True Crime Documentary Series: దశాబ్దాల పాటు పోలీసులకు చిక్కకుండా తప్పించుకున్న ఓ డ్రగ్ డాన్‌… చివరికి ఓ ప్రైవేట్ విమాన ప్రయాణంతో అమెరికా అధికారుల చేతికి చిక్కాడు. అతడిని పట్టించింది ఎవరు ? సొంతవాళ్లే వెన్నుపోటు పొడిచారా ? లేక దీని వెనుక ఏదైనా రహస్య ఆపరేషన్ ఉందా ? ఈ ప్రశ్నల చుట్టూ అల్లుకున్న ఆసక్తికరమైన ఇన్వెస్టిగేటివ్ డాక్యుమెంటరీ సిరీస్ ‘ది ఫాల్ ఆఫ్ ఎల్ మాయో’ (The Fall of El Mayo). నిజ జీవితంలో జరిగిన సంచలన ఘటనను ఆధారంగా చేసుకుని తెరకెక్కించిన ఈ సిరీస్ తాజాగా ఓటీటీలోకి వచ్చేసింది. మరి ఓటీటీ మూవీ లవర్స్ ఈ డాక్యుమెంటరీ సిరీస్ ను ఎక్కడ చూడవచ్చు ? అంటే…
ఇస్మాయెల్ ‘ఎల్ మాయో’ జాంబాడా గార్సియా… మెక్సికోలోని సినాలోవా కార్టెల్ సహవ్యవస్థాపకుడు. డ్రగ్స్ అక్రమ రవాణా ప్రపంచంలో అత్యంత కీలకమైన వ్యక్తిగా గుర్తింపు పొందిన అతడు, ఎల్ చాపో గుజ్మాన్ తో కలిసి పని చేశాడు. ఎన్నో ఏళ్లుగా అధికారులకు చిక్కకుండా తప్పించుకుంటూ వచ్చిన ఎల్ మాయో జీవితం 2024 జూలై 25న అనూహ్యమైన మలుపు తిరిగింది. ఆ రోజు జోక్విన్ గుజ్మాన్ లోపెజ్‌తో కలిసి ఓ ప్రైవేట్ విమానంలో న్యూ మెక్సికోలోని చిన్న విమానాశ్రయానికి చేరుకున్న ఎల్ మాయోను అమెరికా అధికారులు అదుపులోకి తీసుకున్నారు.
ఇంతకాలం ఎవరికీ చిక్కని అతడు ఒక్కసారిగా ఎలా పట్టుబడ్డాడు ? ఆ విమాన ప్రయాణం వెనుక అసలు ఏం జరిగింది ? అతడిని అక్కడికి తీసుకెళ్లింది కిడ్నాప్‌ లో భాగంగానా, నమ్మకద్రోహం వల్లనా, లేక తెరవెనుక సాగిన రహస్య ఆపరేషన్ కారణంగానా ? ఈ అంశాలే డాక్యుమెంటరీలో ప్రధాన అంశాలు. మూడు ఎపిసోడ్‌లుగా రూపొందిన ఈ సిరీస్‌లో ప్రత్యేక ఇంటర్వ్యూలు, ఇంతకుముందు బయటకు రాని ఆర్కైవ్ దృశ్యాలు, మెక్సికోతో పాటు అమెరికాకు చెందిన వందలాది కోర్టు రికార్డులను ఉపయోగించారు. భద్రతా విభాగాల వ్యక్తులు, రాజకీయ నాయకులు, జర్నలిస్టులు, కార్టెల్ కు దగ్గరగా ఉన్నవారి అభిప్రాయాల ద్వారా ఈ ఘటనలోని వివిధ కోణాలను పరిశీలిస్తారు. ఈ క్రమంలో ఎల్ మాయో అరెస్టు వెనుక ఉన్న అనుమానాలు, అధికార వ్యవస్థలతో అతడికి సంబంధించిన పరిణామాలు, అతడి పతనానికి దారి తీసిన పరిస్థితులు తెరపైకి వస్తాయి.
‘ది ఫాల్ ఆఫ్ ఎల్ మాయో’ మూడు ఎపిసోడ్‌ ల లిమిటెడ్ డాక్యుమెంటరీ సిరీస్. అక్టోబర్ 29న నెట్‌ఫ్లిక్స్‌ (Netflix)లో విడుదలైంది. ఇంగ్లీష్, స్పానిష్ భాషలకు సంబంధించిన ఈ సిరీస్ లో డ్రగ్ మాఫియా ప్రపంచం, దర్యాప్తు, అధికార పోరాటాలు, నమ్మకద్రోహం వంటి అంశాలను నిజ జీవిత ఆధారాలతో చూపించారు. ఎల్ మాయో ఎలా పట్టుబడ్డాడు ? అతడి పతనం వెనుక ఉన్న అసలు కారణాలేంటి ? అనే విషయాలు తెలుసుకోవాలనుకునే ట్రూ క్రైమ్ అభిమానులకు ఇది ఆసక్తికరమైన ఆప్షన్. దర్శకులు డారెన్ ఫోస్టర్ (Darren Foster), మిగెల్ ఫెర్నాండెజ్ ఫ్లోరెస్ (Miguel Fernández Flores) ఈ సిరీస్‌ను రూపొందించారు. ఇది కల్పిత కథ కాదు. నిజంగా జరిగిన ఘటనను పరిశోధనాత్మకంగా చూపించే క్రైమ్ డాక్యుమెంటరీ. అందుకే సాధారణ గ్యాంగ్‌స్టర్ కథల కంటే ఇందులోని నిజాలు, సాక్ష్యాలు, ఇంకా సమాధానం దొరకని ప్రశ్నలు ప్రేక్షకుల్లో ఆసక్తిని పెంచుతాయి.
Read Also: ది గ్రేట్ పంజాబ్ రాబరీ… సినిమాను తలపించే రియల్ హీస్ట్… గూస్‌బంప్స్ గ్యారెంటీ
Share
జగిత్యాల జిల్లాలో ఓ రైతు అద్భుత ఆలోచన.. సన్నవడ్ల కొనుగోలులో సంచలనం!
హుజురాబాద్‌లో ఇందిరమ్మ ఇళ్ల పథకం వివాదం.. కోర్టు ఉత్తర్వులున్న భూమిలో నిర్మాణం!
