Free UPI Transactions: భారతదేశంలో డిజిటల్ చెల్లింపుల పేరిట విప్లవాత్మక మార్పులు తీసుకొచ్చిన యూపీఐ (UPI) గురించి కేంద్ర ప్రభుత్వం ఒక కీలక ప్రకటన చేసింది. యూపీఐ లావాదేవీలపై ఛార్జీలు వసూలు చేస్తారంటూ గత కొన్నిరోజులుగా వస్తున్న వార్తలకు ప్రభుత్వం తెరదించింది. సాధారణ వినియోగదారులకు ఈ సేవలు ఎప్పటిలాగే పూర్తిగా ఉచితంగా అందుబాటులో ఉంటాయని స్పష్టం చేసింది.
పేమెంట్ అండ్ సెటిల్‌మెంట్ సిస్టమ్స్ చట్టంలో మార్పుల వల్ల వినియోగదారులపై భారం పడుతుందని ఆందోళన చెందాల్సిన అవసరం లేదు. ఒక వ్యక్తి నుంచి మరొక వ్యక్తికి (P2P) జరిపే లావాదేవీలకు ఎలాంటి రుసుము చెల్లించాల్సిన పనిలేదని ఆర్థిక మంత్రిత్వ శాఖ వెల్లడించింది. వ్యాపార లావాదేవీల (MDR) విషయానికొస్తే.. ఒకవేళ ఛార్జీలు విధించినా అవి పరిమితంగా, సాధారణ కార్డుల కంటే చాలా తక్కువగా ఉంటాయని తెలిపింది.
మనదేశంలో చిన్న వ్యాపారుల నుంచి పెద్ద షాపింగ్ మాల్స్ వరకు ప్రతీచోటా యూపీఐ చెల్లింపులే నడుస్తున్నాయి. ఒక్క జులై నెలలోనే దాదాపు 2,366 కోట్ల లావాదేవీల ద్వారా రూ.29.9 లక్షల కోట్ల మార్పిడి జరిగింది. ఇలాంటి సమయంలో యూపీఐ ఉచితమని ప్రభుత్వం ప్రకటించడం వినియోగదారులకు పెద్ద ఊరటనిచ్చింది. ఇది డిజిటల్ లావాదేవీలపై ప్రజల్లో ఉన్న నమ్మకాన్ని మరింత పెంచుతుంది.
Also Read: అమెజాన్ సేల్‌లో బ్లాక్‌బస్టర్ ఆఫర్.. రూ.10,000 తగ్గిన Samsung Galaxy A56 5G ధర!
త్వరలోనే ఇంటర్నెట్ సరిగ్గా లేని ప్రాంతాల్లో కూడా యూపీఐ చెల్లింపులు చేసుకునే సదుపాయం రాబోతోంది. ఎన్‌ఎఫ్‌సీ (NFC) సాంకేతికత ద్వారా స్మార్ట్‌ఫోన్‌ను పోస్ (PoS) మిషన్‌కు ట్యాప్ చేసి సులభంగా పేమెంట్ చేయవచ్చు. గ్రామీణ ప్రాంతాల్లో, నెట్‌వర్క్ సమస్యలు ఉన్న ప్రదేశాల్లో లేదా ప్రయాణాల్లో ఉన్నప్పుడు ఈ ఆఫ్‌లైన్ విధానం ఎంతో ఉపయోగకరంగా మారనుంది.
ఈ ఆఫ్‌లైన్ విధానం సురక్షితంగా పనిచేయడానికి నేషనల్ పేమెంట్స్ కార్పొరేషన్ ఆఫ్ ఇండియా (NPCI) ప్రత్యేక సర్టిఫికేషన్ ప్రక్రియను నిర్వహించనుంది. ప్రాథమిక సమాచారం ప్రకారం.. ఆఫ్‌లైన్‌లో ఒక్కో లావాదేవీకి గరిష్టంగా రూ.2,000 వరకు పరిమితి ఉండే అవకాశం ఉంది. ఇది చిన్న చిన్న అవసరాలకు ఎంతగానో ఉపయోగపడుతుంది.
ప్రభుత్వం తీసుకున్న ఈ నిర్ణయం డిజిటల్ ఆర్థిక వ్యవస్థను మరింత ముందుకు తీసుకెళ్తుంది. సేవలు సులభంగా, ఉచితంగా లభించినప్పుడే ఎక్కువ మంది డిజిటల్ బాట పడతారు. సాంకేతికతను మరింత పెంచుతూనే, వినియోగదారులకు భారం కాకుండా చూసుకోవడం ఇండియా డిజిటల్ పేమెంట్స్ వ్యవస్థకు మరింత బలాన్ని చేకూరుస్తుంది.
Also Read: మ్యాప్స్ నుంచి నేరుగా ఫుడ్ ఆర్డర్, హోటల్ బుకింగ్.. గూగుల్ తెచ్చిన కొత్త AI అప్‌డేట్ చూశారా?
Share
ప్రకృతి అందాల నడుమ వందేభారత్ పరుగులు.. ట్రయల్ రన్ కు రైల్వే గ్రీన్ సిగ్నల్!
ముఖం చాటేస్తున్న పులస చేప.. ఎందుకిలా, అదేనా అసలు కారణం, మార్కెట్లో దొరికినా..
