వెజ్ ఓట్స్ ఉప్మా.. డయాబెటిస్ ఉన్నవారికి, డైట్ చేసేవారికి పర్ఫెక్ట్ బ్రేక్‌ఫాస్ట్!

Veg Oats Upma: ఉదయం లేవగానే హడావిడిలో పడి చాలామంది టిఫిన్ చేయడం మానేస్తుంటారు. మరికొందరు బరువు తగ్గాలని రకరకాల డైట్లు ఫాలో అవుతుంటారు. ఇలాంటి వారందరికీ ‘వెజ్ ఓట్స్ ఉప్మా’ ఒక అద్భుతమైన ఆప్షన్. ఇది కేవలం పది నిమిషాల్లో తయారవ్వడమే కాకుండా.. కడుపు నిండుగా ఉంచి రోజంతా ఉత్సాహంగా ఉండేలా చేస్తుంది. కూరగాయల కలయికతో చేసే ఈ ఉప్మా ఆరోగ్యానికి ఎంతో మేలు చేస్తుంది.

కావలసిన పదార్థాలు:

ఒక కప్పు రోల్డ్ ఓట్స్ లేదా ఇన్‌స్టంట్ ఓట్స్, ఒక మధ్యస్థ పరిమాణంలో ఉన్న ఉల్లిపాయ, రెండు పచ్చిమిర్చి, చిన్న క్యారెట్ ముక్క, కొన్ని పచ్చి బఠానీలు, అర టీస్పూన్ అల్లం తరుగు, తాలింపు కోసం ఆవాలు, జీలకర్ర, మినపప్పు, కొద్దిగా కరివేపాకు, రెండు చెంచాల నూనె లేదా నెయ్యి, సరిపడా ఉప్పు, నిమ్మరసం సిద్ధం చేసుకోండి.

Also Read: కేవలం 3 వస్తువులతో కమ్మని వెనీలా ఐస్‌క్రీమ్.. పిల్లల ఫేవరెట్ డిజర్ట్ అయిపోద్ది!

తయారీ విధానం ఇలా:

ఒక పాన్ తీసుకుని అందులో ఓట్స్‌ను వేసి దోరగా వేయించి పక్కన పెట్టుకోవాలి. ఇప్పుడు అదే పాన్‌లో రెండు చెంచాల నూనె వేసి వేడయ్యాక ఆవాలు, జీలకర్ర, మినపప్పు, కరివేపాకు వేసి తాలింపు పెట్టుకోవాలి. ఆ తర్వాత సన్నగా తరిగిన ఉల్లిపాయలు, పచ్చిమిర్చి, అల్లం ముక్కలు వేసి వేయించాలి. అవి కాస్త వేగాక క్యారెట్ ముక్కలు, బఠానీలు వేసి మరికొంత సేపు మగ్గనివ్వాలి.

కూరగాయలు మెత్తబడ్డాక ఒకటిన్నర కప్పుల నీళ్లు పోసి సరిపడా ఉప్పు వేయాలి. నీళ్లు బాగా మరిగిన తర్వాత వేయించి పెట్టుకున్న ఓట్స్‌ను వేస్తూ ఉండలు కట్టకుండా కలుపుకోవాలి. మంటను తగ్గించి మూత పెడితే ఓట్స్ నీటిని పీల్చుకుని మెత్తగా ఉడుకుతాయి. చివరగా కొత్తిమీర చల్లుకుని, కొంచెం నిమ్మరసం పిండుకుంటే వేడివేడి వెజ్ ఓట్స్ ఉప్మా రెడీ.