Malayalam Thriller: మలయాళ సినిమాలంటేనే కొత్త కాన్సెప్టులు, ఊహించని మలుపులకు పెట్టింది పేరు. ముఖ్యంగా సాధారణ కథల్లోనే అసాధారణమైన అంశాలను జోడిస్తూ ప్రేక్షకులను ఆకట్టుకుంటుంటారు మలయాళం మేకర్స్. ఇప్పుడు అలాంటి ఓ విభిన్నమైన కథతో వచ్చిన మలయాళ చిత్రం ‘ఇట్స్ ఎ మెడికల్ మిరాకిల్’ (It’s a Medical Miracle) ఓటీటీలో సందడి చేస్తోంది. ప్రమాదం తర్వాత కోమాలోకి వెళ్లిన ఓ యువకుడు తిరిగి స్పృహలోకి రావడం, ఆ తర్వాత అతడికి వచ్చిన వింత శక్తి అతని జీవితాన్ని పూర్తిగా మార్చేయడం ఈ సినిమా ప్లాట్. ఇప్పటికే మలయాళంలో స్ట్రీమింగ్ అవుతున్న ఈ సినిమా ఇప్పుడు తెలుగు వెర్షన్‌లోనూ ఓటీటీలో అందుబాటులో ఉంది. మరి ఈ సినిమాను తెలుగులో ఏ ఓటీటీలో చూడవచ్చు ? అన్న వివరాల్లోకి వెళ్తే…
రూబెన్ రోడ్డు ప్రమాదంలో తీవ్రంగా గాయపడతాడు. దాదాపు రెండేళ్ల పాటు కోమాలోనే ఉంటాడు. అతడి పరిస్థితి చూసి కుటుంబ సభ్యులు ఆశలు వదులుకునే స్థితికి వస్తారు. వైద్యులు కూడా ఇక అతడు కోలుకోవడం కష్టమనే అభిప్రాయానికి వస్తారు. కానీ అనూహ్యంగా రూబెన్ స్పృహలోకి వస్తాడు. అందరూ మెడికల్ మిరాకిల్ గా భావించే ఈ పరిణామం తర్వాతే అతడి జీవితంలో అసలైన సమస్య మొదలవుతుంది.
కోమా నుంచి బయటకు వచ్చిన రూబెన్ కు ఓ విచిత్రమైన పవర్ వస్తుంది. చుట్టుపక్కల ఉన్న చిన్న చిన్న శబ్దాలు కూడా అతడికి చాలా స్పష్టంగా వినిపిస్తుంటాయి. దూరంగా ఉన్నవాళ్లు మాట్లాడుకునే మాటలు సైతం అతడి చెవులకు చేరుతుంటాయి. మొదట ఈ కొత్త శక్తి ఏంటో అర్థంకాక రూబెన్ ఇబ్బంది పడతాడు. సాధారణంగా వినిపించని శబ్దాలు కూడా అతడిని ఉక్కిరిబిక్కిరి చేస్తాయి. ఈ సామర్థ్యం అతడికి వరమా, శాపమా అన్న సందేహం మొదలవుతుంది.
అయితే ఆసుపత్రిలో ఉన్న సమయంలో తనను కోమా నుంచి బయటకు తీసుకురావడంలో కీలకంగా నిలిచిన ఓ నర్స్ గొంతు అతడికి గుర్తుంటుంది. ఆ గొంతును వెతుక్కుంటూ రూబెన్ ప్రయాణం మొదలుపెడతాడు. కానీ ఈ అన్వేషణ అతడిని ఊహించని పరిస్థితుల్లోకి నెట్టేస్తుంది. ముసుగుల వెనుక దాగిన వ్యక్తులు, గతానికి సంబంధించిన రహస్యాలు, ప్రతీకారంతో నిండిన ప్రమాదకరమైన వ్యవహారాల మధ్య చిక్కుకుంటాడు. తనకు వినిపించే ప్రతి మాటలోనూ ఓ క్లూ ఉంటుంది. అదే సమయంలో అది తనను మరో ప్రమాదంలోకి నెట్టే అవకాశం కూడా ఉంటుంది. మరి రూబెన్‌కు వచ్చిన ఈ అసాధారణ వినికిడి శక్తి ఆ రహస్యాలను ఛేదించడానికి ఉపయోగపడుతుందా ? తనను కాపాడిన నర్స్‌ను అతడు కనుగొంటాడా ? ఈ ప్రయాణంలో ఎదురయ్యే ప్రమాదాల నుంచి ఎలా బయటపడతాడు ? అనేదే సినిమా కథ.
‘ఇట్స్ ఎ మెడికల్ మిరాకిల్’ సినిమా మనోరమ మ్యాక్స్ (Manorama MAX)లో తెలుగు, మలయాళం, తమిళం, కన్నడ భాషల్లో అందుబాటులో ఉంది. అక్టోబర్ 15 నుంచి ఓటీటీలో స్ట్రీమింగ్ అవుతోంది. ఈ సినిమాలో రూబెన్ పాత్రలో సంగీత్ ప్రతాప్ (Sangeeth Prathap) నటించగా, షరాఫుద్దీన్ (Sharaf U Dheen), అఖిలా భార్గవన్ (Akhila Bhargavan) కీలక పాత్రల్లో కనిపిస్తారు. కొట్టాయం నజీర్ (Kottayam Nazeer), పార్వతి ఆర్. కృష్ణ (Parvathy R. Krishna), ఆనంద్ మన్మథన్ (Anand Manmadhan), కిరణ్ పీతాంబరన్ (Kiran Peethambaran) తదితరులు ఇతర పాత్రలు పోషించారు. శ్యామిన్ గిరీష్ (Shyamin Gireesh) దర్శకత్వం వహించారు. డిఫరెంట్ థ్రిల్లర్ సినిమాలు చూడాలి అనుకునే వాళ్ళు అస్సలు మిస్ అవ్వొద్దు. అందులోనూ తెలుగులోనే ఉందని గుర్తు పెట్టుకోండి.
Read Also: యుద్ధభూమిలో చావును జయించిన మృత్యుంజయుడు… ముందుంది ముసళ్ల పండగ… హై-వోల్టేజ్ సస్పెన్స్ థ్రిల్లర్
Share
సికింద్రాబాద్ రైల్ నిలయం వద్ద టీపీసీసీ మెరుపు ధర్నా..!
దేశ రాజకీయాల్లో మళ్లీ బిఆర్‌ఎస్‌ ఎంట్రీ.. ప్లాన్ వర్కౌట్ అయ్యేనా..?
