకుని నెమ్మదిగా అతడిని ప్రేమిస్తుంది. అయితే విధి వీళ్ళ జీవితాన్ని మరోలా తీసుకెళ్తుంది. రాధే ఒక వీధి రౌడీల గోడవలో దాడికి గురవుతాడు. ఈ దాడిలో అతని తలకు తీవ్రమైన గాయం కావడంతో మానసిక సమస్యలు వస్తాయి. అతన్ని చికిత్స కోసం ఒక మానసిక ఆసుపత్రిలో చేర్పిస్తారు.
చాలా కాలం తర్వాత రాధే తిరిగి కోలుకుని ఆశ్రమం నుండి తప్పించుకుంటాడు. అతను నేరుగా నిర్జరను చూడాలని ఆమె ఇంటికి వెళ్తాడు. కానీ దురదృష్టవశాత్తు అప్పటికే నిర్జరకి బలవంతంగా మరొకరితో నిశ్చితార్థం జరగడంతో ఆత్మహత్య చేసుకుని చనిపోతుంది. ఆమె మరణవార్త విని కుంగిపోయిన రాధే, భరించలేక తిరిగి మానసిక ఆశ్రమానికే వెళ్ళిపోతాడు. ఈ చిత్రం ఒక గొప్ప ప్రేమకథగా మిగిలిపోతూనే అత్యంత విషాదకరంగా ముగుస్తుంది.
Read Also : ముసుగు సుందరిని ప్రేమించే కోటీశ్వరుడు… ఓటీటీలో ఆకట్టుకుంటున్న సరికొత్త ప్రేమ కథ
Share
Varanasi: మహేష్ బాబు కోసం ఎప్పుడు చేయని పనికి మొదటిసారి ఒప్పుకున్న రాజమౌళి..!
Municipal Elections: హుజురాబాద్ కాంగ్రెస్లో ముదిరిన టికెట్ల సెగ.. ఇన్చార్జ్ ప్రణవ్ వైఖరిపై ఆశావహుల తిరుగుబాటు
