ఒకే ఒక్క నిర్ణయం.. 700 మంది క్రీడాకారుల జీవితాలను మార్చేసింది!

Rural Sports: సరిగ్గా 1996 నవంబర్ 14.. మహబూబాబాద్ క్రీడా చరిత్రలో ఓ మలుపు తిరిగిన రోజు. అప్పట్లో గ్రామీణ ప్రాంతాల్లో ఆటలంటే పెద్దగా అవగాహన లేదు. అసలు సరైన స్టేడియంలు లేవు, స్పోర్ట్స్ కిట్స్ కొనుక్కునే స్థోమత కూడా పిల్లలకు లేదు. కానీ, పేదరికం అనేది పల్లె బిడ్డల ప్రతిభకు అడ్డుకాకూడదని బొడ్డుపల్లి ఉపేంద్రం, మరికొందరు మిత్రులు కలిసి ఓ నిర్ణయం తీసుకున్నారు. అలా పుట్టిందే ‘మహబూబాబాద్ అథ్లెటిక్ అసోసియేషన్’ — అంటే ‘మా అసోసియేషన్’. అథ్లెటిక్స్, ఖో-ఖో, బాస్కెట్ బాల్ వంటి ఆటల్లో గ్రామీణ పిల్లలను తీర్చిదిద్దాలని, ఉన్న అరకొర వసతులతోనే క్రీడా పాఠాలు మొదలుపెట్టారు.

ఆరోగ్యవంతమైన సమాజమే మా లక్ష్యం!

మన దగ్గర చాలామంది పిల్లలు చదువు తర్వాత ఏం చేయాలో తెలియక, లేదా చెడు అలవాట్ల బారిన పడి దారి తప్పుతుంటారు. కానీ, ఆటలు నేర్పడం వల్ల పిల్లల్లో శారీరక బలమే కాదు.. క్రమశిక్షణ, టైమ్ సెన్స్, టీమ్ వర్క్, ఓటమిని తట్టుకునే ఆత్మవిశ్వాసం పెరుగుతాయి. సరిగ్గా ఈ విలువలనే ‘మా అసోసియేషన్’నూరిపోసింది. ఆ కష్టానికి ఫలితమే నేటి ఈ సక్సెస్. ఒకటి కాదు రెండు కాదు.. ఈ మూడు దశాబ్దాల్లో ఇక్కడ శిక్షణ తీసుకున్న వాళ్లలో ఏకంగా 500 మంది స్టేట్ లెవల్ ప్లేయర్స్ అయ్యారు, మరో 200 మంది నేషనల్ లెవల్‌కు ఎదిగారు. మారుమూల పల్లెల నుంచి వచ్చిన పేద విద్యార్థులు నేడు క్రీడా కోటాలో మంచి ఉద్యోగాలు సాధిస్తూ తమ కుటుంబాలకు అండగా నిలుస్తున్నారు.

పల్లె క్రీడల గురుకులం.. 30 ఏళ్ల ‘మా’

కేవలం పిల్లలను ఆటగాళ్లుగా తయారు చేయడంతోనే తమ బాధ్యత అయిపోయిందని ఉపేంద్రం బృందం అనుకోలేదు. నేటి బిజీ లైఫ్‌లో చిన్న వయసులోనే బీపీ, షుగర్ వంటి జబ్బుల బారిన పడుతున్న సామాన్యులను కాపాడాలని మరో అడుగు వేశారు. అదే ‘మా ఫిట్‌నెస్ బంధన్ ఛాలెంజ్’. వయసుతో సంబంధం లేకుండా ప్రతి ఒక్కరూ రోజూ వాకింగ్, ఎక్సర్‌సైజ్, యోగా, సూర్యనమస్కారాలు చేయాలని ప్రజల్లో ఆరోగ్య స్పృహ పెంచుతున్నారు. ఎలాంటి లాభాపేక్ష లేకుండా, కేవలం పల్లె బిడ్డల భవిష్యత్తు బాగుండాలనే ఒక్క ఆశయంతో మొదలైన ఈ ప్రయాణం 30 ఏళ్లు పూర్తి చేసుకోవడం మామూలు విషయం కాదు. కాలం మారినా ఆ స్ఫూర్తి మాత్రం ఏమాత్రం తగ్గలేదు.

Also Read: చేతికొచ్చిన వరి పంట కోసం.. ట్యాంకర్ల నీళ్లతో పోరాటం!