రీస్టార్ట్ చేస్తే ఫోన్ స్పీడ్ పెరుగుతుందా? ఇది తెలిస్తే మళ్లీ ఆ పని చేయరు!

Smartphone Speed Tips: మనలో చాలామందికి ఫోన్ కొద్దిగా స్లో అయినా.. యాప్స్ ఆగిపోయినా వెంటనే రీస్టార్ట్ చేసే అలవాటు ఉంటుంది. అలా రీస్టార్ట్ చేయగానే ఫోన్ స్పీడ్ పెరిగినట్లు అనిపిస్తుంది. కానీ ప్రతిసారీ ఇలా ఫోన్‌ను రీస్టార్ట్ చేస్తూ ఉంటే నిజంగానే దాని వేగం పెరుగుతుందా? లేక ఇదొక అపోహ మాత్రమేనా అనే సందేహం చాలామందిలో ఉంటుంది. ఇప్పుడా విషయంలో క్లారిటీ తెచ్చుకుందాం రండి..

రీస్టార్ట్ చేస్తే ఏం జరుగుతుంది?

ఫోన్‌ను రీస్టార్ట్ చేసినప్పుడు ఆపరేటింగ్ సిస్టమ్ ఒకసారి పూర్తిగా ఆగిపోయి మళ్లీ కొత్తగా ప్రారంభమవుతుంది. బ్యాక్‌గ్రౌండ్‌లో రన్ అయ్యే యాప్స్ అన్నీ క్లోజ్ అవుతాయి. ర్యామ్‌లో పేరుకుపోయిన తాత్కాలిక డేటా తుడిచిపెట్టుకుపోతుంది. దీనివల్ల ఫోన్‌లో చిన్న చిన్న సాఫ్ట్‌వేర్ సమస్యలు ఉంటే వెంటనే తగ్గిపోతాయి.

ప్రతిరోజూ రీస్టార్ట్ అవసరమా?

ఇప్పటి స్మార్ట్‌ఫోన్లు చాలా ఆధునికతతో కూడుకున్నవి. సిస్టమ్ మెమరీని, బ్యాక్‌గ్రౌండ్ యాప్‌లను అవి సొంతంగానే చక్కగా మేనేజ్ చేసుకోగలవు. కాబట్టి పాతకాలపు కంప్యూటర్లలాగా రోజు ఉదయాన్నే ఫోన్‌ను రీస్టార్ట్ చేయాల్సిన అవసరం లేదు. తరచూ రీస్టార్ట్ చేయడం వల్ల ఫోన్ ప్రాసెసర్ వేగం పెరగకపోవడంతో పాటు ఎక్కువ ఛార్జింగ్ కూడా ఖర్చవుతుంది.

Also Read: ఇంట్లోనే కెఫే లాంటి కాఫీ రావాలా? రూ.15,000 బడ్జెట్‌లో బెస్ట్ కాఫీ మెషిన్స్ ఇవే!

ఎప్పుడు రీస్టార్ట్ చేయాలి?

ఫోన్ స్క్రీన్ సడన్‌గా స్పందించకపోవడం, యాప్స్ మాటిమాటికీ క్రాష్ కావడం లేదా ఫోన్ బాగా స్లో అయినప్పుడు రీస్టార్ట్ చేయడం మంచిది. అలాగే వైఫై, బ్లూటూత్ కనెక్ట్ కాకపోయినా లేదా ఏదైనా కొత్త సాఫ్ట్‌వేర్ అప్‌డేట్ చేసిన తర్వాత ఫోన్ సరిగ్గా పనిచేయకపోయినా ఒకసారి రీస్టార్ట్ చేస్తే సిస్టమ్ మళ్లీ మామూలు స్థితికి వస్తుంది.

స్పీడ్ పెంచే ఇతర మార్గాలున్నాయా?

కేవలం రీస్టార్ట్ మీదనే ఆధారపడకుండా ఫోన్ స్టోరేజ్ ఖాళీగా ఉందో లేదో చూసుకోవాలి. అవసరం లేని యాప్‌లను డిలీట్ చేయాలి. ఫోన్ సాఫ్ట్‌వేర్‌ను ఎప్పటికప్పుడు అప్‌డేట్ చేస్తూ ఉండాలి. అంతేకాకుండా ప్లేస్టోర్‌లో ఉండే ర్యామ్ క్లీనర్, పెర్ఫార్మెన్స్ బూస్టర్ యాప్‌లను అస్సలు వాడకూడదు. ఇవి ఫోన్‌ను వేగవంతం చేయడానికి బదులు ఇంకా స్లో చేస్తాయి.

Also Read: వాషింగ్ మెషీన్లపై అమెజాన్ సంచలన ఆఫర్లు.. రూ.27 వేలకే బ్రాండెడ్ మోడల్!