BJP Telangana: స్వేచ్ఛ బ్యూరో: తెలంగాణలో రాజకీయంగా మరింత పట్టు సాధించేందుకు భారతీయ జనతా పార్టీ సరికొత్త వ్యూహాలతో ముందుకు సాగుతోంది. ఇందులో భాగంగా వచ్చే నెల మొదటి వారంలో పార్టీ జాతీయ అగ్రనేతలు రాష్ట్రంలో పర్యటించనున్నట్లు విశ్వసనీయ సమాచారం. పార్టీ శ్రేణుల్లో ఉత్సాహం నింపేలా, భవిష్యత్ కార్యాచరణను పటిష్టం చేసేలా ఈ పర్యటనలు సాగనున్నట్లు తెలుస్తోంది. తెలంగాణలోని 10 జిల్లాల్లో బీజేపీ జిల్లా కార్యాలయాలను ప్రారంభించేందుకు బీజేపీ జాతీయ అధ్యక్షుడు నితిన్ నబీన్ వచ్చే నెల మొదటి వారంలో రాష్ట్రానికి వచ్చే అవకాశం ఉంది.
అలాగే, పార్టీ శ్రేణులకు దిశా నిర్దేశం చేసేందుకు నిర్వహించబోయే కీలక ప్రశిక్షణ తరగతులకు బీజేపీ జాతీయ సంస్థాగత ప్రధాన కార్యదర్శి బీఎల్ సంతోష్ హాజరయ్యే అవకాశాలు కనిపిస్తున్నాయి. ఇటీవలే ఢిల్లీ పర్యటనకు వెళ్లిన బీజేపీ సీనియర్ నేత రాంచందర్ రావు.. జాతీయ నేతలను కలిసి తెలంగాణకు రావాల్సిందిగా అధికారికంగా ఆహ్వానించారు. ఇదిలా ఉండగా ఈ పర్యటనల కంటే ముందే, రాష్ట్రంలో పార్టీ తాజా పరిణామాలపై చర్చించేందుకు శుక్రవారం బీజేపీ కీలక నేతల బ్రేక్ ఫాస్ట్ మీటింగ్ నిర్వహించనున్నారు.శుక్రవారం ఉదయం 9 గంటలకు రాంచందర్ రావు అధ్యక్షతన ఈ మీటింగ్ ప్రారంభంకానుంది. కాగా ఈ సమావేశానికి రాష్ట్ర పార్టీ ఇన్చార్జ్ అభయ్ పాటిల్, రాష్ట్ర సంస్థాగత ప్రధాన కార్యదర్శి చంద్రశేఖర్ తివారి ముఖ్య అతిథులుగా హాజరుకానున్నారు.
Also Read: మాజీ మేయర్ బొంతు రామ్మోహన్ భార్య శ్రీదేవి పై కేసు నమోదు..!
ప్రస్తుతం అందుబాటులో ఉన్న పార్టీకి చెందిన ఎంపీలు, ఎమ్మెల్యేలు, ఎమ్మెల్సీలు, ముఖ్య నాయకులు ఈ భేటీలో పాల్గొననున్నారు. రాబోయే రోజుల్లో నిర్వహించాల్సిన పార్టీ రాష్ట్ర కార్యవర్గ సమావేశాల తేదీలు, వేదికల ఖరారుపై చర్చించే అవకాశాలున్నట్లు తెలుస్తోంది. అలాగే ప్రజా సమస్యలపై పోరాటాలు, క్షేత్రస్థాయిలో పార్టీని బలోపేతం చేసే వ్యూహాలపై చర్చ జరిగే చాన్స్ ఉంది. నియోజకవర్గాల్లో ఎంపీలు, ఎమ్మెల్యేలు, ఎమ్మెల్సీలు ప్రజలకు మరింత చేరువయ్యేలా వారి బాధ్యతలను నిర్దేశించడం అంటే పార్టీ భవిష్యత్ కార్యాచరణలో ప్రజాప్రతినిధుల పాత్ర అనే అంశంపై చర్చించే అవకాశం ఉన్నట్లు సమాచారం. ఇదిలా ఉండగా ఇప్పటికే ఈనెల 10వ తేదీన ప్రధాని మోడీ తెలంగాణలో భారీ బహిరంగ సభను నిర్వహించగా వచ్చేనెలలో జాతీయ నేతల రాకతో తెలంగాణలో బీజేపీ శ్రేణులు మరింత క్రియాశీలకంగా మారే అవకాశం ఉంది.
Also Read: మెదక్ పర్యాటక అందాలపై రీల్స్ చేయండి: కలెక్టర్ ప్రతిమా సింగ్!
Share
రైతుల కోసం రోడ్డు పైకి వచ్చిన సీఐ.. ఫోన్ గ్రూపుతో వడ్ల గోస తీర్చిన లతీఫ్!
సోషల్ మీడియాను షేక్ చేస్తున్న రామ్ పోతినేని వీడియో.. అసలు విషయం తెలిసి ఫిదా అవుతున్న టాలీవుడ్
