WhatsApp Account Security: మీ వాట్సాప్‌ను వేరే వాళ్లు ఉపయోగిస్తున్నారా.. ఇలా తెలుసుకోండి

WhatsApp Account Security: ప్రపంచంలో అత్యధికంగా ఉపయోగించే మెసేజింగ్ యాప్ లలో వాట్సాప్ కూడా ఒకటి. ఈ యాప్ ద్వారా ప్రస్తుతం అనేక సమాచార మార్పిడి జరుగుతోంది. ఇలాంటి క్రమంలో మీ ఫోన్ వేరే వాళ్ల చేతుల్లోకి వెళితే అంతే సంగతులు. అది గోప్యత ఉల్లంఘనకు గురికావడంతోపాటు మీ డేటాను దుండగులు సేకరించే అవకాశం ఉంది.

గతంలో కూడా అనేకసార్లు..

గతంలో కూడా ఇలా సమాచార మార్పిడి జరిగి పలువురు నేరగాళ్లు కొంత మంది వ్యక్తిగత వివరాలు, వీడియోలను సేకరించి సోషల్ మీడియాలో పోస్ట్ చేస్తామని బెదిరింపులకు దిగారు. ఇలాంటి పరిస్థితుల్లో ఎవరైనా మీ వాట్సాప్ ఖాతాను రహస్యంగా ఉపయోగిస్తున్నారో లేదా అనేది తెలుసుకోవడం కూడా చాలా ముఖ్యం. దీని గురించి తెలుసుకోవడం ద్వారా మీరు మీ వాట్సాప్ వివరాలను మరింత భద్రంగా ఉంచుకోవచ్చు.

మెటా కూడా క్లారిటీ

మీ ఫోన్ ఎవరికైనా దొరికితే ఈ యాప్ ద్వారా చేసే చాట్‌లు లేదా వీడియో, ఆడియో కాల్‌లు పూర్తిగా సేకరించుకునే ఛాన్స్ ఉందని వాట్సాప్ ఇప్పటికే తెలిపింది. ఇలాంటి పరిస్థితుల్లో మీరు కాకుండా మరెవరూ కూడా మీ వాట్సాప్ యాక్సెస్ చేయకుండా చేసుకోవచ్చు. ఇలా చేయడం ద్వారా మీ వాట్సాప్ ఖాతా సమాచారాన్ని భద్రంగా ఉంచుకోవచ్చు. దీంతోపాటు మీ డేటా దుర్వినియోగం కాకుండా కాపాడుకోవచ్చు.

ఎలా చేయాలంటే..

ఇలాంటి క్రమంలో మీ వాట్సాప్ ఖాతాను వేరొకరు ఉపయోగిస్తున్నారో లేదో తనిఖీ చేయడానికి, మీరు ఎలాంటి థర్డ్ పార్టీ యాప్‌ను ఇన్‌స్టాల్ చేయవలసిన అవసరం లేదు. దీన్ని తనిఖీ చేసుకోవడం కూడా చాలా సులభం. దీని కోసం మీరు మీ ఫోన్‌లోని వాట్సాప్‌ను తాజాగా అప్‌డేట్ చేయాలి. ఆ తర్వాత ఏం చేయాలనే విషయాలను ఇక్కడ చూద్దాం.

దీని కోసం మీరు ముందుగా మీ వాట్సాప్‌లోకి వెళ్లండి
తర్వాత మీరు యాప్ హోమ్ పేజీలో కుడివైపు ఎగువ భాగంలో ఉన్న మూడు చుక్కలపై క్లిక్ చేయండి
అక్కడ మీరు “Linded Devices” ఎంపికను ఎంచుకోండి
ఈ ఆప్షన్‌లో మీ వాట్సాప్ ఖాతాకు లింక్ చేయబడిన అన్ని పరికరాల జాబితా మీకు కనిపిస్తుంది
దానిలో మీరు ఆండ్రాయిడ్, విండోస్ లేదా బ్రౌజర్ మొదలైన వివరాలను చూడవచ్చు
ఆ జాబితాలో మీకు ఏదైనా తెలియని పరికరం కనిపిస్తే, మీరు దానిని అక్కడి నుంచి తీసివేయవచ్చు
ఈ విధంగా మీరు మీ వాట్సాప్‌ను మరొకరు లింక్ చేశారా లేదా ఉపయోగించారా అనేది తెలుసుకోవచ్చు.
ఆ క్రమంలో మీరు మీ ఖాతా నుంచి తెలియని పరికరాలను తొలగించుకోవచ్చు
ఈ ఫీచర్ ద్వారా వినియోగదారులు ఒకే వాట్సాప్ ఖాతాను అనేక పరికరాల్లో ఒకేసారి ఉపయోగించుకోవచ్చు
దీంతోపాటు మీ నంబర్ పేరుతో ఎవరైనా వాట్సాప్ ఖాతాను ప్లే స్టోర్ నుంచి ఇన్ స్టాల్ చేసి వినియోగించినా కూడా మీకు ఓటీపీ వస్తుంది. అలాంటి సమయంలో మీరు తెలియని వారికి అలాంటి సమాచారం తెలుపకూడదు.