చిక్కడపల్లిలో దారుణం.. భార్యను రోకలిబండతో బాది చంపిన భర్త!

Chikkadpally Murder: హైదరాబాద్‌ చిక్కడపల్లి పోలీస్ స్టేషన్ పరిధిలో ఆదివారం ఉదయం తీవ్ర విషాదం చోటుచేసుకుంది. బాగ్‌లింగంపల్లిలోని మాచర్ల జ్యువెలరీ షాప్ సమీపంలో ఓ వ్యక్తి తన భార్యను అత్యంత దారుణంగా హత్య చేశాడు. ఈ సంఘటన స్థానికంగా తీవ్ర కలకలం రేపింది.

వివరాల్లోకి వెళ్తే..

చిక్కడపల్లి పోలీస్ స్టేషన్ పరిధిలోని నరేందర్ (34), తేజస్వి (29) దంపతుల మధ్య కొంతకాలంగా కుటుంబ కలహాలు నడుస్తున్నాయి. ఈ క్రమంలోనే ఆదివారం ఉదయం గంటల సమయంలో ఇద్దరి మధ్య మరోసారి తీవ్రస్థాయిలో గొడవ జరిగింది. ఆవేశానికి లోనైన నరేందర్, ఇంట్లోని రోకలిబండను తీసుకుని భార్య తేజస్వి తలపై బలంగా బాదాడు. ఈ దాడిలో తీవ్ర రక్తస్రావమై తేజస్వి అక్కడికక్కడే స్పృహతప్పి పడిపోయింది.

పోలీసుల దర్యాప్తు.. నిందితుడి కోసం గాలింపు

సమాచారం అందుకున్న చిక్కడపల్లి పోలీసులు వెంటనే ఘటనా స్థలానికి చేరుకున్నారు. అయితే, అప్పటికే తేజస్వి తీవ్ర గాయాల వల్ల ప్రాణాలు కోల్పోయినట్లు పోలీసులు నిర్ధారించారు. మృతదేహాన్ని స్వాధీనం చేసుకుని పోస్టుమార్టం నిమిత్తం ఆసుపత్రికి తరలించారు.

ఈ దారుణానికి ఒడిగట్టిన అనంతరం నిందితుడు నరేందర్ అక్కడి నుంచి పరారయ్యాడు. అతని కోసం ప్రత్యేక బృందాలతో గాలింపు చర్యలు చేపట్టినట్లు పోలీసులు వెల్లడించారు. హత్యకు గల అసలు కారణాలపై కేసు నమోదు చేసుకుని పోలీసులు దర్యాప్తు వేగవంతం చేశారు.

Also Read: విధుల్లో ఉండగానే గుండెపోటు.. నున్న సీఐ అలీ మృతి!