మహిళను జుట్టుపట్టి ఈడ్చుకెళ్లిన హోంగార్డ్‌.. ఉద్యోగం నుంచి తొలగింపు

Home Guard Anand: హఫీజ్‌పేట్‌ రైల్వే స్టేషన్‌ సమీపంలో ఒక మహిళపై జరిగిన దారుణ దాడి తీవ్ర కలకలం రేపింది. బాధితురాలిపై లాఠీతో దాడి చేయడమే కాకుండా, జుట్టు పట్టుకొని ఈడ్చుకెళ్లిన ఘటన ప్రజల్లో తీవ్ర ఆగ్రహాన్ని తెప్పించింది. ఈ ఘటనను తీవ్రంగా పరిగణించిన పోలీసు ఉన్నతాధికారులు బాధ్యుడైన హోంగార్డుపై కఠిన చర్యలు తీసుకున్నారు.

హోంగార్డు ఉద్యోగం నుంచి డిస్మిస్

మహిళపై దాడికి పాల్పడిన వ్యక్తిని వికారాబాద్‌కు చెందిన తెలంగాణ పోలీస్ హోంగార్డ్‌ ఆనంద్‌గా అధికారులు గుర్తించారు. బాధ్యతాయుతమైన పదవిలో ఉంటూ మహిళ పట్ల అతిశయంగా, ఘోరంగా ప్రవర్తించినందుకు గానూ అతడిని సర్వీసు నుంచి తక్షణమే తొలగిస్తూ వికారాబాద్ జిల్లా ఎస్పీ స్నేహా మేహ్రా అధికారికంగా ఉత్తర్వులు జారీ చేశారు. పోలీసు వ్యవస్థకే మచ్చ తెచ్చేలా ప్రవర్తిస్తే ఎంతటి వారికైనా కఠిన చర్యలు తప్పువని ఈ నిర్ణయంతో స్పష్టం చేశారు.

విచారణ వేగవంతం చేసిన మియాపూర్ పోలీసులు

మరోవైపు ఈ ఘటనపై మియాపూర్ పోలీస్ స్టేషన్‌లో కేసు నమోదు చేశారు. దాడికి పాల్పడిన నిందితుడు ఆనంద్‌ను పోలీసులు ఇప్పటికే అదుపులోకి తీసుకున్నారు. మహిళపై దాడి చేయడానికి గల కారణాలు, అసలు అక్కడ ఏం జరిగిందనే విషయాలపై అతడిని తీవ్రంగా విచారిస్తున్నారు. బాధితురాలికి న్యాయం జరిగేలా చట్టపరమైన అన్ని చర్యలు తీసుకుంటామని పోలీసులు తెలిపారు.

Also Read: అవినీతి మరక లేని పాలన మోదీకే సాధ్యం.. రోజ్ గార్ మేళాలో బండి సంజయ్ సంచలన వ్యాఖ్యలు!