New Phone Charging: మనం ఎంతో ఆశ పడి కొత్త స్మార్ట్‌ ఫోన్ కొన్న తర్వాత, దానిని ఎలా వాడాలి, బ్యాటరీ లైఫ్ ఎలా కాపాడుకోవాలి అనే దానిపై చాలా అపోహలు ఉంటాయి. ముఖ్యంగా “కొత్త ఫోన్‌ను మొదటి సారి రాత్రంతా ఛార్జ్ పెట్టాలి” అని మన పెద్దలు చెబుతుంటారు. కానీ.. అది కేవలం నికెల్-కాడ్మియం బ్యాటరీలు ఉన్న పాత కాలపు ఫోన్లకు మాత్రమే వర్తించేది. ప్రస్తుత స్మార్ట్‌ ఫోన్లలో లేటెస్ట్ లిథియం-అయాన్ లేదా లిథియం-పాలిమర్ బ్యాటరీలను వాడుతున్నారు. వీటి పని తీరు పూర్తిగా భిన్నంగా ఉంటుంది. కొత్త ఫోన్ ఛార్జింగ్‌కు సంబంధించి పూర్తి వివరాలు ఇప్పుడు తెలుసుకుందాం.
సాధారణంగా కొత్త స్మార్ట్‌ ఫోన్ బాక్స్ ఓపెన్ చేయగానే దాని బ్యాటరీ సుమారు 50% నుంచి 70% వరకు ఛార్జ్ చేయబడి ఉంటుంది. ఇంటర్నేషనల్ షిప్పింగ్ నిబంధనల ప్రకారం బ్యాటరీలు పూర్తిగా నింపకుండా సగం ఛార్జ్‌తో పంపిణీ చేస్తారు. కాబట్టి మీరు ఫోన్ తీయగానే గంటల తరబడి ఛార్జ్ పెట్టాల్సిన అవసరం లేదు. అది సుమారు 20% లేదా 30%కి పడి పోయే వరకు వాడుకోవచ్చు.
కొత్త ఫోన్‌కు మొదటిసారి ప్రత్యేకంగా 8 లేదా 10 గంటలు ఛార్జ్ చేయాల్సిన అవసరం లేదు. బాక్స్ లోపల వచ్చే ఒరిజినల్ ఫాస్ట్ ఛార్జర్‌ని ఉపయోగించి, ఫోన్ 100% నిండే వరకు ఛార్జ్ చేస్తే సరి పోతుంది. ఫాస్ట్ ఛార్జింగ్ టెక్నాలజీ కారణంగా ప్రస్తుత ఫోన్లు కేవలం 45 నిమిషాల నుంచి 1 గంటలోనే పూర్తిగా ఛార్జ్ అవుతున్నాయి. సిగ్నల్ రాగానే ఛార్జర్ నుంచి డిస్కనెక్ట్ చేయెచ్చు.
20-80 రూల్: బ్యాటరీ ఎప్పుడూ పూర్తిగా 0% కి పడిపోనివ్వకండి. అలాగే 100% నిండిన తర్వాత ఎక్కువసేపు ప్లగ్‌లో ఉంచకుండా.. 20% నుంచి 80% మధ్యలో మెయింటైన్ చేయడం వల్ల బ్యాటరీ ఎక్కువ కాలం పాడవకుండా ఉంటుంది.
ఓవర్ హీటింగ్ : గేమ్స్ ఆడేటప్పుడు లేదా హై-ఎండ్ యాప్స్ వాడేటప్పుడు ఫోన్ ఛార్జింగ్ పెట్టకూడదు. ఇది బ్యాటరీని వేడెక్కించి దాని లైఫ్‌ను త్వరగా దెబ్బ తీస్తుంది.
ఒరిజినల్ ఛార్జర్ : మార్కెట్లో దొరికే డూప్లికేట్ లేదా లోకల్ ఛార్జర్లను ఉపయోగించడం వల్ల వోల్టేజ్ హెచ్చుతగ్గులు జరిగి బ్యాటరీ పేలిపోయే ప్రమాదం ఉంది. ఎప్పుడూ కంపెనీ అందించిన లేదా సర్టిఫైడ్ ఛార్జర్లను మాత్రమే వాడాలి.
Also Read: సీసీ కెమెరా కొనాలనుకుంటున్నారా ?ఈ మోడల్స్‌ని మించినవి లేవు తెలుసా?
ఒకవేళ మీ ఫోన్ బ్యాటరీ పాడైపోయి కొత్తది మార్చాల్సి వస్తే లేదా ప్రయాణాల్లో ఛార్జింగ్ కోసం మంచి పవర్‌ బ్యాంక్ కొనాలనుకుంటే వాటి అంచనా ధరలు.
మొబైల్ బ్యాటరీ రీప్లేస్‌మెంట్ ఖర్చు: బ్రాండ్, మోడల్‌ను బట్టి రూ. 1,000 నుంచి రూ. 3,500 వరకు ఉంటుంది.
బ్రాండెడ్ పవర్‌బ్యాంక్స్ (10000mAh – 20000mAh): రూ. 1,200 నుంచి రూ. 2,800 మధ్య లభిస్తాయి.
కొత్త ఫోన్ కొన్న తర్వాత దానిని ప్రత్యేకంగా గంటల తరబడి ఛార్జ్ చేయాల్సిన పని లేదు. సరైన ఛార్జింగ్ పద్ధతులు పాటించడం ద్వారా మీ స్మార్ట్‌ ఫోన్ బ్యాటరీ లైఫ్‌ను ఈజీగా రెట్టింపు చేసుకోవచ్చు. చిన్న చిన్న జాగ్రత్తలతో మీ ఫోన్ బ్యాటరీని ఎల్లప్పుడూ జాగ్రత్తగా ఉంచుకోండి!
Share
ఆ హీరోయిన్ కు ఫిదా అయ్యానంటున్న జగపతి బాబు..తన క్రష్ బయట పెట్టాడుగా?
బీజేపీలో బతుకమ్మ రాజకీయ మంటలు.. మరోసారి భగ్గుమన్న నేతల ఆధిపత్య పోరు!
