India’s Wicket Keeper For T20 World Cup 2024: టీ20 ప్రపంచకప్‌లో భారత వికెట్‌కీపర్‌గా ఎవరు ఉండాలి? ప్రస్తుతం, రిషబ్ పంత్, సంజూ శాంసన్, దినేష్ కార్తీక్, KL రాహుల్, జితేష్ శర్మ అనే ఐదుగురు పోటీదారులు ఉన్నారు. ఇషాన్ కిషన్, ముంబై ఇండియన్స్‌లో అగ్రస్థానంలో ప్రభావవంతమైన బ్యాటర్ అయినప్పటికీ, అతని బ్యాటింగ్ స్థానం కారణంగా పూర్తిగా పరిగణించే అవకాశం లేదు. మిడిలార్డర్‌లో బ్యాటింగ్ చేయగల ఆటగాడు భారత్‌కు అవసరం. ఇక్కడే పంత్, దినేష్ కార్తీక్ ఇతరుల కంటే ప్రాధాన్యత జాబితాలో ముందుంటారు. మిగిలిన వారు ఎక్కువగా మొదటి మూడు స్థానాల్లో బ్యాటింగ్ చేయడానికి ఇష్టపడతారు. జితేష్ ఫినిషర్‌గా పేరు తెచ్చుకున్నాడు కానీ IPL 2024లో అతని ఫామ్ ఆందోళన కలిగించే విషయం.
ప్రస్తుత పరిస్థితిని అంచనా వేసి చూస్తే రాజస్థాన్ రాయల్స్ కెప్టెన్ సంజూ శాంసన్, ఢిల్లీ కెప్టెన్ రిషబ్ పంత్ ముందు వరుసలో ఉన్నారు. కానీ విధ్వంసం సృష్టించే దినేష్ కార్తీక్‌ను తక్కువ అంచనా వేయలేం. ఇప్పటికే ఈ సీజన్‌లో విధ్వంసానికి మారుపేరుగా మారిన డీకే పలు విలువైన ఇన్నింగ్స్‌లు ఆడాడు. దీంతో ఈ ఏడాది జూన్-జూలైలో USA, వెస్టిండీస్‌లలో జరగనున్న ప్రపంచ కప్‌లో కార్తీక్ తనదైన ముద్ర వేయాలని ఉవ్విళ్లూరుతున్నాడు. టీ 20 ప్రపంచ కప్ విదేశీ పరిస్థితులలో ఆడుతున్నారు కాబట్టి, 15 మందితో కూడిన భారత జట్టులో ఇద్దరు స్పెషలిస్ట్ కీపర్‌లు ఉండటం దాదాపు ఖాయం.
ఢిల్లీ క్యాపిటల్స్‌కు నాయకత్వం వహిస్తూ పంత్ ఇప్పటికే తన ఫిట్‌నెస్‌ను నిరూపించుకున్నాడు. టీమ్ మేనేజ్‌మెంట్ ఎడమచేతి వాటం కీపర్‌ను ఎంపిక చేయాలనుకుంటే పంత్ మొదటి వరుసలో ఉంటాడు. కానీ డీకే ఇప్పటికే ఫినిషర్‌గా నిరూపించుకున్నాడు. 38 ఏళ్ల వయస్సులో కూడా, కార్తీక్ తన కంటే పొట్టి ఫార్మాట్‌లో చాలా తక్కువ మంది మెరుగైన ఫినిషర్లు ఉన్నారని చూపించాడు.
అయితే టీ 20 ప్రపంచ కప్‌లో కీపర్ స్థానం రాజస్థాన్ రాయల్స్ కెప్టెన్ శాంసన్‌కు దక్కుతుందని భారత మాజీ క్రికెటర్ హర్భజన్ సింగ్ అభిప్రాయపడ్డాడు. భారత T20I XIలో శాంసన్ స్థానం గురించి ఎలాంటి చర్చ జరగకూడదని మాజీ ఆఫ్ స్పిన్నర్ చెప్పాడు. రోహిత్ శర్మ తర్వాత భారతదేశానికి తదుపరి T20I కెప్టెన్‌గా కేరళ క్రికెటర్‌ను తీర్చిదిద్దాలని కూడా అతను చెప్పాడు.
“T20 ప్రపంచకప్ కోసం సంజూ శాంసన్ భారత జట్టులోకి రావాలి. రోహిత్ తర్వాత భారతదేశానికి తదుపరి T20 కెప్టెన్‌గా కూడా ఉండాలి. ఏవైన సందేహాలున్నాయా?” అంటూ టర్బోనేటర్ ట్విట్టర్ వేదికగా స్పందించాడు.
Also Read: ఐపీఎల్.. ఒకవైపు రికార్డులు.. మరోవైపు విమర్శలు!
“ఈ సీజన్ IPLలో బ్యాటర్, కెప్టెన్‌గా శాంసన్ చాలా విజయవంతమయ్యాడు. ఈ సీజన్‌లో ఇప్పటివరకు ఆడిన ఎనిమిది మ్యాచ్‌లలో 152.3 స్ట్రైక్ రేట్‌తో 314 పరుగులు చేశాడు. ఎనిమిది మ్యాచ్‌ల్లో 14 పాయింట్లతో ఈ ఏడాది ప్లేఆఫ్‌కు అర్హత సాధించిన తొలి జట్టుగా రాయల్స్ ఎప్పటినుంచో చేరువలో ఉంది. కెప్టెన్‌గా శాంసన్ అద్భుతంగా రాణించాడు.” అని మాజీ స్పిన్నర్ రాసుకొచ్చాడు.
Yashasvi Jaiswal’s knock is a proof of class is permanent . Form is temporary @ybj_19 and there shouldn’t be any debate about Keepar batsman . @IamSanjuSamson should walks in to the Indian team for T20 worldcup and also groomed as a next T20 captain for india after rohit . koi…
— Harbhajan Turbanator (@harbhajan_singh) April 22, 2024
కానీ ఇషాన్ కిషన్‌లా శాంసన్‌కు అడ్డొచ్చేది అతని బ్యాటింగ్ స్థానం. రాజస్థాన్ తరఫున అతను సాధించిన పరుగులన్నీ మూడో స్థానంలో ఆడినవే. మరోవైపు పంత్ 4 లేదా 5వ స్థానంలో బ్యాటింగ్‌కు దిగి 150 స్ట్రైక్ రేట్‌తో 254 పరుగులు సాధించాడు. మ్యాచ్ పరిస్థితిని బట్టి భారత్ కీపర్ నెం.5 లేదా 6వ స్థానంలో బ్యాటింగ్ చేసే అవకాశం ఉంది. శాంసన్ T20I, ODIలలో భారతదేశం తరపున ఆ స్థానంలో బ్యాటింగ్ చేసినప్పటికీ, పంత్‌కు ఆ సంఖ్యలో ఎక్కువ అనుభవం ఉంది. అనుభవంతో పాటు ఎడమచేతి వాటం అతన్ని ముందు వరుసలో నిలబెడుతుంది. ఆ తర్వాత కార్తీక్ ఈ ఏడాది RCB తరపున 196 స్ట్రైక్ రేట్‌తో 251 పరుగులు చేశాడు. అయితే సెలక్టర్లు ఎదురుచూడకుండా మళ్లీ డీకే వైపు తిరిగి వస్తారా? అనే ప్రశ్నకు ఒక పక్షం రోజుల్లో సమాధానం లభించే అవకాశం ఉంది.