కండ బలం గొప్పదా? బుద్ధిబలం గొప్పదా? అంటే మనం వెంటనే కండ బలం అని చెప్పేస్తాం. కానీ, మనిషికి రెండూ ముఖ్యమే. బుద్ధిని ఉపయోగిస్తూ.. కండ బలాన్ని ప్రదర్శిస్తే దానికో అర్థం ఉంటుంది. కాదని మూర్ఖంగా కండబలాన్నే నమ్ముకుంటే.. చివరికి ఏమవుతుందనేది.. ఈ ముగ్గురు స్నేహితుల కథ చెబుతుంది.
ఇటీవల Netflixలో విడుదలైన Weak Hero – Class 1 వెబ్ సీరిస్ ప్రేక్షకులను విశేషంగా ఆకట్టుకుంటోంది. ఈ సీరిస్ హిందీలో అందుబాటులో ఉంది. యూత్ యాక్షన్ డ్రామా జోనర్స్ ఇష్టపడేవారికి ఈ సీరిస్ బాగా నచ్చుతుంది. ఓ కొరియా పాపులర్ వెబ్ టూన్ స్టోరీ ఆధారంగా ఈ సీరిస్‌ను తెరకెక్కించారు. స్కూల్ లైఫ్‌లో బుల్లీయింగ్ (ర్యాంగింగ్) వల్ల విద్యార్థులు ఎంతగా సఫర్ అవుతున్నారనేది ఈ సీరిస్‌లో చూడవచ్చు. చివరికి మంచి మిత్రులు కూడా శత్రువులుగా మారి ప్రాణాలు తీసే స్థాయికి ఎలా మారతారనేది ఈ సీరిస్‌లో చూడవచ్చు. ఈ సీరిస్ మార్చి 25 నుంచి స్ట్రీమింగ్‌లోకి వచ్చింది. మొత్తం ఎనిమిది ఎపిసోడ్స్. ఒక్కసారి స్టార్ట్ చేస్తే.. ఆపడం కష్టమే. ఇక కథలోకి వెళ్తే..
కథ:
‘వీక్ హీరో క్లాస్ 1’ కథ యాన్ సీ-యున్ (పార్క్ జీ-హూన్) అనే టాప్ స్టూడెంట్ చుట్టూ తిరుగుతుంది. క్లాస్‌లో ఎవరితో మాట్లాడడు. కేవలం చదువే అతడి ప్రపంచం. అందుకే.. ఆ క్లాస్‌లో కొంతమందికి అతడు నచ్చడు. ఎప్పుడూ మూడీగా, ఏదో కోల్పోయినట్లు కనిపిస్తాడు. ఎవరి జోలికి వెళ్లడు. బయటకు అతడు చాలా సైలెంట్‌గా, బలహీనంగా కనిపిస్తాడు. కానీ, అతడి తెలివి, ధైర్యమే హీరోగా నిలబెడతాయి. ఓ రోజు సి-యున్‌ను తన క్లాస్ మేట్ బుల్లీంగ్ చేయడానికి ప్రయత్నిస్తాడు. చివరికి ఒక డ్రగ్ ఇచ్చి.. పరీక్ష రాయనివ్వకుండా చేస్తాడు. ఆ తర్వాత రోజు సి-యున్ నిజస్వరూపం చూడాల్సి వస్తుంది. తన పెన్, పుస్తకాన్ని ఆయుధంగా మలచుకొని.. తనకు డ్రగ్స్ ఇచ్చిన విద్యార్థులను చితకబాదుతాడు. అదే ఈ కథకు కీలక మలుపు. ఈ క్రమంలోనే సి-యున్‌కు.. ఆన్ సూ-హో (చోయ్ హ్యూన్-వూక్), ఓహ్ బీమ్-సియోక్ (హాంగ్ క్యుంగ్) అనే ఇద్దరు స్నేహితులు తోడవుతారు. వారికి ఎదురయ్యే సమస్యలను బుద్ధిబలంతో ఎదుర్కొంటారు. కానీ, సమస్యలు క్రమేనా కఠినంగా మారుతాయి. సి-యున్ ఇద్దరు స్నేహితుల్లో ఒకరు.. శత్రువుగా మారతాడు. అతడి వల్ల మరో స్నేహితుడు కోమాలోకి వెళ్లి చావు బతుకులతో పోరాడతాడు. మరి సి-యున్.. శత్రువుగా మారిన ప్రాణ స్నేహితుడిపై రివేంజ్ తీర్చుకుంటాడా? చివరికి ఏమవుతుందనేది ఈ సీరిస్ చూసే తెలుసుకోండి.
విశ్లేషణ:
కొరియా సీరిస్‌లు క్యారెక్టర్స్ గురించి ప్రత్యేకంగా చెప్పక్కర్లేదు. రెగ్యులర్‌గా చూసేవారికి వారి నటన అలవాటు అవుతుంది. అప్పుడప్పుడు చూసేవారికి కాస్త కొత్తగా అనిపిస్తుంది. ఈ సీరిస్‌లో ఉన్న కుర్రాళ్లు కొన్ని సీన్లలో జీవించారు. ఇందులోని భావోద్వేగ సన్నివేశాలు హత్తుకుంటాయి. స్నేహితుల మధ్య ఉండే ఆ బాండ్‌ను చాలా చక్కగా చూపించారు. సి-యున్ తన పాత్రలో ఒదిగిపోయాడు. అయితే.. కథనం చాలా స్లోగా ఉంటుంది. కథలోకి వెళ్లడానికి టైమ్ పడుతుంది. అలాగే.. సి-యున్ అంత మూడీగా ఉండటానికి కారణం ఏమటనేది కొన్ని ఎపిసోడ్స్ తర్వాత తెలుస్తుంది. అయితే, ప్రధాన పాత్ర అంత డల్‌గా కనిపించడం కొంతమందికి నచ్చకపోవచ్చు. కానీ, కథాపరంగా అది అవసరం. అందుకే.. ఈ సీరిస్ టైటిల్ ‘వీక్ హీరో’. దానికి తగినట్లే అతడి క్యారెక్టర్ ఉంటుంది. కొన్ని సీన్లకు గూజ్‌బంప్స్ రావడం పక్కా.
Also Read: మనుషులు, చెట్ల డీఎన్ఏతో మానవ జాతిని అంతం చేసే కొత్త క్రియేచర్
రెండవ సీజన్ కూడా రెడీ..
ఈ సిరీస్ సాధారణ హైస్కూల్ డ్రామాలకు భిన్నంగా ఉంటుంది. బుల్లీయింగ్ కఠిన వాస్తవాలను కళ్లకు కట్టినట్లు చూపించారు. యాక్షన్ సన్నివేశాలు బాగుంటాయి. ముఖ్యంగా సీ-యున్ తన బుద్ధితో శత్రువులను ఎదుర్కొనే తీరు ఆకట్టుకుంటుంది. ఈ బ్రెయిన్ యాక్షన్ శైలి కొత్తగా అనిపిస్తుంది. దీనికి కొనసాగింపుగా 2వ సీజన్ కూడా సిద్ధమవుతోంది. పార్క్ జీ-హూన్ తన నటనతో సీ-యున్ పాత్రకు ప్రాణం పోశాడు. అతని ఎమోషనల్ డెప్త్, నిశ్శబ్దంలోని శక్తి సిరీస్‌ను ఉన్నత స్థాయికి తీసుకెళ్లాయి. చోయ్ హ్యూన్-వూక్, హాంగ్ క్యుంగ్ కూడా తమ పాత్రల్లో అద్భుతంగా ఒదిగిపోయారు. సహాయ పాత్రల్లో లీ యాన్ (యంగ్-యీ), షిన్ సియుంగ్-హో (జియోన్ సియోక్-డే) కూడా తమ నటనతో మెప్పించారు.
Weak Hero Class 1 Trailer
Share
Sitara: సితారా చేతుల మీదుగా పంజాగుట్టలో PMJ జూవెలర్స్ గ్రాండ్ ఓపెనింగ్..
Monalisa : మోనాలిసాకు షాక్... ఆఫర్ ఇచ్చిన డైరెక్టర్ రే*ప్ కేసులో అరెస్ట్
